السلام عليكم جميعا
...
منكم من يعلم انى اصر على الحفاظ على طبيعة مدونتى لانها مساحتى فى هذا العالم الذى من خلالها اسجل مايحدث لى فعلا دون مبالغة وانما باحساسى
لذا
اليوم
احكى لكم عنها
تلميذتى
سندريلا
فى يوم مثل باقى الايام لاجديد فيه الا الارهاق الازيد وجدت على مكتبى ورقة مصممة باتقان ويدويا وتفشى بان صاحبها اجتهد ليجملها الورقة تحمل كلمات اخرستنى
(مس .... (اسم تدليل مشتق من اسمى ) لقد رأيت حضرتك اليوم وانت متضايقة ..انا بعتذر لحضرتك لو كنا ضايقناكى ..بس انا احب ان اقول لحضرتك حاجة يمكن تغير من ضيقك مننا ..انا بحبك حضرتك جدا ..وحضرتك كنت فى يوم سبب انى ماعلمش حاجة غلط كنت حعملها .. واحب اقول لحضرتك بجد كان نفسى تكون لى ام زي حضرتك لاننى ار فيك المسلمة التى احب ان اكون مثلها
i love you so much miss ...........
حظرى ..فظرى .. انا مين
.................
حطيت خط احمر تحت الكلمتين الاخيرتين وعلقتها امامى
عرفت من هى بمقارنة الخطوط
اعترف انى من كام سنة كان رد فعلى لهذا الخطاب سيختلف تماما ..اعترف اننى لم انساق وراء الدمعة التى تسللت منى
اعترف انى كنت عملية بشكل استغربتنى فيه جدا
عرفت انها تعيش مع زوجة ابيها وانها تذوق الامرين وتعير بامها التى تحيا حياة لايلزمها فيها طفلة على مشارف النضج تركتها ولم تهتم بها الى الان لسن الرابعة عشر
............
فى عملنا ممنوع علينا التداخل مع الطالبات حتى بارقام التليفونات وفى الحالات التى خالفت ذلك ندمت جدا لانى ادركت انهم اعلم منى بمدى العلاقات تلك ومشاكلها
............................
لاانكر انى حينما عشت مشاعر امومة جميلة لساعات مع نور صديقتى الطفلة الرائعة ابنة طبيبى لا انكر ان ذلك اسعدنى لكنى لم اتمن الامومة حالا ولا تعجلتها اراها رزق مثل اى رزق ...لكنى مع سندريلا شعرت فعلا بها وبحاجتها الى
احترت ولكن زميلاتها اوصلن الى مدى شغفها باى مدرسة تعاملها بطيبة ..لم يؤثر ذلك فى تقبلى لمحاولاتها بان تسمع منى كلمة طيبة بشكل خاص
....................
حينما جلسنا وحكت لى اسمتعت اليها بكل جوارحى ..لكنى (وللعجب) لم اطيب خاطرها
نظرت فى عينيها الجميلتين وقلت : اجمدى ..ربنا لايكلف نفسا الا وسعها ..ان مكنمتيش اد اللى انت فيه ده ماكناش حطك فيه ... امك وحشة ..ايه يعنى سيدنا عكرمة كان ابوه ابوجهل اوعى تسمحى لحدك انه يذلك او يهينك فاهمة ؟
لو حسيت منك تانى ضعف واستكانة للعذاب ده مش حعبرك فاهمة ؟
نظرت لى وهى تغالب دموعها :حاضر
بكرة ماتجيش تقوليلى انها عملت فيك حاجة ..بكرة حتقوليلى انك منعتيها من اهانتك وقلتى لبابك على اللى بيحصل منها فاهمة؟
- حاضر
قمت لانصرف
نادتنى :طب ... حضرتك ؟؟؟............
وارتمت فى حضنى
ذهلت ..واجفلت ..ولم ادر ما يحدث ..
رفعت رأسها وهى تقول :انا بحب حضرتك اوى اوى ...مس ؟؟؟ حضرتك بتعيطى ؟
انا زعلت حضرتك ؟؟؟؟؟؟
لم استطع الرد حاولت مرارا يائسة ان اوقف هطول الدموع ابدااااااااااااااااااااااا
نطقت بالعافية : مامتك كويسة او وحشة انتى زى الفل ..اى واحدة فى الدنيا تتمنى بنت زيك يا عبيطة اوعى تتهزى ولا تخافى اوعى تشوفى كوابيس تانى ..فاهمة ؟
واوعى تحسسى مرات بابكى انى موجودة فى حياتك .. انسيها تجاهليها قاوميها المهم ماتكونش سبب فى تعاستك ابدا كل ده حيخلص وبكرة نعد فى النادى وانا عجوزة مكركبة بس قمر بردوا وولادك حواليك بيجروا واحنا بنحكى على الايام دى ونضحك واتكلم عنك بكل فخر ..يا هابلة
حضن تانى اشنع من اللى قبله
حسنا
اوك
سلمت
اثرت فى وحبتها فعلا
بعد كام يوم جاءت سعيدة ..صرخت فى وجهى حضرتك كنتى بتدعيلى صح؟
قليلى كنتى بتدعى بايه ؟
- يا بت انطقى ايه اللى حصل فرحينى
- مامى يا مس مامى رجعت واتصلت بمرات بابا واعتذرت لها على كل اللى سببته لها ولبابا وبتطلب منها تسمح لها برد جميلها
- ذهلت ..بكيت تانى ييييييييييييييييييييه الحمد لله يا حبيبتى
- انا فرحانة اوى اوى يا مس
- يارب يفرحك دايما
كلمتنى مامتها شكرتنى على مساندتى لها ووقوفى بجانبها ..احسست بغيرة شديدة على سندريلا ولكن اسعدتنى بهجتها
طلبت من البنت الانصراف وطلبت احدث الام على انفراد
- ارجو ان حضرتك تقدرى تعوضيها عن ايام فقدها لحضرتك هى محتاجة حضرتك دولوقتى اوى
- اكيد اكيد بس الحقيقة انا جيه اسبوعين ومسافرة عشان حتجوز واضح انها فاهمة غلط
-حتسافرى ؟!!!!!!!
وهى ؟!!!!!
- حتفضل مع بابها ومن وقت للتانى حبقى اجى اطمن عليها !!!!!!!!!!
............................
لحظتها فقط حمدت الله انى مطلقة بدون اطفال
دمتم بالخير ودام ابناؤكم وسطكم دايما يارب
.jfif)
.jpg)
المشاركات
هناك 14 تعليقًا:
السلام عليكم
قرأت ....ولي عودة للتعليق
بس بداية القصة دي ضحاياها كتير أوي
ولا حول ولا قوة الا بالله
السلام عليكم ورحمة الله
الضحية هنا هو الطفل..مدونة رائعة وكلماتك مؤثرة فعلا...ومع إنها محزنة إلا أنها تحمل فى طياتها الامل والإيمان بوجودك وتصرفك الحكيم ونظرتك إلى مستقبل مشرق ..فنشكرك على دورك الرائع وجميل منك تواصلك مع طلابك ونصحهم وتوجيهم..والاجمل هو طريقة المعالجة.
دمتى بكل خير ولك منى كل تقدير وإحترام.
البنت دى لما تعرف الحقيقة هتتصدم صدمة
بجد لازم امها دى تضرب بالجزمة و الله
و بعدين الاب يعنى مش حاسس ان مراتة بتعامل البنت وحش ولا هو كمان مكبر
انا عايزاكى تاخدى بالك من نفسك التعلق بالبنت جميل و مساعدتها اجمل بس اظن انت مش مستحملة اى وجع جديد فى القلب لانى اظن انها بعد ما تعرف ان امها هتسافر تانى هيكون رد فعلها عنيف جداا
حاجة تحزن و الله
فيه ناس سبحان الله ميستاهلوش نعمة الأمومة و الأبوة ... بس نقول إيه دي أرزاق
للأسف البنت دي هتتبهدل في حياتها و ربنا يستر عليها
وحشتيني و يا رب تكوني دايما بخير
سندريلا الأولى عانت كثيرا من زوجة الأب والقهر بشكل عام ثم تزوجت الأمير وعاشت فى سعادة ابدية
فيلم كرتونى او قصة خيالية كانت لكنها تبدو واقعية فى بعض اجزائها
ما تثمره علاقات الزواج الفاشلة ليس بالضرورة محملا بالعقد والكلاكيع
بل احيانا تصير هذه الثمار أكثر نضجا
عادة تجدى هؤلاء الأطفال يبدون أكبر من عمرهم الحقيقى أعتقد ايضا انهم يواجهون الحياة والمستقبل بشكل مختلف
واختلافهم عن غيرهم قد يكون جيدا او العكس..وذلك ما تساهم فيه بلا شك شكل العلاقة الحالية بين والديهم بعد الطلاق وحسن تصرفهم وذكائهم فى معالجة الامور ..فلا نستطيع تدمير حياة أحدهم بمنعه من الزواج مرة ثانية أو نحكم عليه بتجرع آثار فشل قديم طول عمره قد يكون غير مسئول عنه من البداية
فقط عليه ان يدرك ان المقاييس قد اختلفت عن السابق ..فلا يبحث عن راحته وحده بل يضع امان وسكينة طفله فى المقام الاول وليفعل بعدها ما شاء وحلله له رب العالمين
أما عن علاقتك بسندريلا الحالية
أعتقد ان الله قد وضعك أنتِ بالأخص فى هذا المكان والزمان لحكمة يعلمها وحده
وقد بدأتى مهمتك بتصرف حكيم كعادتك
أعانك الله على إتمامها
ياقوى يارب
مجداويتى
انتظر عودتك فعودى عودىىىىىىى
الا ماينفعش تصرفى لاختك الشقيانة حبة شوربة حتى مؤقتا ؟؟
الاستاذ احمد مصطفى
سيدى ..
اولا :اشكر لك كلامك الطيب
ثانيا :الكل يعلم انى احب مهنتى وانى اقوم بها بمزاج وان الامر عندى امانة سر ..
وكل طلابى يعرفون انى لااترجم حبى لهم فى قبلات واحضان قبل ان يكون مسئولية قبل كل شىء فحبى لهم وحبهم لى مسئولية لابد وان تتضح فى افعال قبل الكلام فما اسهله
ثالثا :الشعور الذى يصل لكم انى غير متفائلة لا اعرف كيف افنده ؟ لا املك الحكم على نفسى وربما كلماتى تفضح مالا ادركه ربما ..
رابعا :رغم ان السؤال الذى طرحته فى مدونتكم اشعرنى انى متهمة ورغم انه شخصى الا ان ابلتى مجدوية موصيانى اكلمك بادب وماانطحش كعادتى على اعتبار انى معزة مثلا :))
اقول لكم لا لم اندم سيدى على شىء وحتى اختيارى له كزوج وهذا ماكنت اندم عليه قبلا ارانى الله عز وجل حكمة فيه لم اكن لادركها الا باختياره والحقيقة انى اتعجب كيف يصل لاحد شعورى بالندم ؟؟ وربما هى اعباء امرأة مطحونة اختارت الطريق الاصعب فتئن احيانا ...ليس الا
دمت بالخير سيدى
وتحية من وزارة التعليم ولوزارة البترول
ابلتى جوجو انا كدا حلوة ؟؟؟
يقول انى امرأة
احيانا تكون الازمات صقلا للمعدن الاصيل فيبرق ويظهر جوهره الثمين ارجو الله ان تكون هى كذلك
اعرف انى لا احتمل جروحا ولا حتى تهويشا بجرح وقد تجنبت الكثير من العلاقات الطيبة بسبب ذلك ولكن حبيبتى سندريلا لم تستسلم ابدا وواصلت بذل الحب دون مقابل حتى استحييت من صدق مشاعرها ونبلها ..
لا تقلقى فانا الان سيدة راشدة تعرف ما تفعله
دمتى بكل الخير حبيبتى
ميتوووووو
ياه يابنتى ازيك
والله وحشتينى جدا
ازى اطفالك ؟ارجو الله ان تكونى متدبرة اموركم معهما جيدا اعانك الله يا ست الكل ولا تحرمينى طلتك
جنى ؟؟؟ جنى مين ؟ انا اعرف حد بالاسم ده؟
اه ..اه افتكرت بتاعت البصلة
رغم ان كلامك سليم مية فى المية بس بردوا انا زعلانة منك ومش حكلمك الا لما تصلحينى
بقى اجيب الغريبة من المعادى للاسكندرية والاقى تليفونك مقفول طاب لعلمك بقى اتكلت بقى ولا همنى
أستاذتى الفاضلة/ لعلها خير
جزاك الله كل خير..أنت إنسانة رائعة ومدونتك واحة جميلة لى أستمتع بقراءة الكثير منها...واراها من المدونات المحببة إلى قلبى لأنى أرى مدى صدقك وعفويتك والتلقائية الجميلة التى تتميزين بها.. كما اعجبنى كلماتك عن صديقاتك وأسرتك وعن إهتمامك بطالباتك.. وعلى فكرة كنت محضرلك ألف سؤال وإستفسار ولكن طالما بنزعل من اول سؤال يبقى بلاش ...
أما بخصوص أبلة مجداوية فمن خلال قراءتى لكلماتها الجميلة فإنى احبها فى الله وأراها كأخت لم تلدها امى وكثيرا ما تبهرنى بأسلوبها الشيق والممتع وأراها مثال رائع للمرأة المصرية المثقفة وودت لو كانت أختى من امى وابى..ولااجد من الكلمات ما يوفى حقها ...أراها إنسانة بمعنى الكلمة وأراها تتفانى فى إسعاد القراء بإضافة المعلومة النافعة والمفيدة...فارجوا منك تبليغها خالص تشكراتى فهى عندنا أغلى من الجشطة(كلمة تعلمتها منك) ...فشكرا جزيلا لك وشكرا جزيلا لوزارة التعليم وصلت التحية...بليز ماتسمعيش كلام أبلة..فيل فرى فى كلامك وكسرى الدنيا...دمتى بكل خير ولك منى كل تقدير وإحترام
استاذ احمد
اهو كدا الكلام افتح يعنى؟ :)))
اولا مجداوية دى لا يكفى الكلام عنها ابدا فهى ليست اختك وحدك سيدى بل اختنا جميعا وان اردت السؤال عنها فاسألنى انا عنها ومراد ماكان من كلامى هو انها دائما ماتصوب ما سقط منى وتعلم انى مودية ومزاجى يتعكر سريعا ويحدث توابع لذلك وقالت لى انها لم يعجبها ردى عليك فى اول مرة وكان ذلك تدريبا منها لى على حسن الخلق والتريث قبل التعامل بعدوانية وعلمتنى اشياء لااقدر على حصرها فهى استاذتى الفاضلة وفوق راسى من فوق وتحت كمان اى عند الترقوة اى تحنقنى براحتها بس لعلمك بقى هى بخيلة على وماردتش تدينى حبة شوربة حتى
ثانيا : اسأل سيدى ما بدا لك وانا حستعبط ومش حرد على اللى انا مش عايزة ارد عليه ..
اسعدنى ان يكون(قالبى الواحد) قد نال اعجابكم الكريم دانتوا وزارة البترول بحالها حد يقدر ينطق
جوجو حبيبتى
حقا وصدقا اشتقت اليك
يوم 8يناير زفاف ابنة عمى فانتظرى بلوة تطب عليكى وتحية من اهل المعادى لاجدع اسكندرنية
السلام عليكم
وانا اقول عمالة اشرأ ليه أشرأ ليه
اللهم اجعله خير
كووووووووول ده وأنا مش دريانه
والله يا جماعة انتوا واخدين فيا قلم فاملى سايز
ومش تواضع ولا حاجة بالفعل دي الحقيقة
أخي الكريم المهندس أحمد مصطفي
لا أستطيع وصف امتناني لكم واحترامي لشخصكم وان كان هناك تحفظ شرعي على كلمة أحبك فى الله للمرأة للرجل والعكس صحيح ولكن لن أفعل وأرفضها بقسوة أو بشجب وأنطح بها كأناس فعلوا سابقا ولكن ما شاء الله تعلمن سريعا كيف يرد على من يستحق الرفق واللين معهم
فأنا لا أزكيك على الله وجدت فى أسلوبك ما يدل على حسن الخلق وحب الخير للناس جميعا
وأمنيتك أن أكون أختا لك هى شرف وتاج لى وان كان بالفعل كلنا أخوة واعتبرني بالفعل أختا لك
لكن صدقا أنا أقل كثيرا مما تظنون فأنا لي عيوبي القاتلة وانضمت الى القائمة الطويلة منها بخلي بحبة شوربة على كلها خير
لكن ملحوقة أختي الحبيبة يوم 8 يناير حاعملك مرقة كتكوت وياللا ان شالله محدش حوش وان شالله مدفعتوا الايجار
حتنوري الاسكندرية ويارب يكون الجو يومها كويس نقدر نتمشى على البحر شوية
فى انتظار تشريفك والحق بقى اضف الشقة عشان الوزير جاى
:)
:)
وجني نحضرلها البصلة
وبرافو عليكي على أدبك وكمالك ما شاء الله ,, شتمتني بس
:)
:)
من لا يعرفك يجهلك فأنت كلها خير بحق
==========
نستوني التدوينة
اه
الضحايا
الابنة سندريللا بالطبع
والأم لأنها ضحية تربية خاطئة لم تتعلم فيها كيف تكون أما
واحنا
قراء هذه القصة الحزينة التي تدمي القلب وتجعلني اتذكرها كثيرا
لكن لأن الله أرحم الراحمين فلعل الله يخبأ لها نهاية اسطورية كنهاية قصة سندريللا وتجد فى النهاية رجلا أسطوريا يحقق لها السعادة المفقودة ويعوضها بكل الحنان والحب
وما ذلك على الله بعزيز
يا نسمة
طلعى الكتكوت من الفريزر عندنا وليمة يوم 8
:)
:)
مستنياااااااااااكي
جوجو ..
بحبك اوى بجد
وحبيتك اكتر بمرقة الكتكوت
اجيب بقى حلة البخار معايا للاحتياط
على اساس اننا حنبخره :)))))))))
عسل والله يا بت يا لعلها
اتضح كمان ان السابع من يناير يوم الحنة يعنى حطب بدرى يوم ولربما مالاقليش بياتة كمان فاهو ابات مكان المرحوم قصدى الكتكوت يعنى
وياحبذا لو تجتهدى انى احبك اكتر بعد كوباية شاى كشرى فى مج ازاز ونعد نفرقع صواريخ على بتوع 45 هههههههههههه
فى غاية الشوق لرؤياكى والصدف جى قبلى سيادتك
اما عن البت بتاعت القلة المندسة دى بتاعت البصلة فهى لسه ماصالحتنيش ومش بعيد تزوغ زى العيد
انا حنزل افطر مع ولاد اخويا استينينى بالليل على 10 كدا كونى اون لاين
قبلاتى لبسمة
جوجوانا اون لاين بس فى مشكلة فى الجوجل توك بحاول اظبطه لاتقلقى انا جىىىىىى
اولا:وحشتيييينى جدا
ثانيا:كل سنة وانتى طيبة ويارب يكون عام هجرى سعيد علينا جميعا
ثالثا:من لها مُدرسة او صديقة مثلك المفروضة تبقى قوية جدا
رابعا:انا ايضا احمد الله كثيرا باننى مطلقة بلا اولاد
خامسا:فكرى بقى هتقولى لسندريلا ازاى على الحقيقة دى
سادسا: ما تتأخريش علينا كتير اوى كده
سابعا: بحبك جد
ثامنا: ربنا يسعدك
تاسعا:مش فاكرة
عاشرا:قلت بحبك قبل كده صح
بجد من قلبك بتدعى انك من غير اطفال
انا شايف انك اقدر حد على تربيه طفل
او احق شخص بان يكون ام حانيه عظيمه
مش زى الام الى فى البوست الى اصلا خساره فيها كلمه ام
البوست مؤثر جداً
تسلم ايدك
تحياتى
بحان الله له في خلقه شؤون هقول ايه بس على الامهات اللي من الصنف دة
يا خبر فيه ام تقدر تنام وبينها وبين عيالها اكتر من 3 متر
ايه الجبروت دة
الله يبارك لك يارب ويفرج همك ويشفيكي
إرسال تعليق