نهاية الاسبوع 3

ازيكم ...
اولا اجمل خبر هذا الاسبوع .... انى سأبدأ اجازتىىىىىىى
بعد عام من الهلاك المتواصل دون تقطع او راحة
ايام فى احضان الاحباب وقلوب الحبايب يا الله على عطائها ......
حضن ابى وامى وخالتى واخواتى ولمة العيلة وحضن بلدتى الحبيبة
وحضن صديقات طفولتى حبيبات قلبى ولقاءنا السنوى بعيدا عن الازواج والابناء والمشاغل
طاقة حب غير عادية ..... تغرقنى بلا ادنى رغبة لى فى النجاة
ولا الطفو ... بل اغوص فيها حتى الثمالة
******************************
ان كتب لنا الموت فلنمت ونحن نبتسم بسمة رضا عن معط لم يمنع ومنعم في كرمه نطمع
ان يتم نعمه وكرمه برضاه عنا وفى اخرى لانجزع وفى نعيمه نرتع وفينا محمد (صلى الله عليه وسلم )يشفع
وان كتب لنا الموت وعلمنا انه أت لامحالة فالحصيف من ترك وراءه لغيره ماينفع
والشريد الضائع من ترك مزرعته خراب مدقع
***************************

خالف نفسك فى ماتهوى فان فى مخالفتها نجاة

****************************
اليكى

اعلم ماتمرين به الان ...وانت تقتربين بقوربك الواهى من الشاطىء
تسعدين بالنجاة ... ولكنها لم تمنع احساس المرارة لخروجك من بحر رغم خضمه الا انك كنت
على استعداد للقتال والصراع لاخر رمق .. اذا ماتمسك هو بقاربكما المثقوب
كنتى ستسدين الثقوب باحشاء قلبك ... وعروقك ذاتها ولو انتزعتيها انتزاعا
لكنه تركك وولى جبانا ينجو لبر ما يعلم كنهه الا الله
فعودى حبيبتى ..بلا حسرة عليه ولا على نفسك
فانت فى كل الاحوال فائزة
وهنيئا لك اللقب .. فقد اتفقنا انه شرف لكل ما ارضت الله فيه
ولكن الله عز وجل لم يرتضى لها عذابا ...فابشرى بجنة فى الدنيا من قلب محب
وانا لظننا بالله انه سيعوضك خيرا فى الاخرة
احبك رغم انى مقصرة ...سامحينى
الى مطلقة السبت القادم
**********************************
قالوا لى : لما تشقين على نفسك ؟ وقد تيسرت لك؟
قلت: رب معسر على نفسه يرحمه الله بما كان منه فييسر عليه يوم العسرة
فاللهم فاغفر لى مالايعلمون واجعلنى خيرا مما يظنون
امييين
***************************
ماما ..حبيبتى
بيقولوا السوق الحرة مابقتش حرة
ينفع ناجل طلبك انى اجيب لك احفاد لغاية ماتبقى حرة ؟؟؟
ممكن ؟؟؟؟
وبدل مادخل عليكى بايدى فاضية
ينفع اجيب لك كيلو زيت بدالهم؟؟؟؟
***************************
من أجمل مايمكن ان يحدث لك يوما
ان تجد قلبا يهتم بك ويهمه ان كنت اتغديت ولا لأ
ويخلص رصيده عشان يهزأك انك ازاى ماكلتش ؟!!!!!
جميييييييييل جدا
اليك ...شكرا فعلا شكرا
************************
حبا لكم فى الله ...وحبا فى رسول الله

نهاية الاسبوع 2

تحديث :

لاتنسوا الاثنين الرابعة مساء انطلاق الايميلات لهولندا

ترجموا حبكم له صلى الله عليه وسلم بفعل بسيط تحفظ به ماء وجوهنا يوم نلقاه

الساعة الرابعة عصراً نرسل رسالتنا

http://kawlansadida.blogspot.com/2008/05/blog-post_24.html

**********************

الحمد لله على نعمة الاسلام وكفى بها نعمة ... (واذكروا نعمة الله عليكم ان كنتم اعداء فالف بين قلوبكم فاصبحتم بنعمته اخوانا ) صدق الله العظيم

مانلقاه من حب من تعليقات وايميلات وعلاقات طيبة لله ورسوله ماهو الا نعمة كبيرة

نعجز عن شكر الله عليها ... فاللهم اغفر لنا عجزنا عن شكرك بما يليق بقدرك

اليكم جميعا ... احبكم فى الله

***********************

سهل الكلام ...سهل
سهل جدا كمان يادوب تفتح بقك وتطلق لسانك ..
انا ارى ..انا شايف.... انا اعرف
مسكين من سبق عقله نوره ...ومبارك من سبق نوره عقله
يا انسان ...ايها الضعيف العاجز
انت مين ؟
وزنك فى الكون اد ايه ؟
تساوى ايه ؟ لو قورنت بهم
من هم ؟؟؟؟
هم الرجال
...
اهداء اليه
************
قالوا لى انك تقرأ لى الان ...اهذا حق ؟
احقا مايقولوه ؟؟؟؟
أيهمك ان ترى ماانا فيه ؟ وان تعرف رأيى فيك ؟
الا تعرفه ؟
الفرق بينى وبينك
انك الى الان تنظر الى الخلف وانت تسير للامام
وانا اقف وانظر الى الخلف لاعرف كيف اخطو الى الامام
ولا تتدعى ان بيننا شىء مشترك
فما كان بيننا كان شيئا مختلف
لا اعطيه تقديرا ولا يهمنى من كسب وخسر
فالحساب مختلف
اتذكر تلك القصة القديمة التى تحولت معى الى كابوس ؟؟
قصة الفتاة التى هربت من الغول فى الصحراء فوجدت كوخا منيرا فاستأذنت بالدخول
فاذن لها ... وامنها ... من وحشة الليل وخباياه
فامنت ثم وجدت صاحب الكوخ شبح يمتص الارواح ؟!!!!
بالتاكيد تذكرها ... فقد عشتها معى ليال من الفزع والاستيقاظ متعرقة مرعوبة
اتذكر حينما قلت لك اخيرا بعد ايام من التعب منها :انى ساتخلص من هذا الكابوس
وسألتنى كيف ؟
الن تدخلى الكوخ ؟؟؟
اتذكر ماذا قلت لك ؟؟؟؟
الاجابة هى ماافعله الان
وكما كنت تقول : انها ان عقدت عزما ابرمته
بالمناسبة
انت كما انت
اسأل الله لنا ولك العافية
*********************
حينما قلت لها
ليس مابيننا عداء شخصى انما اختلاف فى اسلوب العمل واختلاف مدارس منهجية
قالت :
لا بل انت صعبة القيادة
فاخرجت مفكرتى وسجلت ذلك
فقالت ماذا تفعلين ؟
قلت اسجل اول عيب لمسته فى ؟ والله يعلم انه حق ...لذا ساجعله فى مقدمة اهتمامى
ضحكت ضحكة مستخفة ودخلت غرفتها وبعد دقائق جاءت زميلتى
وتساءلت اانت بخير ؟
اندهشت وقلت الحمد لله فى ايه؟
قالت لانها دخلت منتصرة وقالت ظفرت بها وكسرت مناخيرها
ضحكت
وقلت لها نعم
اهدتنى تذكرة بعيبى فكسرت شوكة شيطانى
فقالت : والله انتى هابلة
قلت : يمكن ..
بعد ايام قالوا لى
لن تكونى معها اخترناكى لترأسى القسم بدلا منها
قلت فى اول اجتماع بفريقى انا واحدة منكم ماحدش احسن من حد
وبعد لقاءين قالت لى احداهن :بس كدا احنا اسلوبنا مختلف
قلت فى حدة : دا طريقتى واللى عاجبه (بصوت حاد)
اطرقن جميعا وظللنا ينظرن لبعضهن باستغراب
وبعد دقائق من الصمت انفجرنا جميعا فى الضحك
****************
حين جلست وحدى معه
شعرت انى خجلى ... فانا لم اكن كما يحبنى ان اكون
تحرجت ان اطلب منه شيئا جديدا وهو المنعم دائما
صمت وانهمرت دموعى تشق اخاديد الخزى والتقصير
فى الصباح دخلت مكتبى ...لم ابتسم
جاءنى تليفون
بعث لى بمطلبى دونما سؤال
بكيت :طيب حشكره على كل ده ازاى
كلما زدتنى بعدا زدت منى قربا
وضاقت يدى فلم اجد منك الا كرما
فكن لى اليك معين فلا ثم سواك ربا
وارحم عاجزا زاد نفسه بالمعاصى ظلما
امين

صحن المسجد

فى صحن المسجد كانت جلستى المفضلة لسنوات فى انتظار الشيخ المحفظ
ايام وايام اجلس اتأمل هذا الضوء العجيب ولماذا اشعر به يختلف فى هذة البقعة بالذات

جميلة هى تلك اللحظات وانا اصغى الى اجنحة الملائكة " حين قال لى ابى ان الملائكة تحفنى وانا ذاهبة الى حفظ القرأن " وظللت لفترة اتخيل انها تحفنى اى بمعنى تلتهمنى من كتر الحب مثلما اسمع امى تقول لاخى الصغير "عايزة اكلك اكل " ... وكثيرا ماتفقدت ذراعى خشية يكونوا التهموه .........


كنت انظر الى اعلى ..وانا اجلس على البلاط القديم الذى يظهر فى الصورة واشعر انى اطييييييييييييييييييييييييييييييييير

كثير ماتساءلت لما يفتحون تلك الفتحة فى المساجد ولماذا هى جميلة هكذا وما مقدار تلك الروحانيات فيها ... كان يعلو صوت ضجيج الاولاد حولى منتهزين فرصة ان الشيخ غير موجود ... وحدى كنت لااحب اللعب فى المسجد كنت اعتبره عيبا لان صاحب البيت لم يأذن لى باللعب ......!!!!!!!

كنت استشعر مهابة المسجد ...ومازلت والحقيقة ليست كل المساجد شعورى نحوها واحد بل هناك مساجد اجلس فيها ولا امل الجلوس وتغمرنى السكينة والشعور بالراحة بعد عناء طويييييييييييل

هذا المسجد ..هو من مساجد مدينتى الجميلة يحتل وسط البلد ..ابوابه كثيرة مفتوحة دائما ... يعلن عن ترحابه بالمعمرين ...

فى طريقى الى الجامعة كل صباح ندخل انا وابى نصلى الفجر فيه ...وغل ما كان يضايقنى انى لم يعد مسموح لى ان اجلس فى صحن المسجد مرة اخرى .. ولكنى كنت احيه كل صباح
ثم نتوجه الى موقف البلدة يتركنى ابى استقل الحافلة للذهاب الى المدينة المجاورة للجامعة والدراسة

حينما مررت عليه هذه المرة وجدته مرحبا ذاكر تلك الطفلة التى لم تكن تجيد الحفظ ابدا وتكره خرزانة مولانا التى كثيرا ما قرعتنى ونفرتنى من الذهاب الى حلقته فكنت اجلس فى ركن المسجد الى ان تنتهى الحلقة واعود الى بيتى ... واحمد الله على ان لم اضرب اليوم ... الى ان قابل الشيخ حسن والدى وشكا له تغيبى فشاط ابى وجاءنى متسائلا الى اين اذهب ؟؟؟ فقلت له: فى المسجد والله يا ابى لكنى لااحب الشيخ حسن ولا خرزانته
فاكفهر ابى وسألنى ايضربك؟ قلت له : نعم كلما عجزت على التسميع ..فاطرق ابى وقال ولماذا لم تحفظى ؟؟؟؟ قلت له :لا اعرف كيف احفظ ؟ كلما قرأت ظللت افكر فى صحن المسجد !!!!!!!!! وتشغلنى الملائكة بصوت اجنحتها ولا اعرف احفظ ..
ضحك ابى وضمنى الى صدره ... وقال : يبقى كان لازم الشيخ حسن يسمع صوت الملائكة حتى يفهم الا يضربك مرة اخرى

ربما لم استطع حفظ القرأن ..... ولكنى تعلمت ان اصغى الى صوت الملائكة وهى تقرأه
فى صحن المسجد وان اشتاق اليه

اشمعنى التاج ده؟

تاج رفقة الله يسامحها مع شكرى

رجاء حار لامجاملات ولا تعليقات من نوعية اجاباتك تدل على ......... دى احلام مجرد احلام لكى تظل المدونة صفحتى التى اخط بها بما يعترينى وانسى احيانا انكم ستقرأون رغم حبى لكم ...

ليس هناك شىء من الماضى احب ان اغيره فهو قضاء الله فى ولولاه ماكنت الان... فمنه تعلمت واستفدت ...وتعلمت ان كل مايأتى به الله خير ...ما من مرض او هم واو حزن او ضيق الا وانعم الله على بعدها بهدوء ورفعة كبيرة

لااريد تغيير شىء الا نفسى ...فادعوا لى بالصلاح ولامى ولى بالشفاء

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

خمس احلام ...اومممممممم

**حلمت بان رماح (حصانى) حيرجع فى صورة شاب..... امير حقيقى مش بعيد يكون صلاح الدين تانى ولا قطز

وانه يحبنى دونا عن كل ستات الارض..

ويكون عندى بيت على شط بحر ويكون بجنينة وانا وهو نختار تصميمه ونشارك فى وضع اول طوبة فيه وبعدها نقسم الجنينة اللى ورا الى حوضين مدورين واحد للخضراوات والفاكهة اللى حنزرعها والتانى للورد و الجنينة اللى قدام حنعمل اعدة جميلة ثابتة ونحط حوض ماية مدور للاولاد ومرجيحة تسعنا انا وهو

والدور الارضى له مدخلين من ورا ومن ادام اللى من ورا يودى على مضيفة يتحط فيها اكل يوميا لكل مسافر او عابر سبيل يمر ياكل ويشرب ويرتاح ويمشى ويكون فيه حد اعينه مسئول عن نضافتها وغلى الملايات يوميا وتكون خدمتها فوق الممتازة ومن الناحية اللى ادام فى المطبخ بتاعنا وفيه الريسبشن والمعيشة وحتكون اعدة مريحة ولونها بالالوان الهادية اللى تريح العين مابين الازرق والابيض والاخضر وفى اوضه واسعة جدا فيها اعدة عربى كلها مفياهش اى ارتفاعات وفى الوسط كوفى تيبل مناسبة للانخفاض والاضاءة خافتة فى الاركان فى شكل اسبوتات ارضية مغطاة بقماش كريمى تيل وفى الركنين التانين مكتبة طويلة لغاية راس الشخص بس مناسبة لارتفاع الشلت وتحتها ترابيزة نحط عليها الكتب والاباجورة الخاصة بالقراءة وجنبها نضارتنا ومبخرة وفى الركن التانى نفس الترابيزة ونفس الاباجورة بس عليها عدة الشاى والقهوة والمشروبات وكاتل كدا مناسب للديكور عشان اخدم نفسك بنفسك وجنبهم ترمس لطيف وتانك برضه متناسق الالوان مع جو الاوضه

وممنوع منعا باتا اللب ومااشبه او الاكل فى هذه الاوضه لانها لتلاوة القرأن ةالاوراد والاختلاء والخلوة الى الله بعيدا عن الناس ويكون الاولاد عارفين ان بابا وماما ممنوع ندخل عليهم وهما حد فيهم فى الاوضه دى لانهم لازم يكون لهم وقت مع الله من غير ماحد يزعجهم

وتحت كمان اوض نوم الضيوف وغرفة والدتى ووالدته ووالده والدى وفوق اوض النوم بتاعتنا وبتاعت الاولاد وحمامين والدور التالت اوضة المكتب الخاص به واوضة الخياطة والادوات الخاصة بيا واوضة القراءة ومكتبة كبيييييييييييييييرة

ومش حيكون بيشرب سجاير ولا بيحب ماتشات الكورة ولا بيحب السياسة ومش حندخل تليفزيون البيت وحنربى الاولاد بمنهج واحد وحيسيبلى امور البيت ومش حيخوفنى من السواقة ولا من الشارع وحيشجعنى ولمااخدرأيه لما اعجز اعرف انه مش حيتاخر على برأى حكيم وحنعد بعد المغرب نحكى ونتشاور كل البيت زى بابا ماكان بيعمل وحيأخر العشا ء لاننا لازم ننام بعد صلاةالعشا علطول

حلمت به اخ كبير وصديق وحبيب .....احلام بنت مشروعة

ودى مش حغيرها خالص .....

....................................

***حلمت اكون صحفية شجاعة جداااااااااااااااااااااوانى حيكون معايا واحد عبقرى كمبيوتر (كان طليقى كده بالمناسبة)ويكون شكل سامى يوسف (وكان كده برضه)وده قبل مايظهر اصلا سامى يوسف ويمكن كان ايامها ماتولدش بس دى كانت ملامح فارس احلامى

ودى حغيرها بقى (لانى اتأكدت ان الحكاية مش بس ملامح)

***حلمت اكون كاتبة كبيرة اعمل كتاب للاطفال عن شيخ كبير وله ولد وبنت تلاميذه عطالهم اسار كتير ولازم يلفوا يجمعوا فنون الحكمة السبعة وفى المقابل بقابلوا مشاكل وصعوبات كبيرة لما يكون العدو هو انفسهم وازاى بتغلبوا كل مرة عليه

** حلمت انى حكون تلميذة نجيبة لاعظم استاذ فى الارض ...وانه حيعلمنى ويدينى الحكمة وخلاصة كل العلوم .... (وحصل لكن ماكنتش نجيبة ولا نيلة )

**** حلمت انى حكون اول ست فى جيش يرجع القدس والاندلس ويدخل لغاية الاسكيمو شمالا ولغاية جنوب افريقيا جنوبا ومامتش الا لما اشوف راية الاسلام فوق كل شبر على وجه الارض ...ساعتها تهون كل الدنيا

******************************

أذكر خمس أحلام على الاقل ..تخص مستقبلك

@الحج والعمرة واعيش فى المدينة شوية

@@ السفر الى استاذى واستاذتى والقضاء مدة لابأس بها اشبع منهما

@@@ احقق لماما وبابا حاجة واحدة من اللى اتمنيت اعملهلهم ....

@@@@ الف العالم مع .... مين مش عارفة ومش فارقة زوجى ولا اخويا عصام حبيبى اللى دايما بيعوض الوجود الذكرى فى حياتى اقربها الموبايل بتاعه عطهولى عشان بتاعى اتسرق واخد العرة اللى كان معايا (اهو ده الحب) ولما بياخدنى سنلترو ونتمشى على الكورنيش فى اسكندرية ويمسك ايدى واطلع امشى على السور وهو بيضحك(حد يصدق ان دى اختى الكبيرة يا جدعان يلا يلا جرسينى جرسينى )

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن

نعم ... شيخى استاذى ومعلمى ... وهبة صاحبتى

*********

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا

شيخ عبد الرحمن رحمة الله عليه ومعلمتى السابقة رحمة الله عليها ....... ورماح

اهدى التاج لموناليزا

قيثارة

اه وكفى

مجداوية

ميتو

داى دريمنج

مفقوعة

ابى

روفى

يوجينى

الباحث عن الحقيقة

الخايف منها

الفارس

الصباغ

ام احمد

صبرنى

فاتيما

فرى هارت

ماعلينا

ويسبرز

الطائر الحزين

هدهد

شريف

انا مذنب

الريسة

كلمات

مهند

امولة

دكتور حر

غنيم

شيماء

مروة الزارع

هيومن

محمد عبد الغفار

فريدة

يقول انى امراة

جسر الى الحياة (التى وحشتنى)

عمر المصرى

عسقول

انسانة

يارب افتكر ...دى مش مدونة دا نا بكلم نفسى

ليسامحنى من لم تسعفنى الذاكرة فيا لحسن الختام

كل من يعلق عندى ويريد التاج شيلوه بسرعة

حقى ...

السلام عليكم
انا عارفة ان الناس مش حتفهم كلامى صح .... وعارفة ان ممكن تحصل مهازل سخيفة نتيجة فشل بعض الناس فى الحوار الهادىء لما فيه الصالح والخير والوصول الى الحق لكن انا برضه مش حينفع اسكت لان ده دينى ومش حخاف على شعور حد فى حد من حدود الله .....واعلن :اى تعليق مش محترم ولا فيه اى شتيمة او اساءة لاى مخلوق لن انشره ...رد بادب زى مانت عايز وناقشنى براحتك ...لكن حقى مايدخلش بيتى بذاءات دا حقى ... لذا اهلا بالحوار الهادف الذى يبين لنا جميعا الحق لان محدش فينا احسن من حد كلنا نبغى رضا الله ... خلاص .... على بركة الله
عجبا والله حقا من اناس يحملون انفسهم اثقالا لا يعلمون كيف انها موردتهم الهلاك والعياذ بالله .....
اعجب فعلا ممن يتجرأ ويجترىء على فرض من فروض الله هكذا بكل بساطة ... انا لاادعى العلم ولا ادعى مكانة ولا انا شيخ ولا امام ولا داعية .........انا امرأة مسلمة ترفض ان يمس دينها مهما حدث ...... ساءنى ان ارى احدى المدونات تقول رأيها فى الحجاب بتهور شديد واندفاع لامبرر له ... لا اعرف اتخشى ان تكون على باطل فتسارع باثبات انها على صواب حتى تبرىء نفسها .... مش فاهمة ... لكن مهما كانت المبررات لايحق لاى احد الاتى :-

* ان يتجاوز حدود الادب فى النقاش والاختلاف ... من السهل ان نسب ونشتم ..سهل على اى حد لكن هذا ليس سلوكا يليق بانسان ... مسلم .... بنت ... و المفروض انه مثقف ....

* انا لست مع اى من الجماعات ولا اشعر بمحبة كثيرة لهم لكنى ابدا ابدا لااعتبر ذلك مبررلشتم اى مخلوق حتى ولو اختلف معه ... لان ذلك لم يكن ابدا منهج النبى صلى الله عليه وسلم فى الاختلاف والخلاف فحاشا لله ان نبعد عنه والا مانقولش بقى اننا بنحبه

* حينما ارى انى لااستطيع الحجاب ولا اريده هذا حقى لانه موقفى الذى ساحاسب عليه (مع كامل اعتراضى ) لكن هذا لايجعلنى ابدا انفى هذا الفرض وادعى ان الشعر ليس من العورات وبالتالى لايجب اعتبار تغطيته فرضا ... لا ...عيب لا يليق ابدا .. رايكم انتم احرار فيه لكن لاتبرروا ان الحجاب ليس فرض ... لست ابدا مع من كانوا يفرضون الحجاب على الناس .....افرضه على بنتك اختك زوجتك لكن لاتفرضه على انسانة هى شايفة انها صح انصحها وخلاص ...وكل نفس بما كسبت رهينة ... لكن مش عشان نثبت اننا مثقفين نقوم نهدم ركن ركين من الدين ...وبعدين يعنى اللى بيحاول يثبت انه مش فرض تاعب نفسه ليه اوى كدا ؟؟؟؟ مش هو رفضه مايحتفظ به لنفسه ؟؟؟؟؟؟
ليه بيحاول يضرب اللى يخالفهم فى حاجة ماهم الا منفذين لها .......... يعنى عشان انا مخصمة بهية مثلا اقولها انا بقى شايفة ان نقابك ده حرام ومش مفروض تلبسيه !!!!

* انا لست منقبة ولا تسمح طبيعة حياتى بالنقاب ولاافكر فى ارتدائه ولكن هذا لايجعلنى ابدا أحقر سيدة ارادت التقرب الى الله بعمل اكبر منى كثيرا وكانت بالشجاعة التى لم امتلكها بان تمارس حياتها وهى بكل ذلك التحفظ الشديد والذى لايتوقف على كونه ملبس بل سلوكا عاما يغلف كل حياتها ... لماذا لم تهاجم صاحبات المايوهات ولا يعنى هاجمت حد من اللى مبين كل جسمه وماشين لاحول ولاقوة الا بالله ... ماهو من حقهم برضه يمارسوا اسلوب حياتهم بطريقتهم (مش هو ده المقياس ؟؟؟ مادام مفيش سلطة تمنع شكل اللبس و كمان ومش من حق اى حد يمنعه.... لان الله سبحانه اعطى مواصفات وليس شكلا محددا ... ماهو انا اذا قررت انى اتنقب ماهو حقى برضه انى امارس دينى بالصورة التى اراها صحيحة ماروحش اشتم بقى فى خلق الله لانهم مش لابسينه ولا اتشمت فيهم عشان موقف او اخر حصل لهم ...

* انا ماليش دعوة باللى بيحصل فى البلد قولوا سلبية قولوا انانية مخها علبة سردين فاضية مش مهم بس انا مش بحب اتكلم فى السياسة وبكرهها كره العمى ولا ممثلين ولاكورة .... لكن دا دينى والحجاب فريضة ومفيهاش كلام فى بقى حد مش قادر عليه ...يبقى الله يقويها ...فى حد رفضه ... يبقى على نفسه ويتحمل امام الله تبعاته ..لكن الكلمة مسئولية ...

* رأيت فيما مضى اساليب الشتيمة والردح وناس جاتلها هيستريا شتيمة ووصلات ردح وناس اصيبت بازمات نفسية عشان تثبت انها على حق ........ ك:::::::::::::::::ل ده مش قضيتى ولا احب التدخل فى تلك الامور ... ولا يخدنى حد حكم ولا شاهد لان حتى فى حياتى اكره الجدال والتخاصم والمشادات لكن احنا هنا حنولع بجاز مطين لو سكتنا بقى على ديننا ...
اعدين نقول الدنمارك وهولندا وزفت الطين امال يعنى فين بقى ؟؟؟؟؟ فين بقى ابسط حدود ديننا الذى يجب احترامها ...فين بقى الحريات ... والثقافة ... وحب الدين وحب النبى فين بقى ؟؟؟؟؟؟؟؟


* اختى ... تعرفين انى اقصدك ... ممكن نختلف ... ممكن نكره بعض ... انا مثلا لى مواقف نيلة جدا مع بعض الجماعات لكن ده مايدينش الحق انى اشتم فى اللى يختلف معايا ... ولا انى على سبيل مخالفتهم ارفض حق ... ارفض اساس ... ماينفعش يا ستى ماينفعش
مش عشان انا مثلا اتطلقت يبقى كل الرجالة ولاد ستين فى سبعين .... مانا لو مشيت بالاسلوب حخسر وكتير وناس كتير بتحترمنى وبتعزنى ..ليه ؟ ورايى فى الحجاب ولا فى النقاب ماخليه لنفسى ليه اعتبره سلاح اهدد بيه كل اللى يخالفنى ؟ مش كل ست منقبة ولية من اولياء الله ولا هى فرضت عليكى ولا على النقاب ... حقها تمارس عقيدتها بماتراه يرضى الله وبرضه مش كل ست مش محجبة ست مش محترمة حاشا لله ...لكن ده مايمنعش انها لم تقم بواجب الله عليها .. وبعدين محدش عارفة حتختم لمين ؟؟ يعنى فيه فرق انا مش عايزة بس هو حق وبين لا بقى مش فرض ....... وبعدين اللى يبتكلم فى الدين لازم لازم يتحمل وزر كبير مادام بيفتى بدون علم

* اختى حبيبتى اذا انا فى مكانك احب حد يرفق بيا ويوجهنى بطريقة كويسة للصح ..فيعلم الله انى مخلصة فى النصح لك ..... لكن الحجاب فرض رغم انفى وانفك .. مش عافية والله بس لان الله سبحانه فرضه .. اما بقى هو نقاب ولا طرحة ولا خمار ولا اسبانش ولا اى استهبال دا كلام تانى نرغى فيه براحتنا ... الشعر لازم يدارى ... يتحرق العالم كله مادام مش ماشى على اللى ربنا امر بيه المهم قلبى يرتاح باتباع امر الله
مش عايزة تتحجبى دى قصة تانية .......
اللهم ارنا الحق حقا وارزقنا اتباعه وارنا الباطل باطلا وارزقنا اجتنباه..... امين يارب
وابعد عننا الفرقة والتفرقة وارزقنا حبا فيك وفى نبيك يمكن نرجع تانى خير امة

هارى بوتر ...وانا وانت

من منكم قرأ هارى بوتر ؟؟؟؟؟ للكاتبة الرائعة (ج. ك. رولينج)

لالالالالا ليس الافلام باجزائها السبعة لالالا

الكتب

بغض النظر عن ارائنا حول نوعية الكتابة واختلافنا او اتفاقنا حول اهمية قراءة هذه النوعية من الادب ...الا أن ذلك لايمنع ابدا ان نعترف بانها كاتبة ذات يد خبيرة وعلى دراية كاملة بماهية القص وكيفية اخذك فى عباءتها السحرية متحدية كل قوانينك التى تعرفها الى عالم عجيب يفاجئك طوال الوقت وان كنت تعود منه لتحس ببديهية الامور فيه بمقاييسه، طبيعتها النسائية- المحببة لى – جعلتها تتعمق فى التفاصيل(وهو مااعشقه حتى ارسم الصورة كاملة )ومهما تشعبت تعود فتمسك باجزاء الاحداث وتشبكها ببعضها بمنتهى السلاسة وكأنها تغزل كنزة صوفية (كما تفعل مولى والدة رون كل عيد ميلاد ) ربما يعيب على البعض دائما ميلى لقراءة ادب الاطفال ولكن هذا مايجعلنى دائما احتفظ بتلك الطفلة الرائعة بداخلى (والتى عادة ماتقوم باشياء خبيثة تؤرقنى )لكنها تلون حياتى بصخب البهجة وتبعد عنى اشباح (الديمنتورات) التى تشيع اليأس وتدخل البرودة فى القلب ...كما انى مغرمة بالادب منذ نعومة اظفارى(مؤدبة ..مؤدبة ) وتشدنى اى ورقة مكتوب عليها بحبر وبعد القراءة اقرر ان كنت اكمل ام لا........ كما أننى مهتمة بكم القصص التى تصدر لنا من الخارج واشعر نحوها بتوجس شديد .. بنظرية المؤامرة المعتادة ولكن هذا لايمنع انى استمتع اكيد وانى افضل قراءة (جين اير) على رؤيتها ..اشعر ان الممثل يسحب منك كل وسائلك الدفاعية التى تحصن بها ابطال قصتك ..ان قراءة القصص تعطيك عالما بديعا من الخيال.... ولكنه زائف لامحل له فى الواقع ....وهنا تكمن الخطورة ...وكم صدمت حينما كبرت ودرست الادب العالمى واكتشفت ان كاتبة جين اير كانت متعصبة وكانت تشير الي احدى بطلات قصتها بالفاظ سيئة قبيحة..لاتليق بما رسمت لها فى مخيلتى

بالفاظ لاتتناسب و جو القصة الراقى والذى يقوم على التحدى والعزيمة والتضحية واشياء كدا كبيرة ..كانت الكاتبة ابعد ماتكون عنها فى حقيقة الامر...هنا تكمن براعة الكاتب حينما يخفى نفسه تحت ستار الاتقان كما فعلت بنا (رولينج )وادخلتنا عالمها السحرى بكل تفاصيله الدقيقة وكما فعل نبيل فاروق من قبل وجعلنا نصدق مهارات رجل المستحيل بكل تلك المعجزات التى تبدأ ب(وفى جزء من الثانية كان يدور دورة حول نفسه فى طريقة تتحدى كل قوانين الجاذبية .............) تعب اعصابى جدا رجل المستحيل ده ..كرهنى فى نفسى ...وانا ارى (منى ).. صديقته وهى لاتملك الا الصراخ وان تكون مختطفة طول الوقت ...وهى ضابطة المخابرات المتمرسة والتى نادرا ماتقوم بفعل غير استخدام حنجرتها ..

الفكرة ان هارى بوتر لم يكن له اسقاطات دينية كما هو متبع انما على حد فهمى الضئيل الامر ماهو الا أم ارادت اسعاد ابنتها بتأليف قصص خاصة بها فقط (انظروا الامومة )وهارى هو طفل ارتبط بكل الضعف الانسانى الجميل ولكنه ورغم يتمه ووحدته عزيز بحب اصدقائه (رون )صاحب الشعر الاحمر والذى تقبله ببساطة وحب وظل وفيا له رغم جبنه الخادع والذى يخفى قلبا جرىء حينما يمس الخطر من يحب وكذا( هيرميونى ) شعلة الذكاء المتقد والقارئة التى لاتكل ولا تمل....

ما اردت قوله ان رولينج اظهرت ان فى هارى بوتر جزء لايتجزأ من روح (فولدمورت ) الشرير ولكنه رغم ذلك يكافحه ويقتله وقد يكون فى ذلك هلاكه ايضا وهو يقضى على جزء منه ولكنه يختار الخير فيه ويختار احبابه حتى دون ان يعرفوا بتضحيته ... (فكرة بسيطة تجدها فى كل منا ايهما تختار ان تكون قويا بالزيف والشر ولا ضعيف بس مع كل مااحبوك وقد يكون فى ذلك حتفك )..لكنها تظهر ان الامر اهون كثيرا من ان تختار الشر فسوف تعيش فى الناحية الاخرى من العالم مقهورا مذلولا مدحورا ليس معك احد من احبابك ..وحيدا بائس منتحب ... نادم لا يملك احد لك شيئا ...لم يظهر الفيلم اى من تلكم المعانى ... ولكنك تجده يركز على الابهار فى الصورة وعلى تفوق هارى وهو مالم تظهره الكتب فالصفحات فى الكتب ممتدة طويلة فى معاناة هارى وفى عجزه عن حل الغاز كثيرة وفى تردده البشرى المعتاد وهو مايقربه منك وهو والذى اختزله الفيلم بالطبع حتى يحافظ على شكل البطل الذى لايقهر ..والذى لم يظهر ابدا فى الشكل المقروء وقد كنت قد رأيت اول الاجزاء قبل ان اقرر قراءتها حتى ارى الكاتبة جيدا ... والحقيقة تقال انها تفوقت على نفسها فى اخر جزء...فقد كنت آمل فى الاجزاء الاولى وكانت باسلوبها تجاهد فى الوصول الي ولكنها مع نهاية الاجزاء يأخذك الاسلوب فتهيم على وجهك بين السطور متعجبا من تلك الاحداث الدقيقة لحياة كاملة وعالم كامل مبهر وغريب لكنه محكم ... لم يكن فيه هارى بوتر البطل الذى لايقهر بل هو الانسان الذى ترتعد فرائسه حينما يواجه الخطر وتسقط الاشياء من يده (كما نفعل جميعا مع رؤية طرف صرصار طائر) ولم تكن هيرميونى بكل ذلك الوقار بل هى الانثى التى تغلبها مشاعرها فتبكى وتخاف على حبيبها فى احلك المواقف وتخاصمه حينما يتركهما وتعذبه بضيقها ...لم يكونوا السوبر كما تصورهم الافلام ..ولا اعرف لماذا يهوى الناس حول صورة البطل الذى لايقهر وكأنه الحلم الخفى لعقدة بشرية قديمة ؟!! مع اننا جميعا نحب بطوط فى افلام وقصص والت ديزنى وهو البطل الخائب صاحب الاخطاء المتكررة والمغرور الذى يدعى فهم كل شىء ... فلما هذا التفخيم للاعبى الكرة او للممثلين وكأنهم حينما يقومون بتمثيل عمل ما كانهم اصبحوا الملائكة التى تسير على الارض ويطيب لنا التماس الاعذار لمن نحب منهم ان هم فعلوا شيئا على غير مايجب !!!!!!!!....نعليهم ثم نملهم ونعود نبحث عن غيرهم...!!!!!!!!!

اننا فى ظل مانحن فيه من خيبة وبلاهة وريالة حول كل ماهو مبهر بننسى حاجات كتير مهمة ...بننسى طبيعة الاشياء التى تحمل دائما وجهين او ربما ماهو اكثر ...ننسى مانحن عليه وماكنا فيه ..ومايجب ان نكون عليه ...حتى التفاهة لسنا قادرين عليها ...لسنا نحسنها ... حتى اننا لم نحصل مجرد قصة كانت بترويها ام وحيدة لبنتها التى لم تكن تملك ان تشترى لها كتاب

فين ابطالنا ؟؟؟ وليه قصصنا ميتة مافيهاش روح ؟؟؟!!! وتقيلة على قلب الاولاد وقلوبنا قبلهم ؟؟؟ فين الهمة ؟؟؟ فين اخلاصنا ؟؟؟

...........

قصص... افلام ... تلفزيون... ممثلين ... لاعيبة كورة ........ كلام x كلام

وبس

حتى الكلام لانجيده ... حتى الضحك على الاطفال لانتقنه ... أى عار ... أى خيبة دى

تحياتى اليكى ج . ك . رولينج

بجد بجد انت اكثر همة

الاحظتم هذا؟ ..هذا مجرد رأى... ولكم المايك كلى ودان

ويبقى الحب ...رغم ...

السلام عليكم

زارتنى احدى قريباتى واضطرت للمبيت عندى ، اعرفها منذ صغرها ..شخصية غريبة شديدة التعقيد ،عنيدة.. متبجحة.. برئية .. متنمرة..ضاربة بكل عرف او اصل من الاصول عرض الحائط .. لسانها زالف .. جميلة ..متغطرسة ... حنونة ..شرسة ..سليطة اللسان.. لسانها سابق على تفكيرها ... كريمة ... طماعة ...تحتار فيها

لكن فى النهاية تسيطر عليك مشاعر مختلطة بين الضيق منها الحنين اليها ويعلو عليك صوت يجنبك التعامل معها ..الا انك تحن بين الوقت والاخر لخفة دمها المنقطعة النظير ...ودعاباتها المتوالية التلقائية بعفوية شديدة تجعلك تسقط خائر القوى... وشدك الذكرى بقوة الى جانب تحسه فيها كلما جلست معها.

ماأثار دهشتى انها مع كل ذلك تزوجت ومن شخصية كلنا نقدرها ..رأى فيها مالم نره........ حبه لها مضرب الامثال ... صبره عليها ودفاعه عنها لانظير له

عادة مايتهم بالتخاذل والضعف وانه كذا كذا ...لكنه لايبالى ابدا ... يجاهر بحبه لها رغم كل افعالها والتى كثيرا ماتسبب له الحرج فى اعتى المواقف وهو صاحب السمعة الكبيرة.... ورغم امتعاضه الواضح الا انه لايعنفها وانما يلقى باللوم على شيطانها الذى يسىء الى شخصيتها الرائعة بهذه التصرفات الحمقاء ..... الغريب ان حبه لها وايمانه العميق بمكنوناتها التى لم تظهر لنا ابدا ولا لاحد غيره ...قد بدأ يتحول الى حقيقة واقعة ... لمستها حين بياتها عندى تغيرت كثيرا ... ربما ليس بالقدر المطلوب لكنها تغيرت وكفى بهذا تحولا غير عادى لمن يعرفها ... وانجازا غير مسبوق ... كانت فى البداية لاتحبه لكنه باصراره عليها انجذبت اليه ..اختبرته كثيرا ..اذاقته الوانا من السفه والتعالى ونزقة الخلق .. وتحمل حتى لانت وسكنت وان لم تغير كثيرا من طباعها لكنها دائما ماتردد ان ذلك يضايقه ولابد لها ان تتوقف عن ذلك حتى لايزعل !!!!!!!

جميل هو الحب الذى يؤمن بك فى اسوأ حالاتك الانسانية ... وانت واه مشوه الملامح ..قبيح كاحدب نوتردام ... وانت مصاب ببرص ..او بهاق ينفر الاخرين منك ... جميل ان تجد من لايتأفف عند تقيبل خدك ... يحبك كما انت فى كل حالاتك ..ولا يكون كالمطرقة التى تقرعك طوال الوقت ... اهو الرهان عليها ...؟؟؟؟؟؟؟ ام الصدق الشديد فى حبها ؟؟؟؟؟؟ ام هو اليقين بالانسان الذى تحبه حتى وان لم يكن فى جمال الاساطير ولا فى حلاوة القصص الطفولية الساذجة باحلامها الرائعة دائما ؟؟؟؟؟

هكذا الحب اعلاه فى نظرى ...سعدت بهما جدا ... ولكنها حينما ايقظتنى فى الثالثة صباحا لايقاد السخان لها كدت ان اطرددها من بيتى شر طردة وانا العن سلاسفيل اليوم اللى عرفتها فيه

لكنه رغم كل هذا تستحق الحب لجانب لانراه ولكن نشعره لاتجده تجاه المثاليين الرائعين بوجوههم الفائقة الجمال ولا لحسن ونماقة حديثهم بل تجدهم من تحب فقط من تحبهم وسط ضيقك منهم ونفور كل البشر عنهم.. حينما تختبر نفسك فى تذكر ملامح شخص صديق تحبه ...فانك وللعجب لاتستطيع وصف ملامحه كامله وانما دائما ماتصف (طيب ..حنين .. وشه بيضحك دايما ..بسمته رائعة ...لسانه سكر ...قفاه وردى ) .....و يبقى الحب دون ملامح الا ماتعكسه روحنا وماتراه من ارواحهم الحبيبة

اهداء لكل منبوذ

نهاية الاسبوع

نهاية الاسبوع:-

لحظة:

السلام عليكم ...

اصابنى نوع من القلق الكتابى ..وهذا لااحبه ... اصبح هناك تجاوب من الناس بعيدا عن موضوع المدونة الاساسى ... فى كتير من المدونات اصبحت تبغى الاعداد وتتبارى فى كمها ..ودا غريب اوى ... المفروض ان المدونة مساحتك الخاصة ..ليس لها شكل واحد لانها بتاخد شكلك ..ومودك ... وتعبر عنك فى كل احوالك

...ومتهيالى دا لايناقض بعضه ابدا ... المدونة بالنسبة لى ليست كمًا يتجاوب معى... ومن معرفتى لنفسى لو نزل عدد زوارى وضيوفى الاعزاء للصفر بردوا حاكتب (غتاتة) ... لانى بتخيل دايما كلامى متعلق فى صفحة فاضية فى السما ... بيبسطنى بس برجع اخاف .. انا بتكلم كتير والكلمة مسئولية .. ودى مشكلة

لذا لحظة ...

اجدد النية من تانى ..واحسب حساباتى

موقف الاسبوع :

طفل صغير جاء الى يقول :

- استاذة ؟

- نعم ؟

- انا بطلت اخلى اختى تفتح الباب وبقيت انا اللى افتحه .. انا كدا بقيت راجل ؟

- ايوة .... اما بنبى بيت بنبى طوبة وبيكون خلص ؟

- لا

- بالظبط .... كل ماتعمل حاجة فيها مسئولية حتحط طوبة جديدة المهم انك بدأت

- طيب هو انا لو بقيت راجل مش حينفع ابوس حضرتك

صدمت وتنبهت لما يقصده

- مانا حلحق ابوسك قبل ماتبقى راجل وتخلص البيت كله

- انا بحب حضرتك اوى انا اسف حضرتك قلتى لازم نعمل حاجة نقول بيها بنحبك ومش نتكلم بس ..بس بس انا كنت عايز اقولها

- لازم تقولها لانى لازم اسمعها منك عشان اتأكد انك بتحبنى ..انت حاسس انى بحبك انا كمان

- اه بس حضرتك بتحبينا كلنا ... عشان كدا انا عايز اكون رجل بجد عشان حضرتك تحبينى اكتر

- ................................

- بس انا بحبك اكتر دلوقتى لانك بتحبنى اكتر

يسارع الى ويضمنى

قبلة لن انساها وحضن كنت بحاجة اليه ...

*******************************************************************

اى اثر نتركه فى هؤلاء الصغار دون ان ندرك ؟!!!!!!!!!!

*********************************************************************

احلى ماقرأت هذا الاسبوع :

من لم يجد فى قلبه زاجرا فهو خراب

**************

لا حرام علينا الا نظرة تقتضى بيننا حجابا
ولا مكروه علينا الا فكرة تحدث فى القلب سرابا
فالجحيم مع الشهود مودة والنعيم مع الغفلة عذابا

************

اما والذى قد قدر البعد بيننا وعذبنى بالشوق وهو شديد

وخصكم بالصبر دونى وخصنى بحزن عليكم يبتدى ويعيد

وصبرنى مهما شممت نسيكم أشد لقلبى راحتى واميد

لقد ذاب قلبى من دموع عليكم على انه فى النائبات جليد

فيا ليت شعرى هل على ما لقيته وكابدت من جور الفراق مزيد

لئن عاد ذالك الوصل او عاد بعضه وملتم اليه اننى لسعيد

على انها الاقدار قد تبعد الفتى قريبا وقد تدنيه وهو بعيد

****************************

أغرب خبر

لم يعد مايثير استغرابى ولا دهشتى اتوقع اى شىء

*********************************

اصعب وقت

حينما يمر الوقت بك وانت تراه ولا تستطيع ان توقفه لحظة حتى تستعيد مافاتك

***********************************

الحدث المفاجىء

ارتباط احدى قارئاتى العزيزات بمن طلبت مشورتى فيه

(كونى انتى فقط ولا تخافى ... الحب لم يعد مجرد ورود حمراء )

مبارك حبيبتى

*********************************

خبر سعيد

استقرار حالة قلب امى المضطرب .... ورفضها للعريس قبلى (مجاملة لى باين)

حجوجة

اعلم انك تقرأين

لذا

انا عايزة اقولك حاجة

ياترى

يعنى

دلوقتى

اقدر

اطلب

..أ....أ...

صنية سمك محترمة من ايديكى

هههههههههههه

واحدة بواحدة عشان تبطلى تخضينى عليكى

بوسيلى بابا ..ولكما احب الناس واغلاهم واقربهم قلبى الذى طاب بكما

تريد اباها

@@@@@@@@@@@@@@@

تبا للعالم كله

@@@@@@@@@@@@@@

استعرت هذه المقولة من مقالة ا\ اشرف عبد المنعم فى اهرام الجمعة

******************************

نعم تبا للعالم كله اذا ماتغنى بالتحضر والمدنية وهو يكيل بمكيالين

تبا للعالم كله

****************

تبا للعالم كله اذاما كانت التقليدية العمياء فرض علينا تسلب منا ابسط حقوقنا فى التفكير والتغيير

تبا للعالم كله

*****************

تبا للعالم كله اذا مااصررنا على ان حلول ازاماتنا سوف تأتينا من هناك وليس منا قبلا

تبا للعالم كله

******************

تبا للعالم كله اذا مااعطينا الدنية فى ديننا او كنا كما نحن باعدادنا تلك وليس فينا رجل رشيد

تبا للعالم كله

********************

تبا للعالم كله اذا ما وجب علينا اصباغ لون الحضارة المزعومة على مناهجنا وخطابنا الدينى حتى لانتهم بالتخلف والارهاب

تبا للعالم كله

********************

وتبا لنا ان لم نعلنها قوية واضحة بان هويتنا انا مسلمين وان الاسلام ديننا وانا اهل له ومن لم يعجبه فليشرب من المسيسبى اذا لم يستسغ النيل

تبا للعالم كله

*********************

تبا للعالم كله اذا ماظل شعب يموت تحت سنوات من دفع ثمن الغباء او الاستهبال او الشعارات الخائبة

تبا للعالم كله

****************

تبا للعالم كله اذا لم يعد ابو هذه الطفلة ليعتنى بها

تبا تبا تبا للعالم كله

******************

تبا للعالم كله اذا ماتخلى كل جنس عن هويته وخلقه ليفتخر بشذوذه ونتن رائحته ويجمل قذاراته بالوان من الثقافة والرقى الذىلن ينظفه مهما حاول

تبا للعالم كله

*****************

تبا للعالم كله اذا ماظللنا نقلد دون فهم او وعى او ادارك او انتقاء فتلبس الفتاة ذيل قرد مرفوع ويلبس الشاب بنطال شاذ يعلن به عن نفسه حين يتساقط اسفل ركبه

تبا للعالم كله

*******************

تبا للعالم كله اذا كان رأيه العام هو لا وكان للقدر نعم ...وان كانت الموضة نعم والدين لا..والعهر نعم والطهر لا.......

تبا للعالم كله

**********************

تبا للعالم كله اذا مامات من فى جواتيناموا ومعتقلات اسرائيل ومجاعات الصومال وجنوب السودان وكشمير وكردستان وازربيجان والعراق .......... دون ان يسمع له صوتا

تبا تبا تبا للعالم كله

**********************

تبا للعالم كله اذا ماسكت عن مس اسم نبى الرحمة الذى به شفاعتهم الكبرى

تبا للعالم كله

*********************

تبا للعالم كله اذا ما وقف ضدى أو ضدك وأنت بالله كائن

تبا للعالم كله

**********************

تبا ثم تبا ثم تبا

لمن استمسك بالشقاق و بالخلافات المذهبية او السياسية او الاجتماعية وترك وحدةالا اله الاالله محمد رسول الله ونصرهم بالخلاف

ولا عزاء للسيدات