ليه هبة؟؟؟؟؟؟

ليه هبة ؟؟؟؟؟
وليه مش هبة يعنى ؟؟؟؟؟ مالها هبة فلة ؟؟؟؟
هى بس لسانها عايز حتة صغننة منه بس ايه عسل
(حلوة كدا يا زيكاس)
************************
اولا انا ربنا من على بصحبة فى الشغل بسم الله ماشاء الله
مافيش بعد كدا ...ستات كلهم زى الورد ... احسبهن على خير ولا ازكيهن على الله
قمة الخلق والادب والشياكة والتدين والخوف من الله والادب مع ازواجهن وفوق ده وده التناصح بالخير
هبة لمن لا يعلم اسكندرنية يعنى حلاوة بكسر الحاء مع بعضيتنا ..يعنى بحرى وعمد بحرى
يعنى الجدعنة والبق على الفاضى ... يعنى الاحبال الصوتية اللى زايدة عشرة
يعنى الذوق والضحكة الحلوة والتنطيط يعنى انا مالى ومالها اصلالالالالالالالالا؟؟؟؟؟
هههههههههههههههههههههههههه
الكل بيتعجب فى بادىء الامر من علاقتنا فهم يعرفون عن هبة انها ضحوكة بشوشة دائمة التهريج
لاتكمل كلمة بدون (افيه) يهلكنا جميعا من الضحك ... الرحلات والهيصة شغلة هبة ...
الجرى بالعربية طول النهار على المولات ........ طاب انا داخلى ايه فى ده كله
********************
هبة لمن لايعلم ......... احدى قليلات اذا خيرت من اخده فى سفرى الى القمر (قريب ان شاء الله تغيير جو)
اقول هبة
ليييييييييييييييييييه

شخصيتها
1- طبيبة صيدلانية رضت بالتدريس عن طيب خاطر لانه الانسب لبيتها وحياتها كزوجة التفانى والاخلاص فى شغلها مالوش حل ... مش ممكن تلاقى هبة بتزوغ ولا بتقول لحد امضيلى على الكمبيوتر ولا الكلام الفارغ ده هبة بتتقى الله فى كل مليم وفوق كدا وكدا بتجيب هدايا للطلبة اكثر من مرتبها ومش لان حد حيقولها برافو لالانها بتعرف ترضى الله فى كل شىء
2- عقلية غييييييييييييييييير عادية مخ صح مخ مش مدعى العلم ولا الثقافة لاتخجل من عدم المعرفة وتسعى لها
الدقة الشديدة مش ممكن تشترى حاجة الا بقراءة كل المعلومات عنها وان كانت ذات نفع ولالا
3- هبة دااااااااااااااااائمة الذكر مافى جملة من كلمة الا وفيها ذكر الله مع انها مسلمة عادية جداااااا لكن شوفوا هبة وهى داخلة تشترى او داخلة عربيتها مامن خطوة الا بدعاء دعاء السوق دعاء الركوب دعاء الاستخارة دعاء التفويض دعاء فك الكرب فى الاشارات الطويلة
4- هبة ترى فى كلام النبى عليه الصلاة والسلام اساس فى حياتها يعنى مع اى موقف اعيبه عليها تقولى على الفور :طاب النبى قال ايه؟وتسمع بمنتهى الانتباه والاجلال لكلامه صلى الله عليه وسلم وتكون الاسرع فى التنفيذ
5- هبة الظن الحسسسسسسسسسسن بكل المسلمين مامن مرة اتضايق من اى احد الاوكلمتها لانى اعرف انها لن تغلب نفسى وشيطانى على بل ستذكرنى بميلون سبب مش 71
6- هبة الرضااااااااااااااا الكامل عن حياتها بكل مافيها من غربة وبعد عن اهلها واصحابها ووجودها فى الخارج لسنوات ثم عودتها لاكمال الغربة داخل مصر...الرضا الكامل عن شغلها رغم كل ماتواجهه تلاقيها ببساطة تقول معلش اكيد ده احسن من غيره وكفاية الصحبة وكفاية الكولدير وكفاية البارتشنز وكفاية وكفاية لغاية مانعشق الشغل اصلا
7- هبة من اكتر الناس اللى بتعلم منهم ...عقلية لوجكلية كدا... منطقية تحلل كل شىء بترو وهدوء (دا ساعة ماتكون بتتكلم جد ودا ناااادر ) لا فعلا من اكثر الناس تعقلا فى المناقشة واكثرهم ادبا واكثرهم تبسيطا واتباعا لما يرضى الله )
8- هبة سيدة تعرف انها مصرية ذات جمال عادى زينا جميعا ورغم كدا ترى نفسها ذات جمال خاص تسألها انت جميلة فى ايه تعدد الاف الاشياء الحقيقة البسيطة لكن فى مجملها تصنع هرما من الجمال يزينه جمال الروح
النضافة عنوانها والاهتمام بالانوثة والحقيقة النوعية دى من النساء بحبها جدا مش مشكلة درجة الجمال الاهم كيفية التعامل معه ..الانوثة نعمة فعلا ..نقدرها جدا حين نشم عرق واحدة او نرى كعبها مشقق اثناء الوضوء انا ممكن اسكت لكن هبة لايمكن ..بمنتهى اللطف والذوق والتهريج تقولها وتنبهها (يا بنتى الاسلام دين نضافة انضفوا بقى اسلموا عشان ربنا يحبكم )
9- هبة وعربيتها رهن اشارة اى واحدة فينا ولما بسالها بتقدرى تعملى ده ازاى قالتلى :ربنا من على بالعربية لانه يعلم انها فى خدمة الناس ولو انا ماعملتش كدا يبقى حتروح منى لغيرى يقوم بالمهمة بدل منى !!!!!!!!!!
10 - هبة يعنى كل الحب لزوجها كل الاحترام يعنى عمرى ماسمعتها بتقول فى حقه كلمه واحدة ولو قلها حاجة ممكن تبقى فى عالم النساء كبيرة اوى منه تقول بكل بساطة لاهو مابيعملهاش بغرض يضايقنى ابدا دا ماشاء الله الله يباركله ملالى التانك وجابلى كيس شيبس ومن ست شهور اشترالى خاتم فضة ومن سبع سنين اشترالى خاتم سولتير وطبعا الكلام ده فى مجتمع شغلى عادى واقل من العادى بكتير لكن هبة ترى كل بسمة جوزها بيبتسمهالك كرم منه بتشكره عليها !!!!!!!!!!!
هبة رغم ان تعاملها انجليزى فى الماديات لكن كرم الدنيا فيها
لااتعجب ابدا حينما الاقيها بتتصل انها فى الطريق وطبخت كلة لذيذة بطعم جديد وعيزانى اذوقها وتيجى لغاية البيت عشان تدينى طبق فيه الاكلة اللى اكلت منها مع انها ممكن تجيبها تانى يوم ولو قلتلها كدا تقولى وتكليها بيتة ليه ؟؟؟؟؟؟؟؟
هبة اول واحدة تذكرنا بالمناسبات الخاصة بزملائنا واول واحدة تسبق فى اى لم فلوس للخير واول واحدة تيجى يوم رأس السنة الهجرية وهى جايبة قلم ولا كيس فلوس ولا حتى دبوس طرحة ولا تستحى ابدا من الهدية مهما كانت وهى بتقول :بصى انا افتكرتك ..حتزعلى لو انها حاجة بسيطة ؟؟؟؟
مين ممكن يزعل وحد فكر فيك ولو بحاجة بسيطة جدا بس بيقولك فيها انا بحبك
وتسألها لما تجيب هدية قيمة ليه يا بنتى كلفت نفسك
تتزربن وتقول : انتم حتلغبطونا ليييييييييييييه هو مش النبى قال كدا تهادوا تحابوا ؟؟؟؟؟؟؟
وفى مرة كنا بتكلم فى قيمة الاتباع والطاعة فى الاسلام وفلسفة الاتباع والجماعة ولقطت قولى ان لكل شىء رأس
وقالت لى : يعنى معنى كدا ان البيت له ريس واحد بس
فهمت تقصد ايه وقلتلها الرأى النهائى له لك المشورة والمناقشة بس رأيه الفيصل
بعد كام يوم
قالت لى
انا مشيت على الحديث ده ارتحت جدا ماشاء الله النبى عليه الصلاة والسلام مايقولش حاجة الا وفيها كل الخير
سمعت ونفذت لم تتأخر ولم تتوان


على الناحية الاخرى
زوجها ماشاء الله ربنا يبارك فيه ... التفاهم والمشاورة والاحترام الكامل لها امام اى حد
غير كدا الذوق فى معاملة اصحابها اكراما لها وغير انه عاطيها حريتها فى الخروج طول ماهو فى الشغل ولها ان تقعد مع حد من صحباتها تتغدى برة او تشرب فنجان شاى او نلف بالعربية
لها الحرية الكاملة تماما والثقة العمياء فيها وشهادة لله هبة عمرها مااخدت هذه الحرية بشكل سيىء او بدون فهم ووعى لها بل على العكس بتقول دايما ثقته فيا حبل مطونى بيه
ولما ندلع عليها فى مشوار طويل شوية تصرخ :هو عشان الراجل ذوق معايا خلاص عيارى يفلت وتتصل بيه تستأذنه
ذكرنى ذلك حينما كلمتنى احدى قريباتى تشتكى الى زوجها الذى لايراعى المناسبات الخاصة باهلها واصحابها ولاهو بيرضى يخليها تروح تجامل ولا هو بيرضى يجاملهم وبيضعها فى موقف حرج خاصة ان كل الناس دى قد زاروهم وجاملوهم من قبل
ساعتها تذكرت زوج هبة الذى يسافر سائق كل اسبوع وهو راجع من الشغل هلكان الى الاسكندرية حتى ترى هبة اهلها ولاتحس بغربة وهى بعيدة عنهم !!!!!!!!!!!
بجد بجد بيتفرق جدا المواقف دى مع الستات لما بيرفع راسها فى وسط اهلها وبيعاملها كملكة وبيجى على نفسه عشانها
وكتير يتخانقوا هى تصر على انهم مايسافروش عشان هو تعبان وهو يصر على انها اكيد نفسها تسافر !!!!!!
يارب يديم عليهم المحبة والامان والسعادة امين
جميل لما يتنطط الزوجين مع بعضهم يقضوا ايامهم جرى وتنطيط ويبعتروا ذكرياتهم فى كل مكان هما كمان زى رانيا وجوزها يحبوا يختبروا تجارب جديدة ممكن تطق فى عقلهم يطلعوا سيوة يعملوا سافارى فى الصحراء وممكن فى يوم تانى يطلعوا على لندن ى سفرية شغل له ياخدها معاه يقضوا كام يوم ويرجعوا
الاجمل بقى
ان هبة الوحيدة اللى ممكن ابقى مطمنة جدا وانا بتصل بيها اقولها تيجى نأجر بسين المدرسة سيدات بس ونعيش فيه
تيجى نعمل رحلة سيدات بس للعين السخنة ... تيجى نروح النادى نجرى ..تيجى نروح الملاهى نضرب فى بعض بالعربيات
تيجى نروح السيدة نفيسة نعد هناك شوية
تيجى نطلع المقطم ... تيجى ننزل وسط البلد
تيجى ناكل كشرى او ممبار
هبة نموذج عصرى لامرأة مثقفة عاملة بدون عمم ولا كولا ولا قال الله وقال الرسول وبس هبة بتنفذ على طول وبخطى وتيدة وئيدة
هبة :
مش محتاجة اقولك انى بحبك صح ؟
فين يا بت الحاجة الحلوة اللى قلتيلى عليها ؟؟؟؟؟؟؟؟؟؟؟؟