خلاص حتسافر؟؟

الاغتراب

1- بناء على طلب مغترب (مقدمة )

ببساطة كدا.. الاغتراب هنا بمعناه الطبيعى من غير لافلسفة ولا عمق

تسيب بيتكم (كنف ابوك وكف ايده اللى كانت بتجود عليك بكثير من مختلف الخيرات بدءا بخد يا شحط وانتهاءا بطرقعة محببة على مؤخرة راسك )وتسيب الحاجة بمحاشيها وطواجنها وهدومك المغسولة المكوية ..كل ده كوم وحنيتها كوم تانى ..عليها حضن لن تجده ابدا (بشكل لايفت فى صدق الاحضان الاخرى ولا اصحابها ..لكنها الفطرة لااكثر ..خلق الله الذى لايضاهيه شىء اخر ..

تسيب كل ده وتجرى وراء دراستك او لقمة عيشك او بحثا عن ذاتك والكلام الكبير ده او تروح تدور على جوازة تاخد بيها اقامة ..وبعدها تلفلك لفة صغيرة على المحاكم فى الحضانة للاولاد ومش بعيد تاخد حكم تشرف بيه فى احد السجون تاكل وتشرب ببلاش

المهم انك متغرب وخلاص

عندما تعود ليلا وقد خلعت حذاءك خفية على باب العمارة او سلم الدار او عتبة للبدروم او فى مصعد الفندق ..تكاد تصطدم بجارك العجوز وهو ينظر اليك شذرا وشططا ..فتتمتم معتذرا وقد زدت الطين بلة فلم يصدر منك الا همهمة خلتها مفهومة تعلى من انطباعه عنك وعن اشكالك بضرورة التخلص منك برصاصة فى ميدان عام او يلمكم عربة كالكلاب الضالة ..فيتخطاك دافعا منتشيا بفهمه العميق

لم يعد ذلك يضايقك

تدخل حجرتك وقد تناثرت جوارب غبر متألفة واوراق ولفافات وملعقة كنت تأكل بها شيئا من ثلاثة ايام وكوبا به بقايا شاى جف وجريدة مجانية وجدتها امام شقة جارك الحبيب وطبق به بقايا اطعمة متعفنة وقد علاها اللون الاخضر والابيض والاسود فى مزيج لم يعد يقرفك

ترمى حذاءك بطول ذراعك وتدخل الحمام ثم تخرج وانت كالشريد الملتاع على لقمة بين صفائح القمامة تتشمم الهواء فتدعو على من طبخ اليوم واشاع تلك الرائحة امعانا فى تعذبيك قصدا وعمدا وتربصا وترصدا

فتصرخ باعلى حنجرة (انا مستهدف يا جدعان )

رائحة جوربك تطفش الحشرات ..لكنك لم تعد تهتم لهذه التوافه

تدخل المطبخ تهبد فى الحلل والاوانى وترفع غطاء عل عفريتة حنت عليك بطبخة ملهلبة تطفى نار الجوع التى تحرق احشاءك..

لغاية هنا ..وبس ..كفاية ..حرام ..انت اتجننت رسمى

امام تلات اختيارات وتخلصنا

الاول :- تحزم هلاهيلك دى وتلم مقلب الزبالة ده وتروح بيتكو..

الثانى:-تشترى عشاءك وانت جى من اى تيك اوى او مشويات او كشرى وقل على معدتك وشقى الغربة يالا السلامة (انت اهبل ؟؟؟)

التالت :-انك تسمع الكلام ومتقولش بم

بصى يا سيدى

انت تلم كل اللى مرمى على الارض ده فيما عدا الورق والكتب وارميهم فى اكبر طشت من عند جارتك (اللى حتستلفه وانت صوتك واطى وعينك فى الارض)واوعى تقبل عزومتها انها تغسلهملك اوعى..

وتحط زجاجة ديتول (على الغسيل ركز)وفنيك وفورمالين بالمرة وخلصنا..وسيبهم تحت المية اد شهر ونص

دا اولا ....... أكل ايه دلوقتى ؟؟ركز

ولا اقولك روح بلدكو