دليل المطلقات 3

هذه الصورة اعجبتنى فى احدى المدونات ولا اذكر ايهم فهم كثر فعذرا لصاحبها فى

عدم استئذانه ولكنها انسب ماتعبر عما اريد قوله

سيدتى

الامر ابعد ما يكون عن القوة والفتونة ....

انما هو قمة الضعف والفقد ..الذى يثبت انتفاء حولك وقوتك ليثبت انه لاقوة ولا حول الا به سبحانه

.............

هو الطفو بعد العجز من المحاولات المستميتة للنجاة من خضم الامواج التى تعصف بيكى من كل اتجاه

وانتى بقارب صغير بلا مجاديف ولا محرك وكمان مخروم

هو النجاة رغم ذلك بالله فقط

................

هذه التى تتحدثين عن قوتها وشجاعتها لم تريها فى مثل ذلك الوقت من اربع سنوات

كانت تدخل المطبخ تحمل كيس الخضار لتعد الغذاء فى حوالى الساعة الثالثة ظهرا

فتجد نفسها فى الرابعه الا ربع ومازالت فى نفس وقفتها ..

فقط لانها تحاول ان تفصل مابين مااعتادت ان تطبخه له..

وما اعتادت طبخه وبطريقتها قبل زواجها !!!!!!!!

.....................

لا علاقة بالقوة فى الامر

انما هى الاعتراف بالبشرية العاجزة الموهومة بالقدرة على الفعل ..

الاعتراف التامة بالانوثة المكسورة فى صميم صميم كبريائها

بالاعتراف بالالم المتغلغل فى اعماق اعماق روحك ...

كل هذا دون ان تقهرك او تكسرك تلك الالام ..

ازاى ؟

بالرضا

نعم

الرضا فقط

ما الفاعل الا الله

ما انا فيه ماهو الا خبرة كما اتفقنا قبل ذلك

اذن هو الرضا والفرح كمان مع سبق الاصرار بهذا القدر

وبقضاء الله فىّ ..وفيما اراد لى

............

كثيرا ما كنت اتعجب من الاجانب من تقبلهم لمصائبهم بسلاسة مع وجود الالم

كنت اتهمهم باللامبالاة ..والبرود العاطفى وعدم احترام الحزن وقدسية المصائب

التى توارثناها وتوارثنا معها طقوس تنكد علينا وعلى اللى خلفوا خلفوا خلفونا

وتبقى يا عينى مولعة بنار الامر الداهم عليكى

ولازم ولابد تشيطى زيادة ادبا مع عرفنا السائد فى التعامل مع المصائب

ولا بأس من الكثير من الاغماءات والامراض النفسية والاتشاح بالسواد

واحراق كل الملابس الملونة على اعتبار ان لبسها عار عليكى فى ازمتك هذه

..

وزيادة وامعانا فى التفانى الرائع فى السخط وعدم الرضا والتزاما منا بالاحترام للمصائب

ان تغلقى كل منافذ الهواء ..ولا بأس بالخروج الى العمل لكن مع باقى الاتفاقية من دلدلة الراس

والمشى متنية الظهر محنية العود كبقسامطة فى شاى بلبن

................

ايه يا بنتى ده ..

فى ايه ؟

حنتوراث الهم ده ونورثه لغيرنا لامتى وليه ؟؟؟؟

.............بس استوب

من النهاردة خلاص

بطلى تستنى حد يجى يطيب جروحك ولا يرطب مشاعرك الجافة

بلا خيبة

...

.....

...........

...............

...........................

بذمتك يا شيخة اسألى كده اى واحدة مين برطبلك مشاعرك الجافة ؟؟؟؟؟؟

بس بشرط !!!!!

ماتزعليش منها لما تقولك

يا ختى اتنيلى

!!!!!!!!!!!!

..

عندنا ثقافة الانتظار غريبة جدا

خاصة فى الستات

من اول مانفتح عنينا من ولادتنا الى ان نموت

وثقافة الانتظار ..متواصلة ودائمة

من اول ماتستنى العدل لما يجى يعدلك ويخيب امالك كلها

ومرورا بانتظار الفرج بالخلفة وانتظار الزوج التانى ولا العاشر اللى حيعوضك

كل اللى فاتك من الصرم اللى ماعرفوش قيمتك

الى انتظار الموت كالافيال فى مقبرة الشلت والتتنيحة ادام التلفزيون

وعيادات الدكاترة واوزان الخراتيت كنتيجة حتمية للامراض النفسية والاكتئاب

( مع اعتذارى الكامل للسيدات البدينات بطبيعتهن وهن غير المعنيات بما اقول فيها )

............................

المهم

نفسى تبطلى انتظار

انا لااقصد ابدا ابدا تبطلى تحلمى او ترجو املا من الله عزوجل

لالا طبعا

مين فينا مابيتمناش رفيق يعينه على الحياة ويشتريله كيلو لحمة فرى من غير مايقوله هات 60 جنيه

ويسبيه يكلها لوحده

كلنا طبعا

مين فينا مانفسوش فى واحدة محترمة تريح باله وتهنيه وواحد (مش له ..لها ) طيب وابن حلال يريح بالها

ومايشمتش فيها الاعادى والاكادى وسكان الوادى

كلنا

مين فينا مانفسوش فى طفل يجى عيد الام وباباه بيذوقه

وهو جايب وردة عينه طلعة عليها وباباه بيغششه قل لماما كل سنة وانتى طيبة ..

لا ينطق الا بكلمة او اتنين وهو مش فاهم فى ايه

كلنا

لكن

الى ان يحدث ذلك

او ما يحدثش

او عنه ماحدث حتى

ها ؟؟؟؟

انتى فين ؟؟؟؟

منتظرة

برافو

هايلة

تحفة

اومى من وشى ..الا انا خلقى ضاق

.........

كنت فى انتظار فى عيادة وكعادتنا المحترمة جدا ميعادى اللى متحددلى فات

وانا مرزوعة اكتر من ساعة

ساعتها حسبتها زى ماقلتلك

وقررت كل مرة اعمل حاجة جديدة فى الفترة دى

تانى مرة

خدت معايا

ابر التريكو - كتاب غادة عبد العال - سبحتى

- دفاتر الشغل - يومياتى - المبايل(معايا طبعا على طول بس ا لنية فى الاستخدام مختلفه المرة دى )

وحاجات من دى كتير

وقررت انى اعمل لستة

things to do

اشياء يجب عملها

و يا ختى ماقولكيش كل الناس مبحلقة لى كدا كأنى بقشر كوسة

مع انهم هم بيعدوا بالساعات ساكتين ويبصوا لبعض وبس

بس انا اللى عجبة !!!!!!!!!

...............

قررت يكون للانتظار معنى ..بدلا من مجرد السكوت ...

او التذمر ولعن سلسفيل اجداد الدكتور ومواعيده

...........

اللى اقصده ...

الايجابية فى كل شىء .. الايضيع عمرك حسرة والم ونكد وغلب

ماكفاية يا بنتى .. انتى ناقصة

ماتخلى كل يوم انتى انسانة متجددة ..

مش لازم تكونى ممتازة وعارفة انتى عايزة ايه

لكن حاولى ........ مجرد محاولة

بس صادقة

وعشان تكونى انتى

لازم تحاولى تكونى اللى انتى عيزاه

ساعتها حتعرفى من فشلك ونجاحك انتى مين

وعايزه ايه

تعيشى عشان تتجوزى تانى وتكيدى امه ؟؟

ولا تعيشى وتبقى انسانة حقيقية ؟؟؟؟؟؟

جه رفيقك خير .........ماجاش لولولولولولىى

الف بركة

...............

عارفة ليه

لانك ماشية فى طريقك .. والرفقة معين ومساعد ..

مش هى اللى عايشة عشانها زى ماضحكوا عليك وانتى صغيرة وفهموكى كدا

عزيزتى

اتعلمى تبصى للنهاردة وبس لابكرة ولا امبارح

النهاردة ( اشياء يجب عملها واحب اعملها وعايزة اجربها وعمرى ماعملتها )وليه لا

مادامت لاحرام ولاعيب ولا كخ يا بنت

.........

خلى بالك من نفسك

وافتكرى

النهاردة

والنهاردة وبس

دليل المطلفات 2

عزيزتى :

ها ؟ احسن اليوم ؟ ...

....................

اعلم انك تتأرجحين فوق فوهة بركان تارة ..وفوق جبل من الثلج تارة اخرى

تشعرين بالبرد فى قلبك وزاد احساسك بالبرودة اكثر
وفجأة تشعرين بالحماس والثقة وتضربيها صرمة
.....................

وترجعى تانى تحسى بعدم الثقةوتتردد فى داخلك ملايين الاسئلة:

- انا عملت ايه غلط ؟

-كان ممكن ايه اعمله تانى ؟

- انا وحشه؟
يمكن لو كنت جميلة بما فيه الكفاية ماكنش ده حصل؟!!!!!!!!

-يمكن لو..

بسسسسسسسس

ممكن نقعد للصبح فى التساؤلات دى ومش حنخلص
,,,,,,,,

يا حبيبتى ...

واجهى الواقع ماينفعش تبصى خلاص لورا

..............

تعالى

هاتى ايدك

قومى

أن الاوان تقفى على رجلك ..اي كان اللى حصل

خلاص

خلصت

مابقتيش حرم فلان

مابقتيش مدام علان

انتى فلانة بس

انتى مدام وبس

ببساطة

مطلقة ووحيدة

بس

بايدك تغيرى احساسك انتى
وبالتالى حيتغير مشاعر الكون ناحيتك

ححكى لك حكاية صغيرة

زمان لما كنت فى الكلية كنت بحب نوع الجزم الفلات يعنى الارضى

وكان كل البنات بتلبس كعب عالى ومفيش محل بيبيع فلات خالص

وقررت ...

اشترى شوز رجالى بس تدى على حريمى

وكنت حديث الجامعة كلها والكل جاى يتفرج على البنت اللى لابسة جزمة رجالى

ووالله كانت ايطالى محترمة واغلى من اى جزمة بس كانت مريحانى

ومكنش لى صوت فى الجامعة وفى حالى

كانت كارثة
خلت كتير مايمشوش معايا !!!!!!!!!!!!!!!!!!!

عشان لبست جزمة مريحانى !!!!!!
والكل بيعترف بجمالها وشياكتها
بس
مخالف لما اعتادوا عليه !!!!!!!!!!!

وبعد شهرين ...

كان فى اكتر من واحدة وواحد لابسينها !!!!!!!!!!

بس ماكنش غرضهم يريحوا رجلهم!!!
فهمتى قصدى؟؟؟؟؟؟؟؟؟؟؟؟

الناس مساكين ..
زى الاطفال يختبروا قدراتك طول الوقت
لو طاوعتيهم طول الوقت حتخسرى وتخسريهم
لكن هما كمان زى الاطفال.. الصدق يلمهم ويحسوه
فكونى انتى فقط

اذا جرحتك نظراتهم فقابليها بنظرات الرفق

ولن تندمى

.............

قلبك ؟

موجوع اعلم هذا ... لكن سيشفى قريبا ..لا تقلقى

كم من الم مر علينا وتصورنا انه نهاية الدنيا
ولا يمكن ان نمر عليه مرور الكرام
واكيد حياتنا حتقف ..لكن بيعدى

وسبحان من خص نفسه بالرحمة

سبحان من له الربوبية ولنا عبودية
رائعة هى تجعلكى تثقين ان لك ربا رحيما

تلمسين كرمه- ان لم يغمرك- ليل نهار

جابر الكسر
وآه من هذا الكسر

كم كنتى ترفضين ان يدعو عليه احد بان تكونى ارملة
بدلا من ان تكونى مطلقة

ياالله ..

الارملة هى سيدة متوسية دائما مكرمة بعدم مسئوليتها عن قدرها
(وان كان هناك من لا يرحمها فى هذا ايضا ) على غير المطلقة
ولكن ...

افعلى مثلى اذا اردتى وفكرى مثلى ...
(فانت الان تملكين اختيارك)
مطلقة وايه يعنى

ثقى ان الله لايكلف نفسا الا وسعها
(اليس كذلك ؟)

اذن انا استطيع ان اتدبر امر هذى المشكلة

اذن الامر ليس اكبر منى

اذن فانا باذن الله قادرة على اجتيازه

اذن فليكن مايكن
.............

والمشاكل ؟

بعد عشر سنوات من الان
ماذا ستكون طريقتك فى سرد قصة طلاقك ؟

بنفس مرارتها الان ؟ ابدا

بنفس اوجاعها الان ؟ابدا

المشاكل والاوجاع موجودة ودائمة ولن تنتهى وجميعنا يعلم ذلك

من تعيش هانئة دون منغص يؤرق عينها فلترفع يدها

لا احد

ليه ؟

لان الدنيا مرادفها المشاكل والتعب

يبقى من البله انى افضل اتعب للمشكلة
واتعب لاحساسى بيها واتعب لاجترارها

واتعب وانا بعديها واتعب بعدها
واتعب كمان من قبل ماتيجى استعدادا لها

.........................................

المشاكل لن تنتهى

ومشكلتك الان تدريب للاخرى التى ستأتى

وكلما قويت الان ستعبرى الاخرى بامان

زوجك القادم له مشاكله ومتاعبه وعيوبه ودنيا جديدة
او مش حتتجوزى وحتواجهى نوعية مشاكل مختلفة
يبقى

اتفقنا
الدنيا = ..............

خلاص بسيطة

النهاردة انا فى مشكلة هينة وربى معى
وبكرة ممكن يكون فى مشكلة مختلفة بشكل اخر
لكن
خلاص اتعلمت انى اقدر اواجه الدنيا من غير رجل
بقلب من حجر ؟؟
لا

بقلب


فى رقة الورد

دليل المطلقات ( 1)

عزيزتى :-
انا لست خبيرة فى الطلاق حتى انصحك ..
لكن انا مثلك
اشعر باوجاعك.... اعرف مالا يعرفه الاخرون..... حينما تديرين وجهك عنهم اراكى
لا أملك ان اعطيك ماطلبت ولكن ما استطيعه هو ان اقول لك مافعلت انا
..وسامحينى للتقصير
اولا
لاتخجلى من الطلاق
لماذا لاتخجل المتزوجة اذن من انها متزوجة ؟
......
انسى مافعله بك ولا تحاولى ان تنسيه
هو مسكين ظن انه رابح ..تأكدى ان خسارته لاحد لها
سامحيه واغفرى له ماحدث يعود ذلك على قلبك بالخير
صدقينى .
اعترفى فى داخلك انك ضعيفة مكسورة
هذا طبيعى وحتمى
.........
لاتخجلى من دموعك اذا انهمرت وهم يسألونكى عنه وعما حدث
فماذا كانت تلك السنوات اذن
ابكى بيتا هدم
ابكى قلبا تعرى وبات هزيلا لايملك دفئا
ما العيب فى ذلك ؟؟؟
ليس المفروض ان تسعدى انه اصبح غريبا ..
انه لم يحاول ان يساعدك ..
ليس من الضرورى ان تبكيه هو ..
لديك ملايين الاشياء الصغيرة التى ربما لايعرفها هو عن نفسه ولم يرها فى حياتكما
لكنها كانت تبقيك ..... وتصنع يومه
........
لاتفسدى روحك بالتراشق فى معركة انتما فيها خاسرين
لا يربح الا من رقى وترفع عن اشياء باتت باهتة لامعنى لها
والناس ؟؟؟
لاتستمعى لتأويلاتهم ..
ومن الان لاتهتمى الا بما يدفعك الى الامام
هم لايحتسون دموعك عن وسادتك
عاميلهم بشفقة العارف للجاهل ..
معاملة رحمة فهم لم يفهموا ..لم يعانوا
.....
لاتحطمى الاوانى ..فستحتاجينها
افرغى شحنتك فى اشياء لاتضطرين لسب نفسك عليها بعد ذلك
..........
اعترفى انت مطلقة
اعترفى انها سخيفة وثقيلة ومقبضة
تعودى لفظها فسيصاحبك امد
............
فعلت كل مااستطعت .. فشلت ..!!!!!؟؟؟؟؟؟؟؟؟؟
ولما لاتكونى قد نجحت ..
.............
من تتاح له فرصة البدء من جديد
ليس مهما ان تكونى فوق الالف سنة
الاهم انها بداية لاتسنح للكثيرات
..............
طلبت الخطوة الاولى واليكى ...
اغلقى بابك
واسجدى
الكل نيام
والاحبة معا
وانت وحدك
لا تجزعى
لست وحدك
الله معك
خذى نفسا عميقا
.......
..........
................
..........................
.....................................
لا.... لاتمنعى نفسك ان تنهار لاتخشى شيئا
هو لن يعيريك
دعى الصفاء يتسلل الى اعماق روحك
ياااااااااااااااه
من امتى مارتحتيش ؟؟؟؟
ما خلاص .. ارتاحى
المشرط ..ماكنش مؤلم اوى زى ماتصورتى
اهدى ...ارتاحى ..
بكرة يوم جديد
وابكى .. قبل ان تحفر الدموع لها خندقا فى روحك
ابكى ..
........
....
..
.
نامى حبيبتى
لاتخشى شيئا
فالله معك

مين دى 2

كانت ليلة شديدة جدا

تملكنى الخوف .. وزاد احساسى بالقهر

ورغم ذلك كنت عنيدة .. صلبة

ظللت طوال الليل افكر ماذا افعل كان لابد من سرعة وحسن التصرف

يارب لا تتركنى ..الى من تكلنى ؟

الى بعيد يتجهمنى ام الى عدو ملكته امرى ؟

ظللت اكتب بغضب اخرج شحنة العصبية..عشان مافقدش اعصابى بكرة

فى الصباح كنت متورمة العينين ..قلبى يترجف

لم احك لاحد من اسرتى

لا اريدهم ان يشعروا بالعجز اكثر

................

توجهت الى الادارة استقبلنى وكيلها وسألنى : اسمك ايه ؟

قلتله اسمى

الرجل ظل ينظر لى باستغراب ..:انتى لعلها خير ؟؟؟؟

قلت نعم ؟

قال شكلك مايجبش الكلام ده خالص !!!!!!!!

: كلام ايه ؟ قالى ايه المشكلة ؟

حكيت له سألنى :انت بالحق شتمتيه ؟

:ايوة

قلتيله ايه ؟

قلتله :انت تيس وحمار وعمر فلوسك..................

:ضحك الرجل وقالى ليه كدا ؟

:شتم بابا

ولو اتعاد الموقف تانى حشتمه تانى وحفتح نفوخه كمان

ولو حضرتك مكانى وابوك اتشتم حتعمل ايه؟

سألنى :هو الراجل ده بعد طلاقك ضايقك بحاجة ؟

: لالالالالالالالا بصراحة هو متخلف وفيه كل العبر الا قلة الادب

لالالا لا خالص والله

: بصلى وقالى انتى بنت محترمة تعالى معايا

ركب العربية بتاعة المصلحة وجاب اتنين شهود ورحنا له

الرجل شافنى كان حيجليه شلل اطفال متأخر

ربنا كان واقف جنبىاوى

الرجل كان بيدافع عن حقى كأنى بنته مش اول مرة يشوفنى !!!!!!!!!!

كنت واثقة من ان ربنا مش حيخذلنى

وفعلا اترجانى الرجل انى اخد فلوسى من غير شوشرة

سبحان الله

لانه مش كويس واساليبه ملتوية ظن انى مسنودة

سمعت بعد مدة انه جاله تليفون من الوزارة امبارح

بيقوله بلاش شوشرة وخلص المشكلة اللى عندك!!!!!!

انامكلتمش حد وواضح ان التليفون ماكنش لى ولكن ربكم بقى

سبحان الله

وانا خارجة بصيت للامن والدادات وهما بيعملوا علامة النصر

فابتسمت لهم وخرجت

............................

هو دا ظنى بالله ..

الرجل ادعى انى شتمته شتائم مش محترمة والرجل اللى ساعدنى سأل عنى قبل ماروح ل

واتاكد انى مش ممكن اقول الالفاظ دى

سبحان الله

يا كرمك يارب

ماكنش صاحب المدرسة يعرف انى عملت فيه محضر

كنت مصرة على رد كرامتى ادام نفسى اولا

مش كلهم كانوا جوزى

المرة دى لازم اعرف انا اقدر اعمل ايه ؟

المرة دى لازم اى حد يفكر قبل ما يهنى

مش حسمح بالاهانة ابدا تانى

خلقت مكرمة وان شاء الله حعيش مكرمة

المحضرقصة تانية

اليك

اليك اسير .. وحيدة..

تمتد يدك تربت على اوجاع العمر

يسيرة هى

....

عظيم انت..

.........

الان

اسير بك اليك

فمن لى الاك ؟

..............

الكل هباء ..وانت وحدك الحق

.....

اسير اليك

..........

وحدى

.......

اعلم انك معى

مين دى ؟؟؟؟؟؟؟؟؟؟؟؟

فى الشغل ننسى نفسنا مش همومنا بس تتخلق هموم تانية

بنتركها على سطح مكتبنا ونتنفس نفس طويل مع دق الجرس
مشاكل التربية واختلاف انواع الناس اللى بتتعامل معها ومايزرعوه فى امخاخ اطفالهم

بتدخل الطفل فى حيرة والمدرس ايضا
طول عمرى مدرسة مزعجة
مشاكلى كتير .. وعندى ليس له مدى .. شغلى الحاجة الوحيدة اللى ادعى انى افهماها
اكره اساليب مدارسنا سواء الحكومى منها والخاص
تخيل واحد معاه قرشين يعمل مدرسة وكل القوانين تبقى على مزاجه والوزارة

مالهاش الا الشكل والاوراق
لكن فين التربية مافيش ..فين الدين (نهارك اسود بتتكلمى فى ان الاولاد يبألهم كدا وعى بدينهم كدا

ويبقوا بيصلوا من نفسهم من غير من هشهم واقعتك بيضا منقطة بالوان الطيف بالليل )
لا شغل نافعة ولا زوجة نافعة ولا ست نافعة اولع فى نفسى واخلص

وحتى كدا حدخل جهنم يعنى تبقى دنيا واخرة!!!!
ماعلينا
فى نهاية العام
كنا بعد الامتحانات وفى اجازة واول يوم عودة لى
دخل صاحب المرسة حاجة ابهة ..بدل ايه ..برفانات ايه ..مرشيدس ايه ...
روح بقى اتكلم معه بقى كلمتين ...
بيقول معاه دكتوراة ..عملنا مسابقة بينا مين ممكن يعرف هو دكتور فى ايه ومنين

واحنا نروح نجيب عشرة احتياطى
كل واحدة تسأله ينسى ويقولها اجابة مختلفة عن التانية وفى الاخر اكتشفنا انه دكتور

فى حاجة علمنا العقيم القاصر لم يصل اليها بعد
(انا ماعنديش اى اعتراض ان الناس تستثمر فلوسها فى مجال التعليم

(على فكرة القصة دى مربحة جدااااااا)
لكن اعتراضى الوحيد ان هم مايدوش العيش لخبازه
يعنى يتحول المدرس لاداة تنفذ رغبات واحد اجهل من ال ...ايه ؟ مش عارفة ماعلينا
انا اعرف ناسى جهلة اميين لكن علم وثقافة ماحلصش لدكاترة راجعين من برة
..
المهم ماطولش عليكم
قولوا طولى
........
ماحدش قال ليه ؟
ماشى
الرجل لاقيته بنادينى فى مكتبه ودار الحوار ده بالظبط
هو : انتى جيتى امتى ؟
: من الساعة 8 الصبح
هو : امال ازاى ماتقوميش تقفى وانا داخل ؟
:افندم ..مش فاهمة .
هو: ماحدش علمك تحترمى اللى اكبر منك ؟!!!!!
: حضرتك ماكنتش بتكلمنى عشان اقف وبعدين بينى وبينك

حضرتك اكتر من عشر امتار اقوم ليه ؟
:انتى اصلا ايه اللى جابك ؟ احنا بعتنالك جواب رفد على بيتك
(كنت قد بدأت افهم .......اخيرا ...نبيهة انا اوى .......... البيه

عرف انى اتطلقت من فترة ورفض محاولات بعض الزملاء والزميلات طلب علاوة او زيادة

- استحقها واتاخرت - نظرا للظروف الجديدة
الباشا صاحب السبعتاشر دكتوراة فى كل التخصصات اللى فى الدنيا لى عنده التزامات

مادية المفروض يدفعها شهر 8 واحنا كنا فى 7 ام عمل ايه ؟؟؟

بعت الجوابات على عنوان طليقى وكانت الشقة مقفولة طبعا وبكدا يحق له رفدى ببساطة
: انت شكل حضرتك كدا فى حاجة عايز تقولهالى ياريت تقولى كدا الموضوع على بلاطة .
هو: بلاطة ايه المستوى الشوارعى ده (على انها السوقى يعنى بس الدكتوراة كانت واقفة فى زوره )
انتى جايبينك منين له حق يا شيخة والله
:بقولك ايه انت تتكلم فى حدود الشغل وبس غير كدا والله ماحسكت

انت مفكر انى مافيش لسان يرد يعنى ولا ايه على العموم بينى وبينك الوزارة
هو: لعلمك انا مضيتك على ورقة انك متنازلة عن حقوقك

وعليك عهدة بخمسين الف جنيه يلا يلا اتفضلى بره
الحقيقة ضحكت
كنت عارفة انه البعيد غبى جاهل مابفهمش
استفزه ضحكى
هو: اطلعى بره ودينى مانتى دخلاها تانى
:ودينى انا بقى لاخليك تترجانى اخد فلوسى نتقابل قريب سلام
وادورت خارجة لاقيت شتم بابا اتجننت
هو نفسه فوجىء برد فعلى كان معروف عنى انى مش بغلط فى حد لكن الا اهلى يا ولاد ال.......
:انت تعرف ابويا مين يا جاهل يا تيس يا عمر مافلوسك حتعملك بنى ادم دا جزمته برقبة عيلتك كلها

مادرتش بنفسى .......يا ولاد الهرمة بقى كل واحد يبهدله بسسببى .....هما خلفونى

عشان اشكالكم دى تشتمهم

لاقيته كش زى القطة وكان واضح انه مكنش متصور انى حغضب كدا
طلب الامن يطلعنى برة ولما شاف الامن اتنفخ تانى
الحقيقة ان الامن بقى واقف محتار وجات دادة وسمعته وهو بيشتم بابا
وبقت تطأطا ببقها بقوا محتارين مابين علاقتنا الطيبة ومابين اكل عيشهم عند بنى ادم زى ده
خرجت وانا حاسة بغضب لو نفثته فى غابة لابقت رماد
قبل ماامشى سمعته بيقول روحى اشطرى على اللى اخد حاجاتك
رجعتله وبمنتهى الهدوء : كان جوزى ..اما انت بقى

فاقسم بالله لاوريك انا ممكن اعمل ايه فيه وفيك
.....................................
مين دى ؟؟؟؟؟؟؟
ايه السفالة والوطى والقوة والتحدى ده ؟؟؟؟؟
مين دى ؟ جات امتى ؟؟؟ جابت الكلام ده منين ؟؟؟
..................
خرجت الى الشارع وكل العمال بيصمصموا شفايفهم ويتصعبوا على وعلى بختى
..............................
رحت القسم .ايون ...القسم حتة واحدة
دخلت اطلب عمل اثبات حالة ..مين اللى قالى اعمل كدا ماعرفش ..
لكن تفكيرى هدانى لكدا انا موظفة ومنعت عن تأدية عملى لسبب انا مش مسئولة عنه ......
وبما انى فى القسم محضر سب وقذف فى حقى وحق والدى
طلب منى الشخص اللى بيعمل المحضر احكيله اللى حصل ..
قلتله ......قالى لا كدا مش حياخد حاجة حبشيلوا المحضر
طبعا فهمت مش عايزة فتاكة يعنى ..
قلتله لا انا عايزة حقى بس ولو كذبت ربنا مش حيقف جنبى اما كدا فان شاء الله حيدبرها ربنا
الرجل بصلى كأنى من المريخ ..
مع الفترة الاخيرة فى الوقت ده كان ممكن يكون ده اسوأ ايام حياتى
وانتم عارفينى اموت فى النكد ..
الا انى ودا كان الغريب اوى كنت انسانة تانية
اعدت على رصيف ومسكت ورقة وقلم والناس رايحة وجاية بيقولوا حاجات
وبقهم بيتفح بس ماخدتش بالى بيقولوا ايه
حددت خطواتى باقى اليوم وبكرة
اتجهت الى الادارة وقدمت شكوى اترفضت ولاقيت

انه اتصل بيهم وعاملونى معاملة وحشة جدا
العجيب بقى انى ماهمنيش .... يا جدعان مين دى والنبى ؟
الوقت كان خلاص بعد 2 قررت بكرة اروح ادارتى انا اللى انا جاية منها

ماهوكل واحد اخرته للادارة اللى جاى منها برضه
روحت البيت ... رميت الشنطة
وحلفت بصوت عالى ماشى يا مصر ودينى لاعرفك انى متاخدتش على قفايا مرتين
وبدون وعى تحسست مؤخرة راسى

كلنا هى

كلنا هى

كلنا منى .... بعيوبها وانسانيتها ..

مين ممكن تيجى لها فرصة تكون ست محترمة وترفضها ؟

تفتكروا فى ستات كدا ؟؟

مااعتقدتش ولو موجود يبقوا شواذ ..خارج القاعدة

مين مابتحبش حيطان بيتها حتى لو سودا وظلال الكرب والنكد مغيمة عليها

مين لو سمحت لها الفرصة ببواحد فى المية بصلاح حال جوزها ولا حماتها ولا اى منغص عندها مش حتوافق

.........................................

منى وجعتنى اوى

كنت دايما اسأل نفسى لو حصل انك دخلت نقطة الرجوع منها صعب ؟

تعملى ايه ؟

بترعب من الفكرة دى

الحياة فيها كتير ومنى كانت شبه اوربية .........

لكنها انسانة

ياترى تحب مومس وتتجوزها ؟

مش ممكن وان كان ممكن فلكام ولمدة اد ايه ؟

صعبة الحياة ..اكيد

لكن فين ربنا جوانا ؟؟؟؟؟؟؟؟؟؟

تفتكروا كان حيسبها لو لجات له

....................

يا جماعة انا مثال حى لكرم الله

....................

اللهم اشهد انى اشهد انك رب حقا وانك كريم وانك رحيم بعبادك

................................

قابلتنى منى وانا مروحة بصتلى ووقفت بصيت لها ...

سلمت عليها وسألتها عن حالها

قالتلى انها خلاص استلمت شقتها وحتسيب الايجار

عقبالك

قالت الكلمة الاخيرة بسخرية لم تتقنها

كانت تحاول ان تقنع نفسها بما تفعله ولم تفلح ..قبلت خدها

-ربنا يحميك من نفسك اولا وبعدين من كل شر يارب يا منى

حتفضلى غلبانة مهما حاولتى تفهمينى العكس

نظرت لى ودموع متحجرة فى عينيها

-كل واحد بياخد نصيبه

- قلت لها

-لا كل واحد بيختار هو عايز يكون فين

ربنا عادل يا منى

لو فكرت ترجعى بابى مفتوحلك ........ الحقيقة مش حفتحه اوى بس اوعدك اوربهولك

-سالتنى خلاص مش حتعرفينى ولاحتجيلى شقتى الجديدة ؟؟؟؟؟؟؟

- قلتلها لازم ..اكدب عليكى لو قلتلك غير كدا

السكة واحدة ياورا يا ادام الاختيار لك انتى مش انا

-خلاص مادام كده ارجعيله ارجعى لطليقك

-ابتسمت ... قلتلك مش حرجع لوراء طريقى لادام مش لورا

وتركتها وطلعت شقتى الايجار الغرفة الواحدة والصالة والكرسين

لكن

حسيت انها واســعـــــــــــــــــــــــــــــــــــــــــــــــــــــــــــــــــــــــــــــــة