لُقطة (بضم اللام)

السلام عليكم ورحمة الله وبركاته

ازيكم دام عزكم

والله والله وحشتونى جدا جدا

كان بودى أن أتى لكم بيومية سعيدة ونهاية اسعد ..لكن ما باليد حيلة .سى لا فى

هذه هى الحياة سيدى اللورد دى كونت

ايه اللخطبة دى ؟؟؟؟

لا ... ماهو اللى انا شفته يلخبط اكتر

اسمعوا

فى اثناء المرات العصيبة والتى بحمد الله ومنته مرت دون خسائر تقدم لى عدد من

العرسان والحقيقة انهم لايصح اطلاق اسم عرسان عليهم يصح عرس

المصيبة انهم بيتعاملوا من منطلق ثقة غريبة جدا والاغرب انهم ليسوا اغراب بل منهم

(افرحوا افرحوا ) زوج صديقة امى طاطاطاطاطااططا

نعم وهى تكبر امى بعشرين عاما وهو يكبر زوجته بعشر سنوات

احسبوها انتم ......

كل هذا قد يكون طبيعى فى زمن العجائب هذا

قال لى زوج صديقة لى وانا صديقة لهم من سنوات طوال :(يا بنتى ماتكتئبيش هما

شايفنك لقطة !!!!!!!!!)

فقلت له : ازاى يعنى

فقال :انتم يا ستات بتحسبوها بمنطقكم انتم اما احنا يارجال لا

فاعتدلت زوجته قائلة : ايوة اتفضل وايه منطقكم بقى ان شاااااء الله؟؟؟

فابتسم وتجاهلها ووجه كلامه لى :لو عيزانى اتكلم ادينى الامان وغمز ناحيتها

فالتفت اليها :يا ستى اصبرى بس لما نشوف ايه موضوع المناطق ده ..اتفضل كمل

فقال :يا ستى واحدة لقطة موظفة من غير عيال اعدة فى شقتها اللى بتكع ايجارها وبتاكل

نفسها يبقى يسبوها ليه؟ !!!!! وبعدين صغيرة ومطلقة يعنى مالهاش مطالب لافرح

ولاشبكة ولا يكعون .. يبقى مايحاولش ليه ؟؟

رديت : اى والله اما انا عبيطة صحيح ..دا أنا لقطة لقطة يعنى

طاب دى اسبابه ..انا بقى ارضى ليه ؟؟؟

فرد باستغراب ..لانك مطلقة !!!

لاأعرف لماذا انتابتنى كريزة ضحك ادمعت عينى فيها ؟!!!!!!!!

والحقيقة أنى ما صدقت أن الرجل الغتت ده اتصل حتى اشبعته تكيلا ً

وحينما لاقانى زوج صديقتى ابتسم خلف مقود السيارة مائلا برأسه نحو زوجته وانا

احدثهما من نافذة السيارة : اوعى تكونى صدقتى ؟ والله بجد انتى لقطة

ضحكت :طبعا مانا عارفة اللى فيها خلاص

:لالالالا خالص والله بس بصراحة ناقص حاجة واحدة

:ايه هى ؟

:ان الشقة تكون تمليك مش ايجار تبقى اييييييييييييه

لكزته صديقتى بقوة اوجعته حتى تأوه

والحقيقة انى وددت لو كانت فى انفه

ومن يومها لم اتعجب ابدا من كثرة العرسان واصبحت اردد كثيرا واؤكد

شقتى ايجار مش تمليك ... الحمد لله انا مش لقطة

********************

مازلت اؤمن أن الامر ليس بهذا السوء وأن كل هذا ماهو الا خربشات سخيفة

تحرك ركود الماء ..ليس الا

هانت ماهى الا المئة سنة الاولى وبعدها نرتاح

لكم منى كل كل الخير والتحية