العيـــــــــــــــــــــــــــــــــــــد

حبيباتى واخواتى واخوانى من عيد علينا ومن مر وبخل بالسلام ومن انشغل عنا .......كلكم كلكم

كل سنة وانتم طيبين ..

.....................................

من ساعات قليلة انتهت اجازتى وعدت من بلدتى الساحرة المحيرة جدا ..يد التجديد تمتد اليها الان (ربنا يستر )

اسوأ ما فى الامر انهم يجددون الاثار ..والحقيقة اننى اجد هذا بله وعته لان الاثر قيمته فى لونه الحالك القديم

وليس فى الطلاء الحديث من سكيب ..حتى الذوق مفيش حتى الالوان فاقعة ياريتهم حتى يتقنون التزييف ..لكن ابدا

البيوت الجميلة اللى من مئات السنين على وشك الهدم حقهم يرمموه لكن الترميم مش معناه تغيير ملامح الاثر امال يبقى اثر ازاى ؟؟

يلا واحنا مالنا هى بتعتنا !!!!!!!!!!!!!!

*******************************

تحية كبيرة معطرة للحبيبات

ماجودة الغالية معلش سامحينى على ضيق الوقت ..الحقيقة ان الاجازة لم تخلو من كورس علاج مكثف كفرصة للجلوس فى البيت فى رعاية الاهل ولذا لم اتمكن من اللحاق بك وبالعزومة لكن ما دمتى اتسوحتى ماتيجى تعدى معايا كام يوم تفكى شوية ..فكرى

ميتو يارب يكون التوءم الامور بخير وحشتينى

جسر الى الحياة ابعتى ايميل الى عنوان ده بالطريقة اللى تلاقيها مناسب للتواصل سامحينى على التأخير والله لم افتح الكمبيوتر الا هذه اللحظة la3lahakhier@gmail.com

رفقة عمرى وحشتينى جدا جدا كيفك وايش اخبارك ؟

حبيبتى موناليزا تسلميلى يا قمر على اتصال دائم ان شاء الله اشكرك على الروائع اللى بعتيها

جنا اشمعنى الغريبة يعنى ؟ ليكى على ابعتلك الحبة اللى عندى لانى ماليش فيها استنى السوبر جيت وابعدى عن البصل انا بقولك اهه

عبير اختى الكريمة وانتى بكل الخير والسنة اللى جاية ان شاء الله فى احسن الاحوال كلنا اللهم امين

انسانة شوية شوية اسعدنى جدا مرورك بارك الله لك فى ايامك وملأها طاعة امين شكرا بجد على التهنئة

اخوانى غنيم وجنى سيد والمستنصر ومحمد عبد الغفار وانتم بكل الخير يارب دائما اشكركم

***********************

لكم جميعا منى التحية

ويجعل الله ايامكم كلها اعياد يارب وخير العيد عيد لقاء الله وهو راض عنا امييييييييين

كل سنة وانتم طيبين

انتظروا يوميات واحدة مطلقة فهناك الجديد

وعدا النهار

خلص رمضان خلاص ؟!!!!!!!!!

لكن مش مفروض تخلص طاعاتنا .. حسيتوا فيه بالبركة ؟!! شفتوا الكرم اد ايه ؟؟

اعترف لكم انى كنت اكثر الضيوف اكراما ..نعم ... اكرمت غاية الاكرام

لم يخلو بيتى من الاحباب ولم افطر يوما وحدى وكان اكثرها اكراما وامتاعا

يوم الافطار مع الايتام فى الجمعية

صديقتى سحر سيدة خيرة جدا قررت ان تطعم اليتامى افخر الاطعمة ..تلك التى لم يسمعوا عنها

وبوفرة ايضا وفعلا كان العدد كبير جدا ..اطفال يتامى وزاد عليهم الفقر فكانوا خليطا موجعا

اكلوا حتى شبعوا واخذوا عيديتهم واكل للاهل ووزعنا عليهم الاطعمة المغلفة الزائدة فقاتلوا بعض عليها

لن يشبع هؤلاء من يوم

لن يشعروا بالتخمة ليوم او لكثرة العلب معهم

انهم يخشون غدا

وهذا الد اعداء الايمان

ان تخاف رزق غد وهناك رب رحيم رزاق تكفل عنك بهم الرزق

لكن هؤلاء الاطفال واسرهم يحتاجون الى الشبع حتى يشعروا بالرضا

وعندما توجهنا للجمعية فى اليوم التالى لالباسهم ملابس العيد حصل عجز معنا فاضطررنا ان نبحث فى الملابس المستعملة

وللاسف لم تكن بجودة ما اخذه اصحابهم فكانت كارثة

نظرات الحزن والخيبة على وجوههم واحساس بالضيق الشديد يعمنا جميعا وتتصل بى صديقة عزيزة تعيد على فقلت لها مانحن فيه

فاخذت سيارتها ونزلت تشترى لهن مااردن وفى اقل من ساعتين كانت الفتيات كلهن قد ارتدين احلى ملابس عيد

طفت فى اليوم التالى فى عملى على كل الاقسام اقول لهم

عندما تخرجوا ملابس تذكروا ابنكم يقف يأخذها ليعيد بها فانظروا كيف تخرجونها

تذكروا جميعا طفل صغير ينتظر ان يختار مايلبس فى العيد وليس مجبرا ان يأخذ فقط ما يتاح له

فهذا اقل حق له

وليس معنى العمل الخيرى ان نعطى فتات طعامنا ولا هلاهيلنا القديمة التى اصبحت عائق فى دولابنا

اوليس هذه حكمة اخرى للانفاق مما نحب

ان يجد المحسن اليه اداميته وهو يلبس شيئا ليس منهوك اللبس .. فهو مثلك لايحب ان يلبس مالا تحبه انت

وان اخرجته فاجعله فى خير شكل فمن يأخذه انسان ايضا وله نفس

وان

كان

ما

زال

فقيرا

عيد سعيد

السلام عليكم
.......
ليس من طباعى الصيد فى الماء العكر ولا النظر الى الجانب الاسود من القمر ولا زحل حتى
...لكن
لفت نظرى فى حادثة الدويقة ورغم مأسوية الحادث والمشاهد المحرقة للقلوب ..الموجعة....
خاصة ونحن عاجزين لانملك الا الترحم والحسبنة طوال النهار حتى كادت ان تصبح احد اورادنا اليومية ... ورغم مناظر الغلب والبؤس وماراماك على المر ال الامر فالامر فالامر
الا انه لفت نظرى طرق الانقاذ عندنا وتذكرت حادثة العبارة الشهيرة ووصول فرق الانقاذ للصامدين بعد ساااااااااااعات من مقارومة الغرق ومصارعة الامواج والاستدفاء بالصقيع والثلج ..!!!!!!!!
تذكرت ذلك ولكننى املت وتمنيت ودعوت الله بحق الشهر الفضيل نكون اتغيرنا ونكون اتعلمنا حاجة واننا منشوشين عين ومنصابين (اه والنبى) ونكون بقى المرة حننقذ الغلابة اللى ربنا اعلم بيهم تحت الانقاض وكم واحد اتمنى انهم يلاقوه قبل مايلفظ روحه فى اليوم العشرومية ...واعدت اتخيل نفسى وانا مثلهم تحت الانقاض وقلت فى سرى يا ترى فى لحظاتى الاخيرة حيكون عندى نفس الامل ان تكون روح المصرى وعمره مهم عند بلده ولا حيتشتم عشان مالاقاش مأوى يلم لحمه فيه الا تحت الجبل ويحوط على نفسه بحبة صفيح يستر به نفسه ..ويتهم بانه جاهل وعشوائى وسايب فلته فى سفح الجبل ليعيش بين الزبالة
ماعلينا
الله يرحمهم
قدرهم
احنا مؤمنين
طيب وبعدين ؟
مرة شفت فيلم لمدة ساعة وربع على قناة ديسكفرى من كام سنة يصف فرقة انقاذ تنقذ حيوان الباندا من على احد الاعمدة وكيفية التنسيق والتخطيط والدراسة الفورية لظروف المكان لينقذوه يا حبة عين امه الله يرحم اللى خلفوها ..حيوان على عينى ورأسى
بس امتى بقى حنتعلم من الكوارث امتى مش حنكرر خيبتنا امتى
طاب انا عندى فكرة
ايه رأيكم نعمل كليات للمسعفين وللانقاذ بانواعه واحنا الحمد لله ماخليناش عندنا من كله
واهو مابدل الشباب مايموت كمدا وحسرة وقهرا يموت بشرف فى مجالات الانقاذ
وبعدين الحكومة مش حتتكلف حاجة كل سنة تاخد دفعة منهم ترميهم فى احد الكوارث دى يتمرنوا فيها
ولو ماتوا الله يرحمهم ويرحمنا بقى
رمضان كريم
كلمة كانت واقفة فى زورى سامحونى

تقبل الله منا ومنكم

يارب يجعله رمضان مقبول يارب
ونكون فيه جميعا من عتقاء النار المرحومين من عذابها امييييييين
حد حاسس بكل ذلك الكرم وتلك الرحمات التى تشملنا جميعا
حاسين بده كله؟
اللهم يارب الاكوان يا قدير يا على يا متعال لك الحمد والشكر ان احييتنا معافين بعد سقم وقدرتنا ان نكون من الصائمين القائمين فاللهم اعنا وتقبل منا بقبول حسن يا اكرم الاكرمين يا ارحم الراحمين
كل عام وانتم بخير

الضل

السلام عليكم
وكل عام وانتم بخير جميعا قبل الاجازة الرمضانية من النت والاجتماعيات ..قلت اختم بتدونية طال شوقى الى كتابتها
************************************************
لى صديق لدود كبرنا معا وترتبت معنا عدائية عجيبة ..لانتفق فى امر ابدا ... تزوج كل منا ومضى فى حياته ثم عدنا والتقينا صدفة
تذكرنا ماكنا نفعله ببعضنا البعض وتبادلنا الاتهامات المعتادة بيننا هو يتهمنى بالعند والتحفز وانا اتهمه بالغرور والاعتداد المبالغ فيه
.......
وصمت كل منا وسألنى كيف حالك ؟ سعيدة مع جوزك؟
لااعرف لما كذبت وكأننى ادفع عن نفسى تهمة ما فى فشل زواجى قلت بلهجة الواثق (يا ولد) الحمد لله الحمد لله
نظر لى بتشكك شديد وابتسم ابتسامته المستفزة اياها :ايـــــــــــــــــه ؟!!!!!!!!
حمدت الله انى مازلت بالنظارة الشمسية وفق امر الطبيب صباح مساء ...
ابتسمت وقلت ابدا مش انت اللى كنت بتقول ضل راجل يا فالح اهو ضل
قال فى اسى لم يجتهد لاخفائه :يا خسارة كنت فاكرك لسه ثابتة على كلامك الفارغ بتاع زمان ده ...واضح انك اتغيرتى
استخففت كما كان يفعل معى فى الماضى ... طبعا يا بنى فى حاجة بتفضل على حالها
نظر لى وقال :لم تسالينى عنى يعنى ؟!!!!!!!!
قلت بهدوء :يا بنى انت ماتقعش الا واقف انت حتقولى وبعدين انت كنت ابعد واحد عن قصص الحب والكلام الفاضى ده ودايما تحسبها صح ..مش محتاجة اسالك يعنى
سكت ..وقال اه صح ..مش يمكن مايقعش الا الشاطر ؟
تجاهلت مايرمى اليه وتململت فى وقفتى وقلتله ياخبر انا اتأخرت ولازم امشى
سالنى مالك عنيكى لابسه نضارة ليه ؟ انت تعبانة ؟
هززت رأسى لالالا ابدا مجرد بس حبة تعب بسيط ومش متحملة الضوء ...يلا فرصة سعيدة اوى سلملى على مراتك وولادك
وتركته ومضيت
نادانى
لعلها ...
تسمرت ...ندانى بنفس الاسم القديم الذى اعتاد منادتى به
التفت اليه
انتى اللى صح يا لعلها انا كنت غلط
شوحت بيدى سلام
الحمد لله لم ير ماسقط من تحت النظارة
وصلت للسيارة وقادت هبة
سألتنى :
قلت لها :تفتكرى ايه الصح ؟
ضل راجل ولا ضل حيطة ؟
قالت قفشة كالمعتاد ونجحت ببراعة تحسب لها انتزاع ضحكة من قلبى
انطلقنا ونحن نغنى ... بايام البرد وبايام الشتا والرصيف بحيرة والشارع غريق
تيجى هاك البنت من البيت العتيق ويقولها انترونى وتنتره ع الطريق
.......................
.....................
لا يا هبة
ضل راجل .بس راجل مش حيطة اسمها راجل ولا راجل اسمه حيطة
.....
للحديث بقية
**************************
غدا الخميس العاشرة صباحا احتفالنا بالاطفال استعدادا لرمضان والعيد
الحفلة من 10 الصبح لصلاة الضهر بمسجد التوحيد

والله وصالحتينى يا اسكندرية

من أين لنا بتلك الالفة ؟!!!!!!!

ليس هذا هو السؤال .... انما السؤال لماذا لم نلتق من قبل ؟؟؟؟؟؟؟؟؟

صالحتنى الاسكندرية بعد سنوات من الشد والجذب بيننا بتلكما السيدتان ومعهن لاحقا رائدات المسجد ...........

لهفتها وهى تنظر الى الباب تنتظرنى ارجعتها سنوات وسنوات وكأنها طفلة صغيرة بشريطين روز تنتظر مجىء صاحبتها وهى تستقبلها ببوكية ورد وهدية اخجلتنى وهذا الحضن يا اللــــــــــــــــــــــــــــــــــــــــــــــــــــــــــــــــــــــــــــــــــــــــــــــه اعرفها والله يا ناس..ناهيكم عن جنى وخفة روحها ويا حبيبتى ادبها والله النت مش كله وحش فى ناس محاصلتش اهى

سامحونى لااستطيع التعبير فعلا افضل الاستمتاع بهذا الشعور الرائع

مجداوية احبك

جنى احبك مع فارق التوقيت :)))))))

موناليزا ونونو ونور حياتى وجنه ويوجين وفريدة وسلوى وصفاء وايمان وسول وعاشقة وامولة وعايزة اتطلق(بعد الشر ) هههههههههه وعشان خاطرى ماحدش يزعل منى فالادوية تنسى اسمى مش اسمكم المهم انكم جميعا احمد الله عليكم انكم بقلبى وكلكم كلكم

وحشتونى جدا وبعد ان اتماثل للشفاء تماما لكم منى رغى كتير وكل سنة وانتم طيبين

وباح البحر لى بالسر !!!

السلام عليكم جميعا

ازيكم ... يعنى وحشتونى شوية !! البحر ينسى الواحد الدنيا

الحمد لله كل شىء تمام

عندى اعلان هام

يوم الثلاثاء 12اغسطس الساعة 5ونص فى مسجد الايمان الشهير بقدورة

على محطة ترام رشدى بالاسكندرية نستكمل المحاضرات فعلى من ترغب (نساء )

يمكنها تشريفنا هناك

الدعوة موجهة لى من سيدات كن فى المعادى وحضرن المحاضرات ويردن استكمالها اثناء المصيف

التعارف لمدة نص ساعة ونبدأ من السادسة الى صلاة المغرب

............

الخبر التانى

............

الاستاذ احمد مهنا اتصل بيا وبلغنى ان تدونتين حينزلوا فى العدد التانى ودعانى

الى الحفل ... اشكره شكرا كبيرا وبالنسبة للدعوة فدا يتوقف على المشيئة وقدرتى الصحية التى بفضل الله جات على هوا اسكندرية وشطها

................

الرحلة جميلة بفضل الله ومنته فله الحمد والشكر على ما انعم وتفضل

.............

اشكركم كلكم على سؤالكم واعتذر عن عدم قدرتى على الرد لتحديد توقيت استعمال الكمبيوتر والتليفون

الى ان نبقى زى الفل ان شاء الله ونعود قرود تانى لكم منى كل المحبة والامنياتى الخالصة بان تنعموا باجازة سعيدة يارب

............

ايمان

اتصلت بك كتير ليه مش بتردى ؟ طمنينى عليكى بليز