تاج رفقة الله يسامحها مع شكرى
رجاء حار لامجاملات ولا تعليقات من نوعية اجاباتك تدل على ......... دى احلام مجرد احلام لكى تظل المدونة صفحتى التى اخط بها بما يعترينى وانسى احيانا انكم ستقرأون رغم حبى لكم ...
ليس هناك شىء من الماضى احب ان اغيره فهو قضاء الله فى ولولاه ماكنت الان... فمنه تعلمت واستفدت ...وتعلمت ان كل مايأتى به الله خير ...ما من مرض او هم واو حزن او ضيق الا وانعم الله على بعدها بهدوء ورفعة كبيرة
لااريد تغيير شىء الا نفسى ...فادعوا لى بالصلاح ولامى ولى بالشفاء
أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
خمس احلام ...اومممممممم
**حلمت بان رماح (حصانى) حيرجع فى صورة شاب..... امير حقيقى مش بعيد يكون صلاح الدين تانى ولا قطز
وانه يحبنى دونا عن كل ستات الارض..
ويكون عندى بيت على شط بحر ويكون بجنينة وانا وهو نختار تصميمه ونشارك فى وضع اول طوبة فيه وبعدها نقسم الجنينة اللى ورا الى حوضين مدورين واحد للخضراوات والفاكهة اللى حنزرعها والتانى للورد و الجنينة اللى قدام حنعمل اعدة جميلة ثابتة ونحط حوض ماية مدور للاولاد ومرجيحة تسعنا انا وهو
والدور الارضى له مدخلين من ورا ومن ادام اللى من ورا يودى على مضيفة يتحط فيها اكل يوميا لكل مسافر او عابر سبيل يمر ياكل ويشرب ويرتاح ويمشى ويكون فيه حد اعينه مسئول عن نضافتها وغلى الملايات يوميا وتكون خدمتها فوق الممتازة ومن الناحية اللى ادام فى المطبخ بتاعنا وفيه الريسبشن والمعيشة وحتكون اعدة مريحة ولونها بالالوان الهادية اللى تريح العين مابين الازرق والابيض والاخضر وفى اوضه واسعة جدا فيها اعدة عربى كلها مفياهش اى ارتفاعات وفى الوسط كوفى تيبل مناسبة للانخفاض والاضاءة خافتة فى الاركان فى شكل اسبوتات ارضية مغطاة بقماش كريمى تيل وفى الركنين التانين مكتبة طويلة لغاية راس الشخص بس مناسبة لارتفاع الشلت وتحتها ترابيزة نحط عليها الكتب والاباجورة الخاصة بالقراءة وجنبها نضارتنا ومبخرة وفى الركن التانى نفس الترابيزة ونفس الاباجورة بس عليها عدة الشاى والقهوة والمشروبات وكاتل كدا مناسب للديكور عشان اخدم نفسك بنفسك وجنبهم ترمس لطيف وتانك برضه متناسق الالوان مع جو الاوضه
وممنوع منعا باتا اللب ومااشبه او الاكل فى هذه الاوضه لانها لتلاوة القرأن ةالاوراد والاختلاء والخلوة الى الله بعيدا عن الناس ويكون الاولاد عارفين ان بابا وماما ممنوع ندخل عليهم وهما حد فيهم فى الاوضه دى لانهم لازم يكون لهم وقت مع الله من غير ماحد يزعجهم
وتحت كمان اوض نوم الضيوف وغرفة والدتى ووالدته ووالده والدى وفوق اوض النوم بتاعتنا وبتاعت الاولاد وحمامين والدور التالت اوضة المكتب الخاص به واوضة الخياطة والادوات الخاصة بيا واوضة القراءة ومكتبة كبيييييييييييييييرة
ومش حيكون بيشرب سجاير ولا بيحب ماتشات الكورة ولا بيحب السياسة ومش حندخل تليفزيون البيت وحنربى الاولاد بمنهج واحد وحيسيبلى امور البيت ومش حيخوفنى من السواقة ولا من الشارع وحيشجعنى ولمااخدرأيه لما اعجز اعرف انه مش حيتاخر على برأى حكيم وحنعد بعد المغرب نحكى ونتشاور كل البيت زى بابا ماكان بيعمل وحيأخر العشا ء لاننا لازم ننام بعد صلاةالعشا علطول
حلمت به اخ كبير وصديق وحبيب .....احلام بنت مشروعة
ودى مش حغيرها خالص .....
....................................
***حلمت اكون صحفية شجاعة جداااااااااااااااااااااوانى حيكون معايا واحد عبقرى كمبيوتر (كان طليقى كده بالمناسبة)ويكون شكل سامى يوسف (وكان كده برضه)وده قبل مايظهر اصلا سامى يوسف ويمكن كان ايامها ماتولدش بس دى كانت ملامح فارس احلامى
ودى حغيرها بقى (لانى اتأكدت ان الحكاية مش بس ملامح)
***حلمت اكون كاتبة كبيرة اعمل كتاب للاطفال عن شيخ كبير وله ولد وبنت تلاميذه عطالهم اسار كتير ولازم يلفوا يجمعوا فنون الحكمة السبعة وفى المقابل بقابلوا مشاكل وصعوبات كبيرة لما يكون العدو هو انفسهم وازاى بتغلبوا كل مرة عليه
** حلمت انى حكون تلميذة نجيبة لاعظم استاذ فى الارض ...وانه حيعلمنى ويدينى الحكمة وخلاصة كل العلوم .... (وحصل لكن ماكنتش نجيبة ولا نيلة )
**** حلمت انى حكون اول ست فى جيش يرجع القدس والاندلس ويدخل لغاية الاسكيمو شمالا ولغاية جنوب افريقيا جنوبا ومامتش الا لما اشوف راية الاسلام فوق كل شبر على وجه الارض ...ساعتها تهون كل الدنيا
******************************
أذكر خمس أحلام على الاقل ..تخص مستقبلك
@الحج والعمرة واعيش فى المدينة شوية
@@ السفر الى استاذى واستاذتى والقضاء مدة لابأس بها اشبع منهما
@@@ احقق لماما وبابا حاجة واحدة من اللى اتمنيت اعملهلهم ....
@@@@ الف العالم مع .... مين مش عارفة ومش فارقة زوجى ولا اخويا عصام حبيبى اللى دايما بيعوض الوجود الذكرى فى حياتى اقربها الموبايل بتاعه عطهولى عشان بتاعى اتسرق واخد العرة اللى كان معايا (اهو ده الحب) ولما بياخدنى سنلترو ونتمشى على الكورنيش فى اسكندرية ويمسك ايدى واطلع امشى على السور وهو بيضحك(حد يصدق ان دى اختى الكبيرة يا جدعان يلا يلا جرسينى جرسينى )
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
نعم ... شيخى استاذى ومعلمى ... وهبة صاحبتى
*********
أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا
شيخ عبد الرحمن رحمة الله عليه ومعلمتى السابقة رحمة الله عليها ....... ورماح
اهدى التاج لموناليزا
قيثارة
اه وكفى
مجداوية
ميتو
داى دريمنج
مفقوعة
ابى
روفى
يوجينى
الباحث عن الحقيقة
الخايف منها
الفارس
الصباغ
ام احمد
صبرنى
فاتيما
فرى هارت
ماعلينا
ويسبرز
الطائر الحزين
هدهد
شريف
انا مذنب
الريسة
كلمات
مهند
امولة
دكتور حر
غنيم
شيماء
مروة الزارع
هيومن
محمد عبد الغفار
فريدة
يقول انى امراة
جسر الى الحياة (التى وحشتنى)
عمر المصرى
عسقول
انسانة
يارب افتكر ...دى مش مدونة دا نا بكلم نفسى
ليسامحنى من لم تسعفنى الذاكرة فيا لحسن الختام
كل من يعلق عندى ويريد التاج شيلوه بسرعة
.jfif)
.jpg)
المشاركات
هناك 41 تعليقًا:
السلام عليكم
مبنساش احساسي الأول بقصة رماح -رغم خوفي من كل ما يمشي على اربع- بس كنت دايما بعدها بشوف صوره رماح في كل حصان
بس بيتهيألي بعد كده مش هشوف غير صورة الامير أو بالاصح البيت الــ " دورت كتير ومش لاقيت وصف مره كتبت الاسلامي ومره كتبت العصري الاسلامي بس مش حاسس ان ولا وصف بيعبر يمكن يكون البيت الدافي معبر"
تحياتي
على الهامش انتي في حلم هربتي بيه من الاحلام اللي تخص مستقبلك
أحلام مشروعة
ولكن ليس المهم أن نحلم وفقط ولكن الأهم أن نحلم ونحاول أن نحول أحلامنا إلى أهداف نحاول تحقيقها ..
لي رأي في موضوع التاجات أول مرة أعرضه .. فأنا أحس أن التاج وسيلة لقنص أفكاري فأكون مضطر لعرضها لذلك أهرب دائما من الإجابة عليها ..
لك كل التحية وخالص الشكر
said
انسان مقيد
اهلا بيك..رماح لو تعرفه مش ممكن تخاف من حاجة ... مر على كتير بعده ..لكن كنت خلاص اتعلمت لاخوف من اى شىء ...(وان كان ده احيانا صعب ) رماح مش حصان بس بدليل انى مش مهتمة اوى بحياة الحيوانات ..لكن رماح كان منحة من ربنا لى ..ولما سألت عن بيعة الخيول يمكن الاقي له ثغرة .. لاقيته كان بيعاملنى كأنه ...مش عارفة عارف (ذا بيوتى اند ذا بيست ) عارف الوحش اللى جواه انسان رائع ... كان ده احساى برماح ..مش العكس
احترامه للحظات القراءة بتاعتى وجلوسه بجوارى صامت ساكن يحرسنى ولما كان بيحس انى بترعب من رؤية الشباب لما يطلعوا كومة الرمل فيحس بيهم قبلى ويبنبهنى واركبه ونجرى نستخبى وكأنه بيلعب معايا الاستغماية منهم ... لما كان بيلمس وشى وشعرى برقة متناهية وحب غير طبيعى ولما كنت اتعب واروح فى ميعادى وانا عيانة فينزل على الارض عشان اركبه ويرفع مؤخرته حتى لااقع ...
لالالالالالا رماح قصة تانية وحالة تانية افسد على كل مشاعر بعده
البيت بقى يا سيدى حلم رسمته كتير وخططت له كتير
زمان كان لى اجندة خاصة كل عام مش الديلى لا اجندة بيضا من جوه املاها بالاحلام والتصاميم والاكلات وفوائد الاعشاب.. والسندوتشات السريعة وكيفية ازالة البقع ..وصور فساتين الزفاف
بنت زى اى بنت
اسأل اى بنت فى الدنيا حتلاقيها نفس السيناريو بالظبط
احم
انا سرحت
معلش
كل التحية
جنى
التاجات مش فاهمة ايه اهميتها
لكن التاج ده بالذات انا قررت اجاوبه بس بطريقتى ولذلك الى حد ما لم التزم بالمطلوب فيه لانى فى مدونتى مساحات خاصة بى احب ان اعيشها بين الحين والاخر واحلامى كانت مؤجلة فى نهاية ذاكرتى وللاسف بحبها
لذلك لم اقثاوم وفيها بقى كمان ميزة لست مضطر للحديث عن نفسك مباشرة انا كذا كذا لا انت بتتلكم عن احلامك كأنها بوست محبب كدا
بس
بجد نورتنى واهلا بك
الحمد لله رب العالمين
انا كنت جاية ادعوكى للتاج اختراعى ..اللى من يومين ..وكنتى فى كشف المدعوين ومش جيتى تاخديه
لقيتك زعلانة اوى من رفقة انها بعتتهولك ...
معلش يا رفقة جات فيكى
اسمحيلى اتكلم بصفة انى دعيتك ليه فى الاساس ..وأشكرك على اجابته ..ماعتقدش كنتى حتكسفينى ..مش كده ؟؟
عجبنى اوى حلمك بالبيت والشط والجنينة ...واسمحيلى اقولك ذوقك حلو اوى فى الالوان وخصوصا لون الترمس اللى متناسق مع التانك ههههههههه
واوضة الخياطة وضحتلنا ان ليكى مواهب أخرى غير اللى منورة فى مدونتك
ربنا يحفظلك باباكى ومامتك ويتم شفائها..وانتى بالفعل حققتلهم اجمل امانيهم ..بتواجدك فى دنيتهم
ويحفظلك اخوكى عصام اللى مفسحك عندنا فى اسكندرية ..ومتخافيش كلنا هنا مجانين وبنطلع على السور ..يعنى مافيش جرس ولا حاجة :)))
ويرزقك حج وعمرة قريبا ..ويرزقنى معاكى ..مين عارف يمكن اشوفك هناك
ويارب يحققلك احلامك بما فيه الخير والصلاح .. ويرزقك الرضا دايما
وانا باحلم ازورك هناك ...وتعزمينى على حب العزيز
عذرا مرة أخرى ..باتصرف على اساس انى فعلا كنت مستنية اجاباتك بشدة
وليكى شكر تانى أكيد من رفقة الجميلة
وانتى لو كنتى شرفتينى كنتى برده حتلاقى مدعوين كتير عندى ..انتى مررتى ليهم التاج مرة تانية ...
يالا خليها تلزق فيكى
واصلا كله من مجداوية
D:
ربنا يكرمك حبيبة قلبى ويسعد أيامك
jana
بجد انا مش عارفة اقولك ايه
اولا بجد انا بشكرك جدااااااااااا
بشكرك لانك عطتينى سبب افرغ شحنة عندى من كام يوم كنت نفسى اكتب عن احلامى اللى فاتت اوى واتكسفت
ثانيا بشكرك لان رائحة الانوثة موجودة فى التاج ودا كافى كاغراء لى بقبوله ويكفى انه منك ولونى مكنتش اعرف ومن رفقة اللى بجد بحبها وبعتز بيها جدا
ثالثا البيت حلم فعلا مجرد التفكير فيه كافينى يعنى مش زعلانة انه ماحلصش لانه مازال بيغذينى
رابعا بوصى بقى الترمس والتانك والكاتل من اكتر الحاجات المستفزة للالوان عندى لانها مش ممكن تنسجم مع الوان اوضة الذكر الا لما تتناسق الوانها والا تبقى نشاز وتخرجنى من الجو المبخر ده
خامسا سامحينى انى مادخلتش عندك الفترة دى بس انا عندى مشاكل كتير مع الريدر وبعضالمدونات لاتظهر عليه مش عارفة ليه ولذلمك لااعرف ازاى اوصل اليهم الا لما اراهم فى اماكن تانية
سادسا حب العزيز وكل من هناك تحت امرك وتشرفينى فعلا ومش هزار ولاعزومة صيادين هههههههههههههههههه
ولعلمك بقى بيقولوا على عايز تتفسح خلى لعلها خير تعمل خطة وخط سير ازاى تتفسح فى بلدنا وجربى
عصام بقى حبيبى وقور اوى بس متفهم جدا وبيتعامل معايا على انى القبيرة فلما بعيل بقى وشه بيحمر بس حيعمل ايه ياولاداه وكل مانضحك يقولى (فرغى فرغى )هههههههههههه
اشكررررررررك
وان شاء الله اما انزل اسكندرية الاجازة دى حبعتلك انتى وامولة السلام على البحر
حبى وشكرى الجزيل
تحياتي
احلام جميلة...مملؤة بالخير...ربنا يحقق لك
كل ما تتمنيه.
أستوقفني بشكل خاص وصفك الدقيق لمنزل الاحلام...و المضيفة لكل عابر سبيل...
أسأل الله العظيم ان يشفيكي و يشفي والدتك وان يجعل هذا في ميزان حسنات كل منكما...
ايضا ممن استوقفني ان التليفزيون ممنوع
في رأيي انه وسيلة مهمة للتثقيف..و التعلم...ينبغي ان نأخذ الجيد منها
تحياتي و تقديري
الربان
اشكرك وجعل الله لكم من دعائكم نصيب
التلفزيون ممنوع لانى كنت مدمنة فعلا للافلام الاجنية اتشنال 2 خدت منى رقااااااات
التليفزيون فى اكتر من 63 بحث حاليا فى اوروبا فى اعرق المعاهد البحثية على انه خطر داهم وفى 26 كتاب فى امريكا وحدها عن مخاطره على الاطفال
حينما اتذكر حالنا فى بيتنا قبل التليفزيون ... كانت اعداتنا دى ولمتنا حول بابا وماما وكلامنا فى كل شىء ونغنى قصائد فى حب النبى والقلب يعشق كل جميل لام كلثوم ... كل ده دفعنا للقارءة وللعلاقات الاجتماعية الناجحة المتوازنة اللى بتشبع وكان فى بركة فى الوقت
وبعدين مش لان التليفزيون حرام انا بمنعه بل لانه اذى ودا اقتناعى عن تجربة
وان كان فيه استفادة فهى السم فى العسل
يعنى مثلا اذا خلتهم يتفرجوا على كرتونز يبقى لازم اكون جنبهم احللهم اللى بيشوفوه مش اريهم ادامه واطلعهم معاتيه
واذا سمحت لهم بالتليفزيون يبقى ممكن قناة ديسكفرى مع بردوا المتابعة الدائمة وافضل اننا ندور على المعلومات فى الكتب مع بعض ونطلعها ونتناقش فيها ....
انت اعتقد زى من جيل التلييفزيون واكيد حاسس بكلامى وفاهم اننا كنا مبهورين به وبنستنى نادى السينما واوسكار كل اسبوع مش حبا بس فى الافلام لكن لرؤية هذا العالم البعيد
عذرا للاطالة
اشكرك على الدعاء وارجوك لاتنساها فى داعائك ودعائكم جميعا
يا دى التاج اللى ماسك فيه يا عم سيبنى برضه ليه حد مديهونى هبوسه وابوسك واسيبه على جنب شويه ههههههههههه
انتى عندك حصان انا بحب الخيل قوى بجد
عارفه احلامك اخدتنى لقصص الاساطير والف ليله وليله
ربنا يسعدك ويحقق لك كل احلامك اللهم امين
ابى
اهلا يا فيكونية
يييييييييه صح النوم انتى لسه واخدة بالك ولا تحديف الحوكمة بالطوب شغلك طبعا
هههههههههههه
عايزة اشوف احلامك
تحياتى
رفقة
يا اهلا يا اهلا
انتى عارفة ان ده اول تاج اجاوبه بصراحة ضعيفة ادام الاحلام
كل زمان بتغذى عليها وطلعت الاولى على الثانوية العامة بحلم صغير حلمته وتمنيت اهدى عيد ام مختلفة
اشكرك واشكر زيارتك الكريمة واشكر لك اهدائى
اختى الحبيبة:ربنا يحقق لك كل ماتتمنى وكل احلامك الجميلة تشوفيها يارب حقيقة
وربنا يتم على والدتك الغالية بالشفاء العاجل ويجعلك دائما أفضل مما يتخيلون
دمتى بخير وسعادة
موناليزا
يا هلا يا هلا ايه رايك يلا اشوف احلامك بقى .............
ماما الحمد لله احسن كتير النهاردة ولسه مكلماها كل ربع ساعة واخر مرة قالتلى (الدكتور قالى انتى حتموتى لو مشفتيش ولاد لعلها ...مش انا اللى بقول ده هو )هههههههههههههههههههههههههههههههه
الحجوجة دى لذة وسوفتى خالصصصصصصصص
الله يفرحنا باحبابنا جميعا يارب
فى شوق لرؤيتك من جوووووه المعاميق
بجد احلامك خليتنى اعيش فى موود حلو اوى
الجميل انك بتحلمى بالتفصيل مش يعنى حاجة اجمالية وخلاص..زى ما نانا قالت حتى لون الكاتل مظبطاه..انا برضة اللى رايقة؟
يارب يارب كل احلامك تتحقق واحسن منها كمان وياريت تحققى نصيحة الدكتور لمامتك قريب علشان بس صحتها تتحسن ان شاء الله
:)
انتى من الناس اللى بتسعدنى فى الواقع وفى الاحلام كمان
اهلاً بحضرتك
جميل أوي أحلام حضرتك وطريقة تعبيرك عنها تتحسدي علي طريقة تعبيرك وأحلامك خلتيني سرحت معاكي جداً
انا بقي قرايتي للبوست ده خلاني سألت نفسي سؤال عمره ماجه علي بالي أحلام ايه من الماضي ....
انا بدأت اتغير وأحلم باللي جاي وأحاول أخلي أحلامي واقع وتتحقق ان شاء الله
اتمني لحضرتك كل نجاح وتوفيق في حياتك وتكون سبب ان شاء الله في النجاة والفوز بالآخرة آمين
أشكر لحضرتك اهدائك التاج لية بس انا فعلاً مش عندي أحلام من الماضي
أما أحلام المستقبل أوعدك لما أحققها أقولك عليها
تحياتي
بالتوفيق............
يا مولة ويلكم باك
اه طبعا انا ابعد مايكون عن الرومانسية يا بنتى بقولك ترمس وخضراوات وفواكه تقوليلى رومانسية
المصيبة بقى انى كل ماحلم بفارس احلام كنت اختليه راكب حصان بس له هو كمان ديل
تفتكر ليه؟؟؟؟؟؟؟؟
هههههههههههههههههههه
نورتى واقبلى التاج
غنيم
يا اهلا بيك
ماهى احلام الماضى المفروض انها واقع اليوم
لكن اكيد مش بيتحقق كله الاهم انك تكون بذلت كل اللى فى استطاعتك
حاول بس تكتب جرب
انا فى انتظار احلامكم يا جماعة يلا
تاج صعب بجد
مش هقدر أوعدك :)
بس هحاول ألاقي أحلام
واضح إني مكنتش بعرف أحلم يا كل أحلامي كانت كوابيس :)
السلام عليكم ورحمة الله وبركاته
اه علشان كدة عجبتك رماح جروب
اجاباتك جميلة اوى .,.
وانا كمان بحب الخيل جدااااااا
بس عمرى ما حلمت ان فيهم فرسة هاتبقى اميرة...بس بكلمهم كتير...
تحياتى
حاسة انى اتبدست
ده تاج صعب
بس ان شاء الله اجاوبه
وتشكر يا جميل
ميتو
حبيبتى دا انتى بقى لازم تجاوبى عليه
معرفش بس انا بحب الاحلام ومش متخيلة حد مش بيحلم ...
الكوابيس حتى بتغير من مودنا لكن بتعادل حياتنا عشان نعرف قيمة الامان لما نقابله
ارجوكى عشان خاطرى تعاملى مع التاج على انه فرصة نسترجع احلامنا القديمة دورى حتلاقى كان لك احلام لطيفة جدا زمان
كل حبى زميلة الكفاح
الغزالى ههههههه
لا اعتقد اننا ممكن نحلم بالفرس امير ..لكن انتم بتحلموا بيها فراشة او ؟؟؟؟ غزالة مثلا يمكن دلوقتى مع التطور والاحجام ممكن تمشى بقرة وجاموسة من باب انها تكون بتشتغل بقى وكدا يعنى ونحلب فلوسها وقس بقى على كدا كل واحد واحلامه
ههههههههه
كل التحية اخى الكريم ونورتنى فعلا
شيماء
اهلا اهلا بيك ونورتينى فعلا
لازم تشرب
فى انتظار التاج
لو مش هتحلم معايا مضطر احلم لنفسي
لكني في الحلم حتى عمري ما هحلم لنفسي
ابو العلا البشري
.........
مين رماح ده
بصى قصتك مع رماح بتفكرني بقصص الاطفال بتاعة زمان الجميلة والافلام اللى كنت بشوفها في سينما الاطفال سينما فيها الحقيقة وفيها الخياااال مع ماما عفاف الهلاوي
وصفك للمنزل كان شئ رائع
بس ايه الحلم الاقطاعي ده
تكونيش فاكره نفسك انجي في رد قلبي
الوصف كان جميل وقدرتي تخلينا نحس باننا شايفينه فعلا لكن يا عينى دخلتي في تفاصيل كتيره وحاجات ما افهمش فيها
بس عجبني انسانيتك العاليه وتفكيرك في الاخرين في نفس الوقت اللى بتفكري فيه بنفسك
بس ليه تكون الاوضه ممنوعه عن الاولاد ليه مش يدخلوا ويتعلموا ويشاركوا ويحفظوا ويقرأو سوا
واشمعنى اسرار الحكمة السبعة ليه سبعة يعني
بس تتصوري قصة شكلها جميل ..انا بجد اقترح عليكي تبدأي فيها خاصة وانك في حاله ابداعية جميله متأثرة فيها بهاري بوتر اعتقد انك هتكتبي عمل مبدع يكون المنافس العربي لهاري بوتر
شدي حيلك
ومين شيخك واستاذك ده ليه مش كلمتينا عنه
وليه مش بقيتي صحفية
خساره كنت شغلتك معانا في الصحيفة
ههههه
............
حبة رخامه بقه
ممكن تاخدي الموبايل بتاعي وتجيبي الموبايل بتاع عصام
بس هو نوعه ايه الاول
ما علينا مانتى كده كده هتدفعي الفرق
نيهاهاهاهااااا
يا باحث يا انونجى
اولا انا حعاملك بدون رخامة المرة وحرد عليك زى البشر اللى بتفهم كدا ...
اولا انا حبيت جدا مسلسل ابو العلا بس كان مستفز وكل ماافتكره قولونى يبقبق
هو ودون كيشوت بس ماعلينا
لسنين طويلة كانت عفاف الهلاوى والثور الاحمر النارى ولاسى (كانت بايخة) كانت مصدر من مصادر الخيال ..الى جانب انى خلصت كل قصص الاطفال ايامها من يمكن اولى ابتدائى مثلا ...
وبابا ...كان مصدر غنى جدا بالخيال لى ..بابا شيخ عكروت ساخر خيالى وامى واقعية جدا بس الاتنين مزيج جميل
رماح بقى سؤالك دليل ادانة لك لانك حتتشبح هنا دلوقتى .......
حلمى مش اقطاعى حلمى حلم ..يعنى يا بديع زمانك عايزنى لما احلم احلم بشقة اوضتين وصالة ايجار ؟؟؟؟؟؟؟؟؟؟ والحمام مشترك مع الجيران ؟؟؟؟
ماهو طبيعى يا ذكى انى احلم باللى نفسى سواء بقى حيحصل او لا اهو حلم
اكيد الحاجات اللى مافهمتاهش هى الحاجات النسائية ماهى ميزة ربنا ميزنا بيها عنكم الحس الفنى والذوقى يا عديم التست انت كبيرك برام تورلى بالهبر
ههههههههههههههههههههههههههه
ليه الاولاد مايدخلوش الاوضة معانا ؟
الحقيقة انا ماقصدتش انهم ممنوع اطلاقا لكن اقصد انها مش مكان مباح لهم لا خالص بس كمان افضل فى اوقاتى الخاصة مع الله انسى جوزى والاولاد والدنيا ولو لدقائق واكون معه فقط دون ازعاج ولا بقى مم ولا بيبى ..بس ناخد اقتراحك فى الاعتبار ونحفظهم القارن فيها ويصلوا ورا بابا مافيش مانع موافقة
شيخى ومعلمى هو اكبر هدية فىىىىىىى حياتى الروحية الدينية ويمكن حياتى اجمالا ...
ومعلمتى هى شريفة من الشريفات ادرس على يدها الفقه الشافعى لان الله وفقنى له كاختيار لمذهبى (ومش عايزة مناقشة فى الحاجات دى )مفهوم؟
ليه مابقتش صحفية
اولا انا احب المنهجية واكره الفهلوة فى العلم ..فبالتالى لما طلعت الاولى على الثانوية كان ده حلمى للكنى كنت مخطوبة وطبعا قالى لا انتى حتتجوزى وتربى العيال اعدت عيطت واتشلت واتهدبت وعملت استخارة ودخلت تربية ..وبعدين سبته
بعدها خلصت الجامعة وعملت ماجستير وقلت امارس بقى الصحافة وفعلا اشتغلت فيها لكن الجو ماكنش ماشى معايا لانى اترقيت بسرعة فيها وكنت مسئولة صفحة الادب باحدى الصحف المغمورة ورايحة فى داهية بس طلبوا انى اكون مجاملة اكتر واحضر معاهم حفلاتهم واسلم بايدى وكل ده عندى ممنوع فباااااااااااظت وبصراحة كرت الوسط كان تقيل على روحى من كم المجاملات وكثرة الكلام وتحس انك ممهما تحريت الحق فى حاجة فى المجال ده يقبض على الاقل لى بس
القصة فعلا بقالها سنين فى بالى وكان المفروض انى حشتغل مع كاتب اطفال صيته مسمع فى كل حتة لكن ماتفقناش لانى ماحبش دور السنيدة وماحبش الحجر على فكرى
والله اتمنى بس انا خوافة انى اكتب ويطلع اى كلام عايزة اما اكتب اكتب حاجة للنبى اهداء كدا يخلى الاطفال طالعين وهما عارفين من اى امة هما والشيطان بقى اعدلى فيها بالمرصاد فربنا يعينا اذا كان فيها خير او ماكنتش مجرد قصة والسلام ودا مهم عندى جدا
تصدق انك تعبتنى
مالك انت ومال موبايل عصام يا لطيف عينك على الصنية وعلى الموبايل يا رجل اتقى الله باصصص لنا فى الحاجة ليييييييه
بجد يا باحث ......... بتعرف ترخم
وبجد بيسسسسسسسسسعدنى زيارتك(السين من تحت الضرس)
عندى استشارة قولى اوصلهالك ازاى؟
دمت بخير
صغرتى الجميله
فعلا بعتذر على بخلى معك فى التعليقات والاتصال
بس انا عارفه انك ذات قلب كبيرررررر مسامح دائما
طبعا انا متابعه كل بوستاتك ودائما ما توقف عن القراءه لوهله لصفق لكلماتك ثم استنانفه مره اخرى
صغرتى شرفتنى بانى اكون التانيه لنيل التاج
ولكن حقا اشعر انه امر صعب فاناياصغرتى فقدت ذكرت الاحلام ولم يعد قدره على الحلم او التمنى فكيف لى ان اجيب تاجك استسمحك ان ترجئنى لتاج اخر اهون واملك الاجابه عنه
يارب يصلح لك الحال ويبارك فيكي ويكرمك ويريح قلبك
ويشفي ماما ويخليها ويخلي بابا ويبارك في عصام اخوكي يارب ويكرمه ببنت الحلال
اجابات حالمة ربنا يحققهالك
تحياتي
ربنا يحقق لك كل احلامك
حسيت و انتى بتوصفى بيتك اللى بتتمنيه على شط البحر انك مهندسه معماريه او مهندسة ديكور .
احلامك بتدل على انك شخصيه شفافه ومحبه لكل خير وللناس وطبعا لربنا سبحانه وتعالى احبك الله واحبب فيك عباده .
عجبنى كمان وصفك لفارس احلامك بانه ما يخوفك من السواقه ولا من الشارع لانه بقت موضه عند معظم الرجال .. ربنا يهديهم جميعا . الحقيقه اخذتينى معاك لرحله من الاحلام المشروعه وجميله فى نفس الوقت .
خالص امنياتى ودعواتى بتحقيق كل احلامك يااارب .. ولن انسى ان ادعوا لكى بالصلاح فى جميع امورك ولامك الحبيبه بالشفاء شفاها الله وعفى عنها هى وجميع مرضى المسلميين .. امين
اشكر تمريرك لى بالتاج واعدك بان اخذه فى اقرب فرصه واعذرينى لانى بكره وبعده ان شاء الله حأكون مشغوله جدا بجد لكن اكيد حأرجع واخذه .
تحياتى .. ودمت بخير دائما
rovy
حبيبتى قيثارة
ولا بخل ولا حاجة انا واثقة انك فى مانع والعيب عندى انى ماتصلتش بيك بس والله انا فى مشاكل وضغط شغل كتير سامحينى والله اشتقت للاعدتنا مع بعض
فين الشوك والعلبه هههههههههههههه
لازم انتى بالذات ماتبطليش تحلمى ابدا ..
احيانا والله الاحلام بتكون تفريج لنا مشحن لايامنا الجاية
ارجوكى اول طلب اطلبه منك تقبلى التاج ارجوكى قيثارة عايزة ترجعى تحلمى تانى وبلاش نبرة اليأس
عاشقة النقاب حبيبتى الغالية صاحبة الفكر المتزن والقلب الكبير رغم اننا نختلف فى المناهج الحياتية وعلماؤنا لكن انتى بتثبتى انك مثل رائع لفكرك الذى يقبل الاخر ويتعامل بود وحب على اساس ان كلنا مسلمين
بارك الله فيك وجعل دعائك لنا خيرا لك اللهم امين
جزاكى الله كل الخير اختى الحبيبة
روفى الغالية
الله يسعد قلبك ويهدى سرك ويصلح حال الرجالة يا ختى يارب ههههههههههه
البيت فعلا حلم تمنيه سنين وكنت كل شوية اخد بالى من تفاصيل نسيتها ... والغريب انه تحقق بكتير منه لكن بدون تمام الكمال ولله وحده الكمال لكن كان ميت فيه اشياء ناقصة كتير جدا
بجد اتعلمت من الجوازة دى انى مش ممكن ارتبط بحد يخوفنى من الحياة ولا يتعامل معايا على انى مش ممكن حعرف حاجة
جميل ان الرجل يكون جنبنا دايما يساندنا ويقوينا ويكون من قوته نستمد قوتنا لكن مش معنى ده انه يخلص على روحنا ولا انه يمحينا تماما
ليه مانكنش زى الاب اللى جنب بنته تقع وتقوم لوحدها وببعض المساندة والتشجيع منه يقويها لكن مايحرمهاش من المحاولة حتى لو وقعت
اشكرك فعلا وانا فى انتظارك فى اى وقت ادعى لاختك هى كمان مطحونة
ادى السكاكين
وادي السواطير جمع ساطور
وادي الكلاشينكوف
وادي بنات وموتسيكلات
لا الاخيرة دي ش تبعنا ابقى فكرينا نرجعها
..........
ايه بقى حكاية زي البشر اللى بتفهم وكده ....
طب انا كبرت في دماغي بقى
مانتي شاطره اهو في الرخاااااامة ( الكلمة كلها من تحت الضرس) للعلم فقط
بقى لاسي كانت بايخه
طيب اسكتي بس اسكتى انتى باين عليكى مكنتيش بتعرفي تتفرجي
فاكره فلم دودو الولد الصيني بتاع القنفذ
عجبتني يا بديع زمانك دي
ممكن واحد كمان بس يكون بالمكسرات
يا بديعة زمانك شدي حيلك وبلاش كسل التجربه احسن من انك تقعدي تقولى خايفه ومش هينفع
ابدأى كتابة القصة
وانا ممكن اساعدك على فكره
اعملهالك قراطيس واوزعهالك على جميييييع محلات اللب ..والسوبر كمان علشان خاطرك
- الشافعي
هو فيه اجمل من الشافعي
الله يرحمه امام اهل السنة والجماعة
متنسيش ان ابن حنبل احد تلاميذه
كويس ان ربنا اكرمك بشرفاء القلب وشرفاء النسب تتعلمي على ايديهم
والصحافه شئ جميل
بس انك تكتبي من بعيد لبعيد
لكن واقعها صعب
وعلى فكره مش بس كلها مجاملات لا وكمان احقاد وكراهية بتفضل متخزنه ونظام الوشين
إلا هي كانت صحيفة مغمورة ولا مطمورة (رخامه) عندك مانع
اه الحاجات اللى مفهمتهاش يا ابله نظيرة هى كتر الفاصيل
وبعدين انا راجل
اهتم بالهبر اكتر
بس تورلي مره واحده ايه الكرم ده
عموما انا كمان سعييييد ( اياء من تحت الضرس) بروحك العالية والجميلة
وبرضه تفكيرك في الناس والاخرين لفت نظري جدا ربنا يكرمك وتحققي احلامك
إلا هو مين رماح ده
كان حلاوه ولا قطن
وبخصوص الاستشارة
وبصفتى انونجي
ابعتيهالى وانا اعملها لحن علشان خاطرك
الايميل اهو
الاول بصي كده احسن يكون حد بيشوفني ولا حاجه
thelast_visitor@hotmail.com
قولتيلى بقى موبايل عصام نوعه ايه؟
هاهاهاهااا
ماشاء الله على احلامك فعلا
بجد تحسي انك بتتكلمى مع شخصية جميلة وبتحلم باشياء قيمة
اسأل أن يحققلك كل ماتريدين وان يعطيكى ماتتمنى زيادى اللهم ىمييييييييين
ومعذرة حبيبتى على تأخرى عليك فى الردود
لكن فعلا غصب عنى
دعواتك الصالحات لى
دمتى فى حفظ الله
ضحكني بصراحه ملامح فارس احلامك شبه سامي يوسف
عمر الحب ما كان بالوسامه
هذا رايي علىالأقل
صاحبتي مجنونه سامي يوسف على فكره :)
الا تخافين ان تقولي انك منفصله في مجتمع رجاله مرضى ازدواجيه ؟
انتبهي لنفسك فالعالم مخيف .
عزيزتى لعلها خير
أشكرك أولا على المقلب اللطيف مع انى مخلص تاج قريب
أرسلت لك رسالة على الميل لديك ولاادرى ان كانت وصلتك أم لأ ..
أرجو الافادة .. مع خالص تحياتى
الباحث
ازيك لسه ادامنا كتير عبال مانكتب
ادعيلى بس
اخر العنقود
يا اهلا بيكى ياحبيبتى
ولا يهمك كلنا ملخومين
المهم تكونى بخير
اهى مجرد احلام يا ستى
نورتينى فعلالالالالالالالالالالا
ماجدولين
اهلا بيكى يا سيدتى
اه دى احلامى فى فارس احلامى وانا صغيرة ولم اسعى لها تحديدا الحقيقة ولكن قدرا طلع طليقى نفس الشكل فاراد الله سبحانه يعلمنى ماقلتيه حضرتك ان الموضوع مش مجرد ملامح مع ان الاختيار كان بعيدا عن الملامح ...لكن هذا حق
لا سا ست الكل مش خايفة لان ده هدف المدونة فعلا الطلاق والمطلقات وكيف انها انسان زى اى حد
اشكرك على النصيحة ولا تقلقى اعرف هدفى جيدا
نورتينى
شريف
اهلا بحضرتك
وانا بعت لحضرتك الرد على الايميل وتخيلت انه وصل
وطبعا انا مش حسكت على المقال بس انا مشغولة لنا كلام كتير ان شاء الله
اشكر لك اهتمامك سيدى الفاضل
وفى انتظار الرد ان شاء الله
اجاباتك رومانسيه جدا وحالمه ورقيقه جدا
عوضك الله خيرا عما فقدتى
وابدلك الله خيرا منها
انا كمان جاوبت التاج بس مش اجابات حلوة زى دى
إرسال تعليق