الى العزيزة المفقوعة مرارتها

حبيبتى القصة لسه مانتهاتش ..وكان لنا مع بعض صولات وجولات ..وهى فعلا دبلوم صنايع
بس انا عايزة اقولك حاجة :
-لما تكون من اول موقف وتسلم كدا تبقى الامر فيه حاجة مش مظبوطة مش كل اللى عندها ازمة بتبيع شرفها
- انا فى موقف ماينفعش اتعنتر لازم كان اقطع علاقتى بيها
شرفتينى

منى ولياليها السودا 3

بهت من كلامها ..يا عالم انا ريفية بنت ريفية ..امى ست وشها بيحمر لو بوستها

اينعم انا بجحة شوية وبدعى انى حرة ..وابدو صلبة من برة والستات والبنات فى شغلى كل يوم بيتحفونى انهم نفسهم يكونوا زيى

بس انا مازلت انا ...

ليه تختارنى انا من كل الناس دى عشان تسمعنى المصيبة دى

والمفروض انا اعمل ايه يعنى... اطيب خاطرها مثلا؟؟؟؟؟؟؟؟

وبعدين هى بتعترف انها مومس وانها لاقت ان دا الحال اللى سارى (رغم اعتراضى الكامل الا ان ده رأيها وكلامها )

طيب لما هى مومس ايه اللى قهرها فى اللى حصل بقة؟؟؟؟؟؟؟؟؟؟

................

انا ياربى مش ناقصة لخبطة دا خلاص ناقصلى تكة وابقى فللى خالص

..........................

...نظرت لها بكل ضيق وشفقة ..

(الله يحرقك يا بعيدة اتحدفتى على منين)

كانت مقهورة ........وبعدين اسألونى انا ع القهر ..اشمه قبل ماصاحبته تحسه

قلبى يا با .. اعمل ايه ؟؟؟

فضلت مطأطاة راسى وانا استغفر ..اللى طلع على .......لاحول ولا قوة الا بالله

كنت ممكن اتحمل الصدمات ..خلاص اتعلمت ان الحياة فيها كتير بس

كدا كتييييييييير اوى

...عقلى بيستحضر صورته وهو بيمنعنى اسلم على جارتى او اديها طبق من اكلنا

وهو بيقولى الناس كلها شياطين ابعدى عنهم على اد ماتقدرى

هو كان على حق ولا ايه ؟؟؟؟؟؟؟؟

امال امى فاتحة بيتها زى دار الندوة ليه؟!!!

بيتنا مش بيتقفل بابه ابدا

امى صدر لكل الستات فى الحارة ..فقهية مفوهة لكل استشاراتهم الدينية

تربية عيال ماشى ........امى عملت مقاطعة لاريال من عشرين سنة لما عرفت انه امريكى

قادت حملة لترخيص اللحمة ومقاطعة الخضار عشان يبطل الباعون جشعهم

بابا مسلم امره لله بيحبها وعارف انها ست عندها نجدة

عطالها اذن مفتوح للخروج تروح مع دى المستشفى وتجرى بده للمستوصف

ما علينا

منى مازالت متشحتفة

انا محتارة مش عارفة اقول لها ايه ولا اعمل ايه

هى- انا قرفانة من نفسى حاسة انى وسخة (اللى هى عكس نضيفة يعنى ) مش طايقة جسمى

- بس بس انا مش فاهمة حاجة انتى عايزة تقولى انك وهو .............................

يعنى ايه وليه الله يخرب بيتك الله يخرب بيتك وانتى عيزانى انا اعمل لك ايه بقى ان شاء الله ؟

اديك صك غفران يعنى ولا ايه ؟؟؟؟؟؟

ليه منك لله ليه ؟ عاهر انتى عاهر

- مازالت بتعيط .. هى- يعنى انتى حتصرفى على وعلى ولادى ؟

- لايا ختى مش حصرف عليك ..واضح كدا انك اخترت الطريق الاسهل خلاص وواضح كدا انه مش اول واحد

بس اللى انا عايزه افهمه انتى فى الحال ده ليه ؟؟؟؟؟!!!!!!!!

وبتقوليلى انا ليه ؟!!!!!!!!

وايه اللى عيزانى اعمله وانا عارفة انك كدا ؟

المفروض اتعامل معاكى ازاى واتعامل مع ولادك ازاى ؟؟؟

على اساس ان امهم الحاجة سجادة صلاة يعنى .....

تحملينى مصبيتك ليه ؟

- انا عارفة انك مضايقة منى ..

-مضايقةةةةةةةةةةةةةةةةةةةةةةةةةة؟؟؟؟؟؟؟؟؟؟؟؟؟

انتى بستهبلى........ صح ؟

..........................

اصابتنى حالة غريبة فضلت ابكى وانا احوقل واتحسبن ماعرفش فى مين بس حسيت بغضب شديد وخلاص

ناقمة على البلد واللى فيها اللى بترمى فى لحمها فى الشارع تنهشه كلاب السكك

.................

هى عايزة الحرق اكيد بس ..فى حاجة غلط

هى لاقت شغل وماشتغلتش ..لاقت بيت واختارت الزبالة

ياالله ايه اللى احنا فيه ده ؟

لاقيت نفسى شدتها على الحمام كانت اول مرة ادخل شقتها بقيت ادخل من اوضه لاوضه وهى مستسلمة

دخلتها الحمام وفتحت عليها الدش وصرخت فيها اغتسلى ونضفى نفسك بس يا هانم مية الدنيا مش حتنضفك

انت زعلانة انك ماخترتيش الزبون ؟؟؟؟؟؟ ولا زعلانة على نفسك هاه ؟؟؟؟

-شخطت فيا: روحى انتى امسكى مصحفك واحمدى ربنا انك عايشة نضيفة ..

شحاتة وجربانة وكل يوم حالك اسوأ من اللى قبله

روحى روحى انا بكلمك ليه اصلا ...

انا كل اللى كان فى بالى ..انى خايفة يتقبض علىّ وولادى مالهومش حد فى مصر !!!!!!!!!!!!

- اه.......... انا بقى الديوثة بتاعتك......اخلى بالى من ولادك لغاية ماتخلصى شغلك فى الجامعة مش كده؟؟؟؟؟؟؟؟

دخلتى بيتى ..وكدبتى على وسبتيلنا ولادك وانتى رايحة تغضبى ربنا منك لله يا شيخة منك لله

..................................

كان الامر غاية فى التدهور والسوء وكان لازم امشى

بالليل جاتلى وقالتلى وماما بتعمل الشاى

( انا اخترت خلاص ولعملك انا مش لوحدى ستات كتيييييير كدا امال يعنى حنصرف منينا ؟)

كانت لحظة ضعف واحتاجتلك فيها انا عارفة انك مش حتفضحينى ومش حتقولى لحد ...

ولو فكرت انا تحت امرك قالتها بضحكة رقيعة تقلد مشاهد السنيما

لعلمكم بقى واضح ان امومسات مش بالشكل اللى بيطلوا فيه فى السنيما وبس

دا فيه اشكال والوان

المهم..........

قلتلها اطلعى بره قبل ماما ماتاخد بالها والا ............قاطعتنى: ماشية ماشية

على الباب ادورت وقالتلى: على فكرة انا حبيتك صدقى او ماتصدقيش ..ونفسى فعلا بنتى تطلع زيك

قفلت الباب

ودخلت اوضتى وجسمى بيترعش

دخلت ماما هى ام احمد فين ؟؟؟

نظرت لماما وتذكرتها وهى بتقولى (لتكون عايزة تسحبك )

الغريب انها حتى مع العرض ده ومع الموقف العجيب ده كانت فى منتهى الحزن ومنتهى الرقى الانسانى

هو انا فاتنى ايه يا جماعة ؟؟؟؟؟؟؟

الى الفريدة

عزيزتى فريدة

اشكرك واحب ان اعرف كل من يقرأ لى ان فريدة اول انسانة ساعدتنى بمنتهى السرعة والحماس فى تكوين مدونتى

فريدة انت انسانة مميزة جدا ....اشكرك

بالنسبة لسبب طلاقى انا عارفة انك مش طالبة انى اقوله لكن الحقيقة انا لدى فرصة الان لايملكها طليقى وهى ان احكى عن قصتنا ومن حقه الا انفرد بالتفاصيل وهى اكيد حتكون من وجهة نظرى انا وسأرى نفسى المظلومة المهضومة ولانى لااحب الفيلم العربى ده ..افضل انى احكى عما املكه وحقى وهى مشاعرى والايذاء الذى حدث لى جراء الطلاق بهذه الطريقة حينما حسسنى ببعض الامان منه نتيجة اتفاق بيننا على حسن المعاملة ومكنتش حاطة فى اعتبارى اننا ممكن يكون بينا اتهامات غير صحيحة ورغم انه لما لاقانى لم ارد له الاتهامات تراجع عنها الا انى فقدت احترامى له وفضلت اتقطع مابين ان له بعض المشاعر ونفس الوقت فاقدة اى احترام له كان شعور فظيع

ماينفعش اتكلم عنه او عن سبب طلاقنا لكن ينفع اقول ان الحياة ماكنتش حياة ابدا استحالة العشرة كل يوم غم ونكد وتلاكيك وعكننة

على ايه بقى لازمة الحياة بالشكل ده

يلا لعلها خير

عافى الله كل الناس امين

منى ولياليها السودا 2

كنت مرهقة جدا متعبة ومجروحة وملخبطة لااقوى على المناطحة مع احد ..بعد تجربتى مع زوجى

اقسمت الا احاول مع احد الا اعاون شخص على نفسه ..وانا مالى ..ما كفاية اللى انا فيه

كل همى الا اشعر امى بازماتى المادية تعلمت الكذب عليها حتى لااحملها اكتر مما هى فيها

وكانت منى اخر حاجة ناقصاها ..الناس العجيبة اللى تذوبك فى رقى انسانيتها لكن تظل يلازمك شعور بالقلق والغثيان فى حضورها شعور مقبض غير مفهوم ..

كان موضوعى بدأ يتعرف فى شغلى والحقيقة انى وجدت قدرا رائعا من التضامن والحب والتعاطف ..ولكن لم يكن كل هذا يعنينى لم يخفف عنى ماشعرت به من جرح ..جاءتنى اثنتان من اعز اصحابى الى عملى وعلموا بما حدث ..لن انسى احداهما وهى تهنينى وكأنى اتزوج

الحمد لله يااااااااااه يا بنتى اخيرا رحمك بس ازاى كدا ورضى وخلص كدا معقولة مش ممكن مش مصدقة

استغربت جدا كلامها وسالتها بس انا ماقلتلكيش مشاكلنا دا نا يدوب حكيتلك موقفين

ردت على :يا بنتى حالك كان غنى عن كلامك

المنى جدا كلامها ولا انكركم ظللت اتحسبن فيه .. خرجنا بعد الشغل وانا زى اللى كانت مسجونة واول مرة تشوف الشارع مرعوبة وخايفة يشوفنى ليقول مشت على حل شعرها ..ما كنتش عارفة مدى تأثيره على الا وانا بتذكر رعبى يومها واصريت على اننا نعد فى مكان مدارى وكأنى اعدة مع رجالة مش بنتين صحابى

كانت الاعدة كلها على اللى حصل وهما مش مصدقين واستأذنت واحدة فيهم وقامت وبعد شوية رجعت وهى جايبة شنطة هدايا فى ايدها ..ومعرفتش امسك نفسى دموعى فيضان محجوز من سنين ومن حرجى اضحك عشان مازعلهمش فبديت هاااااااااااااااااااااااااابلة وهاتك يا هطل ضحك مع شحتفة .. ودى كانت اول منحة ..عرفت اد ايه انا محظوظة بكم احبابى

اعدنا نتكلم وانا استعيد معهم احداث كتير تقوينى وتحسسنى انى دلوقتى فى نعمة كبيرة ..

قالت لى واحدة فيهم :-تفتكرى خلاص نستيه ؟ ردت عليها التانية انتى هابلة هو بسرعة كدا دى ماكملتش اسبوعين لا طبعا لسه ادامها شوية

قلتلها :المشكلة انى كل يوم اول ما كنت افتح عينى اجدد نيتى واول ما ينزل اطلع مفكرة مخبياها واكتب فيها مزاياه والحركات اللطيفة اللى بيعملها معايا عشان اقدر اكمل اليوم بصدق من غير مايكون يوم بيعدى وخلاص ..طول عمرى اكره اقصر فى اى حاجة بعملها كنت بقف جدا على الحديث الشريف (ان الله يحب اذا عمل احدكم عملا ان يتقنه)

ياه كنت بحس كدا استفغر الله ان ربنا مستنى لنا اى حاجة عشان يحبنا ربنا يسامحنى اذا اسأت التعبير بس والله ده احساسى ..ياربى على جمالك يارب ..

المهم روحت البيت وانا موجوعة اوى اوى زى مريض القلب اللى زاروه حبة اصحابه ضحكوه لما تعبوا قلبه

لاقيت ماما سايبة لى ورقة انها فى زيارة لال البيت لانها محتاجة تاعد هناك شوية

يا حبيبتى يا ماما سامحينى على اللى انا مسبباه لك

يادوب غيرت هدومى ولاقيت منى بتخبط

دخلت ثائرة جدا حاولت اهديها فشلت الى ان شخطت فيها وبعدين ماتنطقى تعبتينى وهى نازلة شتيمة وسب ولعن والفاظ اجارك الله تكسف الابيح ..يا بنتى ربنا يهديكى حصل ايه ؟

-الراجل ابن ........... صاحب البيت اللى اشتريت منه الشقة ابن........ بعتله ابن....... الفلوس ابن..........من بره بقالى كام سنة ابن ..........

عصب عنى رحت مسكت ايد المكنسة وحلفت لو شتمت تانى لرزعاها بيها على نافوخها جايبلها ارتجاج ولا سكتة مخية تريحنى منها ومن لسانها

سكتت ..مديت ايدى ....... لا مش على دماغها لسه اما افهم ايه الحكاية ..واعدتها سكتنا شوية ..صمت تام

قلتها اهى دى احسن حاجة قلتيها من الصبح

ضحكت ..والله حركت قلبى عليها لما ضحكت وقالتلى بصى انا مش ناقصة مبادئك دلوقتى انا حولع سيجارة لاحسن اولع فيكو كلكم ..قلتلها ويمين على يمينك مانتى مولعة الا فى نفسك وتخلصينى هو ماينفعش اتطلق منك انتى كمان

رغم ان ماكنش فيه تضحكنا بس فطسنا من الضحك ..اعدة مطلقات بقى

المهم الراجل المقاول نصب عليها فى فلوس الشقة وراحت تتحاسب معاه قامت متخانقة وشتماه ادام عماله وصبيانه

بسذاجة غبية قلتها معلش اعتذرى له بعد كام يوم لو ده اللى حيرجعلك حقك

-صعب اصلى انا عكيت فيه

- عكيتى فيه ازاى يعنى

-ماتسوقيش غباوتك دلوقتى شتمته يا ستى

-ايوة يعنى قلتى ايه

-لا بلاش احسن يجرى لك حاجة المهم انى شتمته شتيمة وسخة اوى والرجل حلف انه ماهو عطينى حاجة

يجى يتفرج بقى عليها دلوقتى اه مننا احنا لســـــــــــــــــــــــــــــــــــــــــــــــــــــــــــــــــــــــــــــــــان وبس

مقهورة كانت حتموت على سرقة عمرها اللى حوشتها من ورا جوزها عشان تتلم هى وولادها فى مصر ..طلبت منى اروح للرجل ..رفضت وقلتلها انا ماليش فى القصص دى

قالتلى شكلك محترم ومش حتغلطى فيه لو غلط فيكى

نعم هو كمان حيغلط

لا يا ستى عافينى انا من المشوار ده

ميزة تانية فيها انها مابتزعلش ..قالتى طيب حتصرف فى حد

دعوت لها بصلاح حالى وحالها وقبل ماتخرج قلتلها

منى ممكن تبطلى تكونى زى مانتى كدا انا كل مااحاول اكرهك يابت الاقيكى غلبانة اوى امال بتستقوى ليه بس دا انتى اخيب منى بمراحل والنبى يا شيخة اللهى تعدمى جوز البقاليل اللى فى وشك دول تلمى لسانك ده شوية .

نزلت وهى بتقولى ادعيلى

فضلت واقفة على الباب وانا شاردة فى غلبنا ادى افظع واحدة شفتها وشوفوا فى لحظة ماعرفتش تاخد حقها بدور على سند ازاى ؟ سبحان الله صدق رسول الله لما وصى بالنساء اخر حاجة فى حياته صلى الله عليه وسلم ..يا حبيبى يا نبى تعال شوف الى بيجرى لنا وتعال شوف امتك وهى بتولول على الاساءة اليك وعلى تدبيح الناس ادام عنيهم

مرت اربعة ايام ما شفتش منى فيهم وفى اليوم الخامس اتصلت بيا على الموبايل طلعت البلوكنة لاقيتها غارقانة فى دموعها وطلبت منى اروح لها

كنت واخدة عهد على نفسى مادخلش بيت اى حد مهما كان ... لكن شكلها مايطمنش

لبست ونزلت لها ..فتحت الباب وارتمت فى حضنى

ياالله على الغلب ..انا ناقصة وجع قلب

مالك يا بنتى فى ايه؟

مابقتش لسان وطالعلوه ست ..كانت بتتنفض وجسمها بيصب عرق

قلتلها اوديكى المستشفى انتى شكلك تعبان قالتلى لا اعدى وانا حقولك ..

ما كنتش فاهمة حاجة من كلامها ..حاولت اعملها ليمون رفضت ..وبدأت تحكى

راحت للرجل طلب منها انها تعتذر ادام عماله ..اعتذرت ..قالها مش كفاية قولى انا كذا (..................)

بصى رجلى ....... هى تتكلم وانا الدم يفور فى نافوخى وافتكر اللى اتعمل فيا فى طلاقى وقررت انتقم من طليقى فى الرجل ده ..انا بقى اتاكدت انى سيكو وعايزة اشوف دم حالا

اسكتتنى منى وهى تقول عشان خاطرى ما تبعديش عنى وماتكرهنيش

-دى هابلة دى ولا ايه ...يا بنتى وازعل منك ليه واكرهك ليه بس اينعم لسانك هو اللى عمل فيك كدا بس اهو درس وبرضه ماكنش يوصل لكدا ..الجزمة ده غايظنى جدا ..اروح ادفنه فى الاسمنت عشان ترتاحى

- قالتلى انا قرفانة من نفسى اوى استحميت ولا 7 مرات .. تنحت لها وسكت

-قصدك ايه ؟

-مانا كنت حعمل ايه الشقة حتروح واولادى حيترموا فى الشارع ..كان ممكن اعمل ايه -مازلت مش مستوعبة ومتنحة -هاه؟

-والنبى ماتبصيلى كدا ارجوك انا قلتلك عشان تقوليلى اتطهر ازاى ؟

-ايه ؟نعم ياختى تت ايه ؟

(هو فى ايه ..اللى بيحصلى ده .. دماغى بتلف وصدعت ومش عارفة ارد )

-ردى على ماتسبينيش كدا ....احتقرتينى مش كدا انا بحتقر نفسى اكتر بس يعنى حعمل ايه اتصرف ازاى انتى حتصرفى على هه ردى)

بصيت لها قوى

-لا مش حصرف عليك ومش المفروض ان حد يحل لك مشكلتك والا تعملى كدا ..انتى اخترتى

قاطعتنى لا انا اتظلمت واجبرت

صرخت فيها لا ماجبرتيش اخترت القذارة كان ممكن تبيعى العشر اجواز جزم البوط اللى عندك لو مش لاقية تاكلى تبيع احلل المستوردة ولا الاجهزة جهاز جهاز لغاية متاتبيعى هدومك لكن انتى استسهلتى ..ازاى تضيع الشقة وازاى تحاربى عشان حقك لا ايه اللى اسهل ابقى عاهر مش كدا ؟ جاية تقوليلى انا ليه ؟ سبتى الدنيا كلها وبتشيلينى مصيبتك ليه ؟

- عشان انا عرفتك انتى متدينة وانسانة

صرخت كالمجنونة انا لامتدينة ولا انسانة ولا زفت .. منك لله اعمل ايه معاكى دلوقتى ..

اصابنتى حالة هستريا عجيبة شدتها وانا بصرخ فين الحمام فين ..شاورتلى عليه اخدتها على جوه وفتحت الدش وزقتها تحته ..قلتها عيطى لغاية ماتموتى ولا تتحرقى بس طهرى نفسك من جوه الاول

صرخت انتى متخلفة تعالى شوفى فلانة ولادها فى الجامعة الامريكية وهى طول عمرها بشتغل كدا وولادها مايعرفوش انتى فاكرة انا بصرف منين ؟من الفلوس اللى بيبعتهالى ابوهم اصلك حمارة مابتفهميش يا ماما تلات تربع بلدك .... قاطعتها وانا مهدودة كفاية كفاية الله يسهلك

خرجت وانا اتشاهد على نفسى .

افتكرت ماما (اوعى لتكون عايزة تسحبك)

كل شىء جايز ياترى كانت دموعها دى ليه عشان مااختارتش الشخص ولا حتى المومس مابترضاش يمتهن جسمها

هو ايه اللى بيحصل ده وانا مالى ومال ده كله ..اشمعنى انا ..

مرت ايام ولم ارها وفى يوم اثناء رجوعى من الشغل والشنطة قاطمة ضهرى ..لاقيتها نزلة من عربية واحد ..وقفت بصتلى ونفخت سيجارتها وقالتلى .. انتى صح ..بس انا ماينفعش معايا غير كدا سلام

سلام

الى امراة يقول عنها انها امرأة

اختى ..

اسعدنى جدا مرورك على حسستينى ان حد طل عليا وسلم وحضنى بحرارة اخوة جميلة ..ربنا يكرمك بكل الخير اختى الكريمة واهلا بيك دايما

لعلها خير

منى ولياليها السودا

بعد كدا

عرفت منى وولادها طريق بيتنا ..اكلت عقل ماما بالولاد ..امى تعشق التربية

مالاقتش عيال تجيب بط تربيه او كتاكيت

المهم تربى والسلام تأكل وتشرب وتحمى وتنم وتغنى لهم وتخيط لهم

امى ست ست

كانت بتكره فيها انى مش قلقانة من قصة الاولاد دى

كنت شايفة انها رزق

وبعدين احنا فى ايه ولا فى ايه مش لما نلاقة اب عدل متربى عشان يعرف يربى

ماعلينا خلونا فى موضوعنا

منى هانم

كنت بحس ناحيتها بمزيج من التناقض شفقة وحب وفى الوقت نفسه ضيق وعدم راحة

لم احب التحرر يوما ..حريتى يحكمها كل مايكبل الحريات المعروفة ..والتى يرفضها الاخرون

الا انى ارحب بها ..لا اخشى شيئا الا ان افعل مالا يرضى ربى

لم اولد بهذا المعنى وانما من حريتى فهمت ذلك

اما منى فكانت مثالا لكل ماارفضه من المرأة وما احبه فيها

كانت متحررة تلبس ماتشاء تخرج وتعود ماتحب

تتعامل باسلوب راقى وفج فى ذات الوقت

تعلن ببجاحة كل مشاعرها

ومع ذلك ..كان بها اشياء كثيرة احترمها ..كانت حزينة رغم ضحكاتها المجلجلة التى كثيرا ماكانت تتسبب فى احمرار وجه امى فتنبهها ببراءة

: وطى صوتك يا حبيبتى باين عليك ضحكتك عالية زى

يا حبيبتى يا ماما .. بحبها وبحترمها اوى الست دى

ورغم ذلك

كانت منى شعلة نشاط ..طاقة لا تنتهى ..ام على استعداد تنهش لحم وعظم ونخاع من يهوب ناحية اولادها

تقوم بكل شىء .من طبيخ وسباكة وخياطة وبياض ودهان ..كل شىء كل شىء

رسامة ممتازة ومهندسة ديكور لايعلى عليها ..اربع لغات غاية فى الاتقان ..ودبلوم صنايع

اكتر شىء كان بيعجبنى فيها انها مش محتاجة لاحد

كان نفسى اكون زيها فى النقطة دى

كانت بتحب تعد جنبى يوم الجمعة تستمع الى وانا افرأ القرأن ولما اعطى مصحف تتخض وعينيها تتملى بالدموع

وترفض ان تلمسه ..(لالالالا ماينفعش المسه ماينفعش )

ماكنتش عمرى فضولية وكان ده سبب فى ان حاجات كتير بتمر على من غير ماخد بالى منها ومن معانيها واللى وراها

فى كتير من الاحيان كانت بتسيب الاولاد معانا وتنزل

اضطريت اسالها بتروح فين

جاوبنتى انها اشتغلت فى بازار فى شارع الهرم عشان هى بتعرف لغات كويس

بسطنى جدا الموضوع

اكملكم بالليل لازم انزل

سلام

وادى يوم كمان

مرحوتش الشغل ..قمت من النوم باحاسيس اغرب ..

قمت حاسة بضيق من نفسى كبير جدا .

..حاسة بالجحود وعدم الرضا وحاسة بكل مشاعر الغضب من نفسى ...

ماما قالتلى انى كنت بتخانق وانا نايمة ..

حاسة ان الدنيا مش مستهلة وانى رغم كل حاجة تحقق لى اللى كنت عايزاه

يلا بقى يا شطورة اتفضلى عيشى حياتك

ابدأى

كلى سمك لغاية ما يطلعلك زعانف ماحدش مانعك اهو

اشربى شربة سى فود براحتك

عومى فى شربة البرغل زى مانتى عايزة

كلى اللى تحبيه ونامى وقت مانتى عايزة

اقرى اى كتاب

ولا حمرى عليه السمك المقلى بحريتك

زورى اهلك زى مانتى عايزة

اشترى ورد وانتى مفلسة والبيت مكشط ولا حد يقولك بتعملى كدا ليه

روحى السوبر ماركت واشترى كل حاجة مالهاش لازمة ولا يهمك

ها مبسوطة؟

ايه مشكلتك دلوقتى ؟؟؟؟؟؟؟

ليه الضيق والخنقة دى بقى؟

..............................

وعليها

.....................

نزلت امى السوق لشراء مستلزمات البيت واتجهت انا لنشر الغسيل

لمحت سيدة فى البلكونة اللى ادامى ماسكة سيجارة وبتشربها

كان واضح من قفلتلها لباب البلكونة وطريقة شربها لها انها مش عايزة حد يشوفها من اللى جوى البيت

لفت نظرى المنظر كعادتى احسست بضيق

خفضت عينى

هى: بسسس.......

اتجاهلها

هى : هاااى صباح الخير ..ازيك ؟

- صباهمههم...

هى : نورت الشارع .......انا كنت حجيلك كمان شوية .....انا عارفة ان مامتك نزلت

ممكن اجى اخد معاكى الشاى ؟

-:احدث نفسى (شاى ايه ودى ايه كمان )

-:اهلا بيك طبعا بس اصلى مشغولة شوي.......

هى - مش حاخد من وقتك كتير .ثوان واكون عندك

_اقف مفتوحة الفم .لا اعرف ماذا اقول ؟ تختفى من امامى بعد ان تدوس عقب سجارتها

انا اخر حاجة عيزاها النهاردة اكلم حد ..وكمان بتشرب سجاير

وانا ناقصة

يرن الجرس افزع وافوق من شرودى (هى لحقت)

افتح الباب ( سيدة فى منتصف العقد الرابع من عمرها ..شكلها مصرى وان كانت فيها لمحة اوربية سمراء

نحيفة )تمسك طبقا ملفوفا بفويل تفوح منه رائحة الخبيز

هى:اتفضلى ..حاجة بسيطة انا صحيت من بدرى عشان اعملهاك كنت عايزة اجى لك قبل كدا

بس قلت استنى شوية ..ولما لاقيتك نزلة من التاكسى امبارح قلت لازم اجى اتعرف بيك واطمن عليكى

نظرت لى وانا واجمة لاارد ولسان حالها يقول

(حتفضلى متنحة كتير )

ادركت ودعوتها للدخول ..لم يكن عندى الا كرسيين حول منضدة ادعيت لنفسى وانا اشتريها انها ترابيزة السفرة

قالت لى ببساطة متناهية

هى:بصى ايزى خالص تعالى نعمل الشاى ونعد مع بعض شوية

انتى اسمك ايه ؟ انا اسمى منى مصرية مطلقة يعنى بصرة

- صعقتنى الكلمة ونظرت لها بقوة وانا اعجز عن الرد

هى: ماتخديش الامور بحساسية كدا ..فى الاول بس الامور بتبقى صعبة بعد كدا خلاص

يا شيخة سيبك

بص انا كنت عايشة فى كندا مع جوزى هو ماكنش مسلم وبعدين اسلم لما شافنى

سافرت معاه وجبنا تلات ولاد وبعدين رجع فى كلامه تانى

انا ببلاهة : رجع فى ايه؟

هى :فى اسلامه طبعا ..(قالتها ببساطة التى اكملت حياتها معه عادى يعنى )

برنقت اوى :اييييييييييييييييييييه

وانتى عملتى ايه ؟

ولما لاحظت ان الامر لم يمر عندى كمر الكرام ولا اللئام حتى تنحنحت وقالت :

طبعا ماسكتلوش ..

فى عقلى يا شيخة .. الولية دى مين حدفها على ؟!!!!!!!!

يا خونا دا اليوم الوحيد اللى كنت عايزة اخده ارتاح فيه ..حراااااااااام

حست هى بما انا فيه فاخذت الشاى من يدى وجلست على السجادة

(لا بقى دى مصرة تحرجنى )

هى:واضح انك مااخدتيش حاجة ...معلش كله يتعوض ...ولا يهمك

شكل مامتك ست طيبة اوى ومتدينة

:اه الحمد لله (بهمهمة برضه )

هى :على فكرة انا ملاحظة انك بتخسى كل يوم اكتر ..هو انتى كنت بتحبيه ؟

انا : بصى من فضلك انا مش عايزة اتكلم فى الموضوع ده ممكن

هى :خلاص خلاص سورى بس ماهو لهاش تفسير تانى

:يا ستى مش عايزة اتكلم سبحان الله

نسيت اصول الضيافة وبصراحة ماكنتش ناقصاها

هى بنفس البساطة التى اصبحت مستفزة

.ولا يهمك برضه بكرة تنسيه ..... انا عرفت انك مدرسة وكنت عايزاك تساعدينى عشان الولاد

:اها قولى كدا بقى (فى بالى )

هى :على فكرة انا ممكن اروح المدرسة واتصرف بس انا حبيت تعرفى قصة ولادى عشان تساعديهم

.........اختلفت نبرة صوتها وظهرت على ملامحها علامات حزن عميق اخرسنى عن الكلام........

هى :انتى ماتعرفيش انا عملت ايه ولا ضحيت بايه عشانهم

ولو حموت انا على استعداد بس ماخدشهموش منى

انا :طبعا طبعا ربنا يخليهمولك ..بس انا اقدر اعمل ايه ؟

اتوصى بيهم انا عارفة ان لك كلمة فى المدرسة من فضلك اعتبيرهم اولادك

: حاضر والله ان شاء الله

اخرجت سيجارة تريد اشعالها اتنطرت لا ارجوك

الحاجة لو جات وشافتك بتشربى سجاير حتقيم علينا الحد انا وانتى

ضحكت وقامت (الحمد لله ) طيب اسيبك بقى

اخييييييييرا

عادت امى حكيت لها ..اتضخت ( لسه طبعا ماجبتش سيرة السجاير )

هى دى امى تخاف من كل شىء

: ودى مالها ومالك بقى اوعى تكون عايزة تسحبك

:تسحبنى يا ماما هو انا جاموسة ؟

:لا ماهو الاصناف دى بتصطاد فى المية العكرة ..بصى انا قلبى مش مطمن لها الست دى

..............................

فى منتصف اليوم جاءت منى مرة اخرى وهى تجر اولادها الثلاثة

فتحت ماما لها الباب

بوس واحضان وازيك يا طنط وماشاء الله يا طنط وشك سمح اوى

وامى كاشة فى بعضها مش عارفة تقول ايه

:دول ولاد يا طبط ..ديفيد ولورا ومايكل

امى :مين يا ختى ؟...هما مش مسلمين ولا ايه ؟

هى :لا يا طنط اصل دى حكاية طويلة

انا بقى طبخت شوية اكل كدا وقلت اجى نتغدى مع بعض واتعرف على حضرتك

ماما اتلعثمت ..وغمغمت ..طبعا يا بنتى اهلا بيك اتفضلوا يا ولاد

هى:بوسوا طنط يا لاد ..على فكرة يا طنط هما بيفهموا عربى مكسر

كنت اعتمد على امى فى مواجهتها لكن امى رفعت الراية سريعا ومش بعيد كانت تديهم

الترابيزة اللى حلتى كمان بعد ما اخدت الحضن المتين

يا مرحب بالراحة والهدوء

وراح يوم الاجازة