عارفة انتى ايه ..؟؟؟؟.

انتى ...
خاينة
مالهاش مسمى تانى وماينفعش اطبطب عليك ولا احسس على كلامى
لا
انتى خاينة ........
دا حد الله لافيه مجاملة ولانفاق ولا مداراة
جوزك فيه العبر وبه اللى به ....
وليكن ... فشلت فى اصلاحه ووجدت انه ممكن باسلوبه يوقعك فى الحرام
سيبيه
فورا
يتحرق الناس بالمجتمع .. مادام لاحل الا الحرام
وبعدين يعنى هو خلاص ؟
هه
مابقاش فى غير الحرام عشان نعيش
عشان ماتحمليش لقبنا نحملى عارك ده ؟؟؟
ايه اللى بتعمليه فى نفسك ده؟!!!!!!!!!
عيال ايه اللى انتى خايفة عليهم؟؟!!!!!!!
بتضحكى على ولا على نفسك ؟؟ هه ؟؟؟
فين العيال دى لما خنتى ربنا ؟؟؟
فين وهو داير على حل شعره ؟وانتى رايحة تقلديه ؟
ماخوفتيش عليهم ليه لو حتى مش خايفة من فضحتك ادام الله وادام الناس ؟
وبعدين وهو انتى اول واحدة يعنى عايشة كدا ؟
اعد كام الف واحدة بتعانى اكتر من اللى فيه ؟
وعايشين يربوا فى اولادهم لانهم مسئوليتهم امام الله
ومش ذنبهم ان ابوهم جه كدا
هو فيه ايه ؟ الموازين اتقلبت ليه ؟
فين ربنا جواكى فيييييييين؟
.............
مستنيانى اقولك كلام لطيف ؟؟؟
اسفة
لازم الم يفوقك ويقولك ارجعى عيب عليكى
دا مش تهريج ..دا عرض (مش حقولك عرض جوزك) وامانة الله لنفسك اللى بترميها
فى بحر خيانة ووساخة وقذارة ووحل
اللى بيفهموك ان دا نتيجة الظلم اللى واقع عليك يبقوا ديوثيين
ايوة
ويبقوا لهم مصلحة ما فى الوحل اللى بتغرزى فيه ده
مش حقولك اتقى الله ..انا عارفة ان كتير بتجيلهم ارتيكاريا منها
حقولك ..
لو كنتى انسانة وحشة مكنتيش اعترفتيلى وطلبتى نصيحتى
لو كنتى عينك مكشوفة وقليلة الادب كنتى اعترفتى علنا
لكنك طلبت الستر ..يارب يمن عليك به
يا مسكينة ايه اللى عملتيه فى نفسك ده ؟!!!!!!!!
اقفى يا حبيبتى فورا
لو خطيتى للرذيلة مية خطوة اقفى وارجعى
مش حيكون سهل انا عارفة وانا عارفة انك محتاجة لنقطة حنان
فى عز الحر اللى مالى قلبك وعز الاحتياج اللى فقداه مع المحروس
وعارفة انه بيخونك عينى عينك
وبيعمل اللى هو عايزه
بس فيه ايه؟
هى غابة ؟!!!!!!!!!!!!
لا يا بنتى لا
مش صح هو يعمل اللى يعمله دى قصة تانية نناقشها وقت تانى ونناقش نحلها ازاى
لكن يكون ردك عليه بالشكل ده؟!!!! لايا حبيبتى
فين ربنا ؟
هو انتى مفاكرة ان الابتلاءات سهلة كدا ؟!!!
وان جوزك حقولك كدا يا جنتى انا راضى عنك الى الجنة يا قرة عينى ؟!!!!!!!!
لا يا حبيبتى الابتلاءات بتيجى فى اللى ماتقدريش عليه بس عشان عايزين ربنا
هو سبحانه حيساعدنا
والله والله وعزته وجلاله ماحيتخلى عنك اذا رجعتيله
عيب يا حبيبتى عيب ازاى توصلى للدرجة دى ؟!!!!!!!!
قومى اغتسلى ونضفى نفسك وارمى المدعوق الموبايل ده
وسدى على الشيطان ده ابوابه
فورا بلا تاخير
حالا
وبعدها نقول نعمل ايه
قول يارب اعنى
والجئى له
وابدائى صفحة نضيفة
مش مهم جوزك ومش مهم ولادك
عامليهم كلهم لله
ادخرى عند الله واحتسبى
هو حيسيبك؟ يا مغفلة بيمتحنك بيختبرك فوقى
..........
المهم
الله
ووقفتك امامه
وعملك
ليكى
لا
عليكى
حستنى تقولى ايه خطوتى الجاية

انا بقى حشرب سجائر

اشربى
.......
وافضلى انفخى انفخى انفخى
للابد
واطفئيها فى قلب المجتمع ...اليس كذلك ؟؟ها ؟ اليس هذا ماتريدينه ؟
ان تردى الصاع صاعين ؟
بس
بالشكل ده ؟؟؟
على العموم دا مش غريب ..انتى اخترت اقصر واخيب الطرق
لا برافو عليك ...تصدقى خلاص مابقتيش ست !! تصدقى خلاص طليقك بيعيط بالدم وبيقرض اصابع قدميه
وتصدقى اخيرا لاقيتى نفسك .. ياه دى كانت قريبة جدا منك
هو ايه الخيبة دى .؟؟؟؟
...
كان لازم افرغ شحنتى فيك قبل ان ابدأ ....حكدب يعنى؟؟؟؟
.......
يا سيدات
بعد الطلاق او حتى بعد اى تجربة مؤلمة تكونى فيها الطرف المغدور به بتبقى جواكى طاقة غضب كبيرة
غل من المجتمع ومن الناس ومن الهوا ومن الشمس
كل واحدة فينا لازم تمر من حلقة النار دى بس مابنخدش بالنا منها
بننشغل بالموضوع وملابساته وشتيمة بعضا وكل الحاجات اللطيفة اللى لازم تكون مع الطلاق
والا يبقى ماينفعش ولازم نعيد مشاهده من الاول
المهم
مافيش واحدة تتخيل انها ممكن تعدى من حلقة النار بسهولة كدا
لاالموضوع محتاج حاجات محدش علمهلنا
محتاج اعتراف بالجرح وشعور بالانكسار والخزى
هو ايي المانع اننا نتوجع يعنى ؟؟؟؟!!!!!!
هو انتى مفكرة انى لما اقول (جزمة وشلحتها من رجلى (لفظ سورى ) يعنى قلعتها
..بكدا انتى حيتصقفلك ولا حتى حتصدقى نفسك ؟؟؟؟؟؟؟
لا غلطانة
دانتى لازم تاخدى وقت تتقهر على اللى عمله وعلى البيت اللى عشتى تتمنيه
ولا كفاية انك اتهانتى واتمرمطتى هو انتى كنتى فى يوم يخطر فى بالك
ولا فى احلامك انه بعد مايشيلك من عتبة البيت لغرفة نومك(عروسة بقى)
انه يرزعك على ارضية المطبخ ويحط جزمته فوق رقبتك زى اختنا سميحة ايوب
لا طبعا
لا كان عمرك تتمنى ده ولا سعيت له
يبقى ماتتقهرى يا ستى
ماتعيطى شوية ..وتعلنى i am off
انا تعبانة منهارة مجروحة حبيبى ماطلعش حبيبى ولا نيلة ...يا جاهلين اعرفوا
فى صمت فى كبرياء لكن مجروحة
هو انتى لما تشربى السم ده انتى حليتى ازمتك ..ولا حتى ريحتك ؟؟؟؟؟؟؟
يا ختى اجرى
خجلانة من جنسك ليه ؟ كارهة كونك انثى لاحول لها ولا قوة
وعايزة تنسلخى منك لشخصية اقوى مستقلة مهابة ؟
مش بالسيجارة بقى
اطفى بقى الهبابة دى عشان بتخنقى وتعالى
ايوه ..هنا ..جنبى
هو انتى فاكرة انى جدعة اوى دانا اخيب منك مراحل
تعرفى انا بعد طلاقى عملت ايه ؟
جاتلى هفة شراء اشترى اشترى اشترى له لازمة ولا مالوش
اهو اشترى وخلاص
بس طبعا اتازمت اتقرصت وانا اصلا طالعة على الابيض وكان لازم وقفة وبطلت ..
...انا عارفة انك تعبانة وتعبانة اوى كمان
لاانا مصلحة اجتماعية ولا مذيعة عايزة تعمل سبق بفرقعة لقاء
يا بنتى انا انتى بالظبط
انتى هابلة ؟؟؟ هو انتى جبتى منين قصة قوية دى ؟؟
يا بنتى انا مريت بكل كل ده بس كنت ضعيفة اوى اوى بقى ماتعافتش ولا اتنيلت
مارست انوثتى الرائعة فى الضعف .. فرميت نفسى على باب الله ابكى وابكى
واقوله لى مين غيرك بس ؟ طاب هوا نا وحشة اوى كدا ؟
طاب يعنى ماليش فرصة انك تاخد بايدى خلاص كدا
حعيش منهية محكوم على باللفظ ده مدى حياتى ؟؟ خلاص كدا فشلت ؟؟
طاب اعمل ايه ؟ مش شايفة دلنى دانا ماليش غيرك
يارب نورلى طريقى اكفينى شر الناس والشيطان وشر نفسى
انا تعباااااااااااااااااااااااااااااااانة
...........
انا زيك انسانة مش عايزة غير حاجات طبيعية تعيش بيها
بيت ورجل حقيقى وخاتم الماس وكبشة فلوس ودست هدوم وشنط وجزم اشكال والوان
الحاجات البسيطة الطبيعية لكل ست دى
وهو...
يكون حواش ويكون انريك اليجاسيوس (كاظم لا حليم لا حسنى تامر لا)
يكون كل حاجة فى وقت واحد ..ومايشخطت فيا ابداااااااااا اه
مش ركبة دا على الرومانسية خالص
اااااااااااااااااااااااه
هيه
يلا
قلبك فاضى بيلق صح ..معلش حيمتلىء صدقينى
اصبرى بس
المرحلة دى اصعب مرحلة للمطلقة .. لازم تكون فهماها كويس عشان تعديها صح
التعافى والعافية فيها والفتونة حتورث غضب وتمرد ورد الصاع لاولاد ..........
كلهم كلهم .....
غلط ..مش صح ...تعالى عيطى انا عمرى ماحمل من دموعك ..ممكن اتخنق منك واخبطك فى الحيط
بس حرجع اخدك فى حضنى واعيط معاكى واقولك منك لله قلبتى على المواجع.
.......
اطلعى من الوحل ده
انتى معملتيش حاجة حرام ولا تغضب ربنا انتى اتكتب عليك قدر
..ماتشفقيش على نفسك ابدا ..بل قومى الاول وانتى بتبكى ومنهارة ..
دا حقك ..لكن يا حبيبتى لازم نتعلم ان ماحدش عمل فينا حاجة
ولا يقدر الا انه ينفذ اللى ربنا كتبه علينا
اوعى من الشفقة على النفس ..انتى زى الفل واحسن من غيرك كتييييييييييييييييير
عيب بقى .. ارمى الزفته دى وتعالى اغسلى سنانك الحلوة دى ونضفيها من العك ده
يا موكوسة رايحة تاخدى منه اسوأ مافيه يا خبتك
يا بنتى
يا بنتى
انتى خلاص قربتى ماترجعيش تانى
ابدائى احلمى ارجعى تانى بنوتة صغيرة قلبك اينعم مش ورور بس قلب احسن من كدا
ناضج ماباش خلاص يضحك عليه
قلب حيفرق بين النادر والمعروف وحيختار صح
ولما حيختار يا سلام
حيحب بجد بحق وحقيقى
وحتعرفى مش لازم يشيلك عند عتبة البيت الاهم
يشيلك فى عينه
اطفى السجارة
كفاية
حرقة قلب
وسبيه يلملم خلاياه تانى
وقولى لى هو ليه كل مابتمسكيها بتعيطى
.......
لو على الخطوة الجاية حنعملها سوا
ماتخافيش انتى مش لوحدك
كلنا معاكى اهو
كلنا الوجع شربنا شرب
بس شوفى الحمد لله
بقينا زى الفل

الحمد لله انا ست

سيدتى:
لدى الاف الاسباب التى تجعلنى احمد الله على انى انثى .
واولها انى كرمت انى خلقت من جسد حى ينبض شوقا الى ..
حبيباتى اعطوها اسبابكم

مدونة قولاً سديداً: نظرة على الأحداث

مدونة قولاً سديداً: نظرة على الأحداث

حبيبتى ...ام ابن الطلاق

نعم ..اليك اتحدث اليوم عل الله ان يرزق قلبك الهدوء الذى لم تناليه

عل الله سبحانه ان يزيل هذا الحاجز بينكما

بينك وبين طفلك الصغير

.................

ايها الناس ارفقوا باطفال الطلاق

ارحموهم بالا تحملوهم ذنوب ابائهم وامهاتهم

ايتها الام ضمى ابنتك الي صدرك وافخرى بها واعلنى لها ولكل العالم مايكن فى صدرك نحوها

لا تبخلى عليها بكلمة احبك

بكلمة سامحنى وسامح والدك هو يحبك جدا ..مثلى تمام

لكنه مثله مثلى مثل كل انسان يخطأ ..

لا تغضبى منه وسامحيه

...........

ام طفل الطلاق :-

اقول لك ارفقى به لا تكونى عليه ؟!!!!!!!!

اانتى تحتاجين ان اقول ذلك ؟الا تعرفين ان جانب من قلبه مفقود ولا يجد راحة فى غيابه

انه فاقد الثقة فى نفسه وفى هذا العالم ..الذى لم يجد منه الا التجريح والاذى ؟!!!!!!!

لاتعرفين ذلك ؟

بل تعرفين

وتعرفين انك وان كنت بلا قصد سببا فى قطع شريان فى قلبه

فاوقفى فورا هذا النزف ...

مدى يدك تضمه واخلعى قلبك يضخ فيه الحب والتفاؤل والرضا عن نفسه وقدره وحياته

صححى مافعلتى

صححيه بان تقبلى به ومعه على الدنيا

لاتجترى معه الاحزان والاحقاد

لاتحاسبيه عما فعل ابوه فيكى

لا تمنى عليه بانك فعلتى وفعلتى وفعلتى

هل تعلمين ؟؟؟

بل الله يمن عليكى به ..

فكونى حامدة شاكرة

تخلصى من غضبك من ابيهم حتى لايصب على روءسهم الصغيرة التى لاتحمل مرادفا لما تقولين

انثرى السعادة والبهجة فى بيتك حتى تنسيهم مااقترفتموه فى حقهم دون ذنب لهم فى اختياركما الخاطىء ..

حين نزعتما عنكما ستار المحبة وظهرت امامههم هلهلة عرى المحبة والاحترام

الذى يفترض ان يكون بينكما امامهما .

اعترفى لهما انه عندما وجدتما المشكلات قد زادت قررتما تبعدا عن بعضكما حتى لايسبب ذلك لهم الاذى او الضيق

لكنكما رغم كل شىء تحبونهم \...حتى فى حالة تقصير احد الاطراف بررى بكل استطاعتك ولا تستغلى الفرصة لتحرزى نصرا على طليقك فان ذلك ينقلب عليك دون ان تدركى ..ويجعلونهم يشعرون انك تشوهى عملاقهم الذى يحبونه

لا تستهينى بعقليتهم

فهم اوغاد صغار يعرفون كل شىء ويدركون كل شىء

ونحن بلهاء امامهم حينما نحاول ان نننتقص من قدراتهم على التعايش مع الواقع ومنغصاته

لا تبخلى بمشاعرك عليهم (ليس بشكل موجه) فهذا لن يعطى الاثر المرجو... انما حينما يستشعرون فيكى الرضا

وحب الحياة والاقبال فسوف يقبلون هم ايضا عليها ويتعلمون دون ان تدرى ان الحياة صعبة لكن يمكننا التعامل معها ببساطة

ادخلى حب الله فى قلوبهم افهيميهم انه يحبهم

اجعليهم يحبون نبيهم ..هكذا الحب لايسمح بسواد معه فى قلب واحد

...لا تهدمى الهرم الذى يستندون عليه فى مخيلتهم

هو ابوهم مهما كان ..ولا تتكلفى فى ذلك

فسوف يعلمون

.....................

صغيرتى

.................

طفل الطلاق :-

عزيزتى ..عزيزى :-

تشعر بالغضب يعصف بكيانك؟

يجتاحك فيهدم احلام ملأت بها قلبك الصغير ؟

تشعر بالقرف من الحياة وبمن فيها ؟

يغمرك الاحساس بالظلم وانك لم يؤت بك الا لعذابك ؟

تتأرجح الخواطر داخلك فتبتر منها ماتبتر ويغرقك الاخر فلا تجد للك متنفسا الا الكره والضيق والتمرد؟

تكره الجنس الاخر و لكن تشتاق الى لمحة حب وود ولو لثوان ؟؟

تتمنى الحياة وتقاتلها ؟

ناقم عليهما انهما اتيا بك الى الحياة ورموك وحدك فيها ؟

عارف :

حقك

وكمان اطلع بصاروخ وفجر الارض كلها وبعد ماتفجرها تف عليها

ها ارتحت ؟؟؟؟

ايه ؟؟؟

مش مرتاح لسه ؟؟؟؟؟

تصدق ولا حترتاح كدا!!!!!!

......

تعال ..وتعالى ناخد لحظة من العمر نهدأ ..من غير ما نثور ولا نغضب ..نهدا بس

................

اهلينا مش الهة

مجرد بشر احيانا يملآهم الحمق والغباوة وما يشفوش كويس .......بس انت كمان مش بتفكر صح

ليه الاطلاق وعموم فى كل حاجة عندك ؟؟؟

الدنيا وحشة ..انا بكره كل الرجالة وكل الستات ..انا مش عايز اتجوز

ليه كل ده ليه ؟؟؟

....

نحن لا نختار اقدرانا ولا اهلنا ..قد يكونون هم امتحاننا وقد نكون احنا امتحانهم

الحياة كلها امتحان .. ومش محتاجة مذاكرة ...عارف محتاجة ايه ؟

انى افكر وابذل اللى اقدر عليه واختار

ايوة هو ده ..........(الاختيار)

علينا قدر ..بس لنا اختيار

لازم نتعلم نتعامل مع الحياة صح

ولازم نختار نتعامل معاهم صح حتى لو ماعاملوناش صح

لازم نبطل نكرر اخطاء اهلينا ..(مش بعدم الجواز وكره الاخر) ...لأ ......باننا نصفى قلوبنا الاول ونحسبها كويس

انا بحب بابا ..حقك ....غصبن عن عين اى مخلوق مهما كان

لكن

بابا بشر ..ممكن يغلط ممكن مايحسبهاش صح ...مش حنعمل زيه ومابحسبهاش صح احنا كمان

حنحبه برضه

ماما غضبانة ......بتنفس غضبها فى ..

وماله !!! معلش ايه المشكلة ؟؟؟ مانتى ياما تعبتيها وهى ياما استحملت عشانك ..وهو اللى شافته شوية ؟؟!!!!!!!

هو احنا فاكرين الحب بالساهل كدا ؟؟؟

بحبك .....اه... بحبك ؟؟؟؟؟؟؟؟!!!!!!!!!!!

شكرااااا

وبعدين ؟

لازم نتعلم نحب كبشر ونحب بشر ونتعامل مع بشر.... نسامحهم ....ونغلط....ويسامحونا ولو ماسمحوناش نحايلهم لاننا بنحبهم

ندى فرصة فى قلوبنا لهم للعودة بعد مايغلطوا

لما نحب حد لازم نكون فاهمين انه بشر مش ملاك

ولما نحب حد دا ملوش علاقة هو حلو ولاوحش

اهلينا لما بيحبونا بيحبونا بفهمهم وطريقتهم

ممكن تكون طريقة حلوة وممكن وحشة

بس المحصلة واحدة

احنا بنحبهم وهما بيحبونا

ولومحبناهمش احنا الخسرانين

واحدة واحدة نوصل مفردات حبنا لهم ..نعلمهالهم ..ايه المانع نعلم اهلينا يعنى ؟؟؟

ممكن مش حيفهموها فى الاول لكن بالاصرار والثبات عليها حيحسوه وتوصل معانيها لهم

اهلينا لاهم ملايكة ولاشياطين

ناس مجرد ناس لهم جانبهم المظلم احيانا ..لكن برضه بنحبهم

وحنحبوهم غصبن عنهم كمان

بابايا كان بيتكسف منى ومابيبوسنيش ابدا وانا صغيرة ..لكن انا كنت بغلس واتبت وابوسه

كنت فى البداية بتضايق انه مش بيبوسنى ..لكن بعد شوية فهمت انه بيتكسف ودا كان ابعد مايكون عن بالى

بس دى الحقيقة( من غيرزعل يا حجيج )

لما فهمت ده بقيت ابوسه بالهزار والضحك واجرى

ارجع ابص عليه من غير ماياخد باله الاقيه بيضحك ووشه بيحمر

كنت بخاف من بابا وانا صغيرة بس كنت بحبه اوى

وبعد سنين

مرة كنت داخلة عليه الاوضة سمعته قبل ماادخل بيقول لماما

البت دى لما جات المرة دى باست ايدى ومابستنيش زى عوايدهاا

هى خلاص الغربة است قلبها ؟؟؟؟!!!!!!

...................

حبيبتى بنت المطلقة

ممكن الحياة ماتكنش وردية بالنسبة لك وطفولتك كانت قاسية ...بس هى دى الحياة ...كل الحكاية انك ادركتيها بدرى شوية ...تعلمى من اخطاء ابويك ..ولا ترفضيهما ...فهم يحبونكى ايضا رغم كل ذلك

وحينما تحبى اهلك او اى حد فى الدنيا ...حبى فيه انسانيه وبشريته وضعفه قبل ماتحبي فيه احلامك

ودمتى بكل خير

طاب هو ..وهى ..انا بقى مالى

انا مش عايزة اكون مكانها يوم...

اتوسل اليكى بلاش جوزى ...

مسكينة هى ..

قالت لى مرة : عارفة انا نفسى فى ايه

-...........؟

- ان ولا ست تشوف جوزى !!!!!!!!

- لدرجة دى بتحبيه ؟ طاب ماتحافظى عليه وتحسسيه بحبك يا بنتى وهو لو الستات كلها اترمت تحت رجليه مش حيشوف غيرك

- ياختى اتنيلى

- حاضر ( هو انا لية مصاحبة العيال دى ؟؟)

- بصى انا قاهرنى اوى ان لو انا فيا عيب يجرى يشوف حقه ويتجوز واحدة يتجوزها بدل الغولة اللى بديل اللى فى البيت اما هو بقى لو منقوع فى الزفت كدا نبلع ونكتم همنا فى قلبنا وخلاص يا ايما نتطلق

- الله الله مالهم المطلقات بقى ياست هو انتى مش قادرة عليه حتقدرى علينا احنا ؟؟

- ماهو يختى فكرك حيتجوز مين ؟ ماهى واحدة مطلقة صغيرة يبقى فارس احلامها وفجأة تلاقى الشهامة نزلت على دماغه بعد ماكان بيسيبنى اجرى بابنه العيان فى انصاص الليالى وهو نايم ..

- لالالا بس المو الموضوع اكيد مش بالشكل ده

- يا ختى قولتلك اتنيلى (تانى)

(بالمناسبة بقى اتنيل دى كلمة وحشة جدا كان الفراعنة بينيله الميت بطمى النيل يعنى بيدهنوا جسمه به ...يعنى هى تقصد اااااا؟؟؟؟؟؟؟؟؟؟؟؟؟؟؟؟؟؟؟؟؟؟ يا نهارها مش فايت )

- انتى رحتى فيييييييييييييين ؟؟؟ يا بنتى المطلقة واحدة عايزة ضل راجل غلبانة ومنكسرة وتلاقيها كدا لونة كأن مافيش ستات على الارض غيرها وهى اللى تجيب الديب من قفاه وبعدين لاحتكلفه لا ابيض ولا اسود حترضى بالشقة اللى هى عايشة فيها وهو يهل عليها زى البدر كدا وكل الحكاية يشترلها حتة موبايل خيبان ولا اكلة سمك ولا كيلو لحمة ودمتم

الدور والباقى بقى على انا وعلى عيالى وعمرى وشبابى اللى واقف رهن رضاه واشارته ياختى روحى ...........

-لا بس بقى اتنيلت خلاص ودفنونى خلاص اهمدى بقى كربتينى

........................................

انا مش حقولك اندى الحقيقة

لكن

انا بقى مش عايزة كدا

مش عايزة افرح دقيقة واتعذب شهور

الان انا املك حلمى .. لكن معاه بالحال ده لاانا بحلم ولا عايشة

انا بقى مش شايفة الجواز نهاية امالى ولا مبلغ احلامى

فى مجتمعى الصغير الكل بيحسدنى على راحتى النفسية وعلى هدفى المحدد

وعلى انى مش ندمانة على مافات ولا فرحانة باللى جاي انا عايشة النهاردة وبس

كل يوم بحب ربنا اكتر واكتر ..ماشية فى ستره وكرمه

لما اتقيت الله فى الست اللى ماقابلتها عمرى وحفظتها فى زوجها

حفظنى ربنا الاف وملايين المرات ومازال كرمه غامرنى

اللهم انى اشهد انك نعم الرب وعزتك وجلالك نعم الرب

...........

انا لست ضد الجواز الثانى لكن انا لااقبله

اعلم انى بحسابات البشر العقم اختياراتى محدودة فرصتى ضعيفة

لكن ..انا بقى احب اعيش فى جو رايق .. بعدين انا قولونى بايظ ..

اجيب لنفسى واحدة تفرسنى ولا تكيد فيا

و الاقى بقى التليفونات تشتم فيا ولا القصص اللى بسمعها دى على ايه

بلا ني ..... بلا خيبة

..............

الحياة ابسط من كدا بكتير اوى اوى

رحلة .. الطريق فيها صعب ووعر وطويييييييييييل

والزاد قليل والحمل تقيييييييييييييييييييييييييل اوى يقصم الظهر

وانا وحيدة ..لكن لست مستوحشة ....فالله معى

كل ماارد عنى شيئا عفة او خوفا منه او رغبة فيه ....

كل مالاقى ظلى على الارض اخف ..بيفتحلى ابواب كتيييييير

لو اتعريت سترنى ..ولو ضعفت قوانى ....... ولوضاقت بيا الدنيا فتح قلبى بنوره

انا مش عايزة اتجوز ولا يجب عليكى انتى كمان

احنا محتاجين رجال حقيقية

محتاجين اننا حتى لو كنا حتنجوز كزوجة تانية مانبأش عشان رخاص وابو بلاش كتر منه

انا عايزة رفيق بس مش حدور عليه ولا حستناه ولا حيأذينى انه اتاخر او حتى مش جاى

انا راضية كدا وكل مابرضى برتاح اكتر والاقى عندى ملايين الحاجات

اللى محتاجة ملايين ملايين السنين احمد ربنا عليها

حقول ايه ولا ايه

حقولك حرام .. حرام عليكى تستبدلى ماهو ادنى بالذى هو خير

عيب عليكى فى حق نفسك انك تعذبيها

وعيب عليكى تديى لاى بشرى قوة توقف نصيب ربنا بعتهولك هو المجتمع يملك لنفسه ايه اصلا ؟؟؟

حلو اوى

طيب والحل ؟؟؟؟؟؟؟؟؟

اولا : ابتدى تتعلمى ان تصلى ..ايوة صلى بالليل والناس نايمة كدا روحى لله

انزلى ومرغى انفك فى الارض حيرفعك ويرفع عنك البلاء

وانتى بتصلى فكرى فى الله فكرى فى معنى كل كلمة وكل حركة ارتشفى النور

قطرة قطرة ..إحبى فى طريق الله خطوة ورا وخطوة ادام

ثانيا : تصلى على النبى ليل مع نهار وانتى فى الشارع فى البيت فى كل حتة

حتلاقى قلبك هدى وعاد لصاحبه (فان خفت عليه فالقيه فى اليم )

يعود لك تانى بكل الخير

ارمى قلبك فى بحر الرضا والشكر ..انتى ليه مأزماها كدا ؟؟

مش يمكن تكونى فى مقام شكر يجب عليك الحمد والاعتراف بالشكر والامتنان لصاحب المنة ؟؟؟

ليه باصة تحت رجليكى ؟؟؟؟ ليه مش بتراضى نفسك ؟

ليه مابتديهاش حاجة بتحبها وتحايلها كدا لغاية ماتيجى راضية

ليه عايزة تشربى المية السخنة فى عز يولية ؟؟؟؟

...........

كنت مرة فى غاية الضيق .. مخنوقة بالعياط ومفلسة ومديونة والحنفية بايظة والغسالة

والباب مش راضى يتفتح عايز اربعة يشدوه ومديرتى مطلعة عينى ..

وماما مفلوقة من العياط فى اتليفون كل ماكلمها عشان رفضت العريس

وانا ادام دموع التماسيح بتنيل خالص مابالك بامى دى الحاجة الغالية

وانا ماليش فى الدنيا غيرها هى والحاج

وماليش عمل عدل فى حياتى غير محاولاتى ارضائهما ..

ممكن اعمل اى حاجة ولا اشوف دموعها ابدا وبسببى كمان !!!!!!!

يا الله طاب دانا طليقى قال اللى قاله فيا وعندها هى

وقال : نفسى كانت تبقى زى امها دى مفيش زيها ولا حبها لجوزها .

فعلا انا مجيش حاجة فى امى لكن يمكن يوم القدرة تتكفى على فمها ولا قفاها حتى يوم من الايام

المهم ......كنت فى اشراف على البنات والكورة بتاعتهم طارت فى مكان عالى

فقررت انى انا اللى اجيبها :واتشعبطت وطلعت جبت الكورة ونزلت نطة واحدة لاقيت قلبى دق جامد وكأن شريايينه وصماماته اتفتحت ..وجريت بالكورة واللى الجدع يلحقنى ..جريت وعرقت ونهجت وايديا اتسلخت بس كنت مبسوطة اوى ضحكت من قلبى وانا بتكعور زى القلة .. مش البلاس .(.حاسبوا .) القلة اشيك.

رجعت تانى كابتن فريق السلة فى مدرستى الثانوية

اينعم ولا كورة دخلت الحلقة بس مش مهم ..مين حيحدفونى بالطوب يعنى لو خسرت

يبقوا يحرمونى من الاولمبيات..ويخسروا مواهبى بقى

ضحكت جدا ولاقيت الالوان فى وشى اتفتحت ووردت .. والبنات كانوا مبسوطين اوى

وانا مروحة قررت انى مش حضايق النهاردة

وانا مش عارفة ازاحم فى الميكروباصات وباخد اكواع قانونية محترمة

قررت اخدها مشى على الاقل نص المسافة

عقدت العزم..وتوكلت على الله

وانا فى الطريق لاقيت كشك ورد والمعادى ام الورد

دخلت اسنتطقت الذوق فى وجه البائع

قلتله ايه اقل حاجة ممكن اشترى بيها ورد ؟؟ انا بصراحة مفلسة

بس نفسى هفانى على الورد

الراجل قالى: اللى حضرتك عايزاه

فتحت شنطتى لاقيت 12 جنيه ..عطيته 5جنيه

لفلى بوكية ورد صغنن بس ملا قلبى فرحة جميييييييييييييييييييلة

الله يسعده الواد ده

بس يا ستى وقمت ماسكة السبحة فى يد وفى البوكية فى يد واخترت شارع عمودى قليل الناس

وهاتك حتتك بتتك .. وصلت لمكان الميكروباص وكان منتصف الطريق ومش ممكن الاقى واحد فاضى

بس انا مستبشرة وعندى ثقة كدا ان ربنا مش حيخذلنى

تخيلى وقف ادامى وكرسى واحد فاضى

وانا فى الطريق بعد مانزلت قابلتها اعرف عنها ضيق اليد وارى العزة فى وجهها دايما

طلعتلها الخمسة التانية وروحت

باقى 2جنيه

طلعت السلالم جريا بعد ماكنت بطلع ربع سلمة واركن على الحيطة دقيقتين

وصلت الشقة مية من الجوع التلاجة بيضاااااااااااااااا

مش مهم قلت اتشطف واصلى ركعتين شكر اه مانا لما تضيق معايا اصلى ركعتين شكر لاكون

فى مقام حمد ..واكيد لانى احسن من ملايين الحمد لله

بعد الصلاة ريحت على السرير لاقيت بابا بيتصل

- انتى فين - فى البيت

- اركبى وتعالى الحتة الفلانية ..اصلك معزومة معايا على الغدا عند واحد ومراته وانتى عارفة انا ماليش فى الكلام ده هو امك مزعلاكى ولا ايه؟- ليه يا بابا

- اصلها بعتالك شنطة تقيلة فيها اكل باين

(يا فرج الله )

نزلت ورحت الغريب ان الكل قالى ان وشى منور وانا مش بحط مكياج فى الشارع نور منين ؟؟

ونفس الطرحة بتاعت كل مرة ايه اللى حلاها على وشى

فرحتى بابا واعدته اللى زى السكر وفكاهاته اللى مابتخلصش ولا نفخه فيا طول الوقت وكأنى ملكة او نجمة فى السما ولا مدحه للناس فى وافتخاره انه خلف بنت زى

ولا رضاى باللى بانا فيه ولا سعادتى بترضية ماما لى ودا يثبت انها مش زعلانه

ايه الجمال ده ايه الدلع اللى انا فيه ده ؟؟

بعد ما خرجنا اتحفنى ابويا كالعادة بمية جنيه وبشطنة الخيرات ووصلنى للمعادى

وراح للحاجة ( امسكوا الخشب مش ممكن حد فيهم يبعد عن التانى ليلة )

...

خلاص لا لسه

اخت صديقة لى جات من لندن ..اتصلت وجات زارتنى وجابتلى عدة تريكو شغل برة

لا ايدين ولا خوازيق شغل ناس بتفهم

اقولكوا سعدت ايه مش حتصدقوا ؟؟؟؟

كنت هادية مطمئنة ... ربى عند ظنى

الاعجب ان الشهم اتصل ..

قلتله انا ماينقعش اكلمك تانى ...من فضلك ماتتصلش

- اسقط فى يده ماعرفش ينطق ماكنتش زعلانة عليه ولا هاممنى حاسس بايه

قلتله انا شايفة انى ضعيفة دلوقتى ومن الافضل انى ابعد عن اى رجل

وان الاولى بوقته وفلوس التليفون اولاده

- قالى انت مافيش فايدة فيك حتفضلى متفتونة على نفسك

قاطعته بمنتهى الحزم وقلة الذوق انا ادرى بنفسى ومصلحتى تقدر تقولى انت بتساعدنى ليه وبتتصل ليه ؟؟

تقدر تقولى ..وبعدين ..؟

- اهدى بطلى تخاريف ..

مش حقولكم كملت المكالمة ازاى بس انا عارفاه وعارفة انه شبه مربينى وعارف انى عنيدة ..قطعت عرقه وسيحت دم امه كمان بمنتهى السفالة وقلة الادب

ليه لانه ماكنش حيرجع كان اى كلام ممكن يناقشنى فيه وكان بقاله سنين ماكلمنيش ففرصة استغل ده وكأنى اتغيرت عن الطفلة البرئية بتاعت زمان ودا شبه صحيح

...............................

سيبوك منه سمعت انه جاله اكتئاب كام يوم بعد كده وبعدها خاد مراته فسحة لوحدهم كام يوم

ها ؟؟؟ ايه رأيكم ؟؟

.....

رحت بصيت فى المراية ونزلت على طول

رحت لكوافيرتى اللى بقالى كام سنة وماعتبتش عندها

قلتلها عايزة اقص شعرى عايزة اشوف واحدة تانية

وفعلا كنت حزينة على شعرى اه لكن كنت مبسوطة بشكل الجديد وكان كل ما يطول يدينى شكل تانى

تانى يوم اتصلت واحدة عايشة فى الخليج قالتلى فى مبلغ كبير واحد حيجبهولك عشان تجيبيلى كذا وتدفعى كذا على اقساط لى وتقدرى تاخدى منه لو احتجتى وابقى كمليهم لما يبقى معاكى

اتحمأت اوى (يا سلام يا ختى هو انا مستنية فلوسك ولا حاجة ....؟؟؟؟

(يا كددددددددددددددددددددددددابة)

..........

اتعلمت انى لما اعف عن حتى الحلال اللى ممكن يأذى حد ربنا حيعوضنى

حيبعتلى اللى محتاجاه فى وقته

....................................

كل اللى انا وانتى وهى طلبينه الراحة والسعادة وبس مع الستر

مش كدا

انا محتاجة حبيب اخ صديق رفيق استاذ معلم لى امام اصلى وراه وانا مرتاحة عارفة ان اقواله وافعاله واحدة

نسهر نغنى فى حب النبى ونلاقى حد بيقولنا انا ادام الروضه ادعوا

.....

اللى جابلى اكل اسبوع وتلاجتى فاضية واللى دخل على قلبى السعادة وهو مفطور واللى اكلنى احلى غدا وانا مية من الجوع واللى رزقنى بدل الخمسة جنية 100 واللى بعتلى ادوات تريكو مافيش فى مصر واحدة زيها واللى خلى الراجل يدينى بوكيه ورد تحفة بخمسة جنيه واللى خلى الميكروباص فى عز الزحمة ومستحيل الاقى مكان يقف ادامى وانا مش بعرف ازاحم واللى ؟؟؟ ايه ولا ايه

اللى بيعمل ده كله فى يوم واحد بل فى نص يوم

قادر يبعت حبيبى الحقيقى وزوج يفرح قلبى او بديل لكل ده برضه حيفرح قلبى

مانا خلاص اتعلمت ان اختياره هو احسن

انا قلبى عبيط بيفرح بكل حاجة مهما كانت صغيرة

...................

اختى التى لااعرفها ولا تعرفنى ...

اطمنى

اوعدك انى عمرى ماااذيكى

لانى ببساطة

مش عايزة جوزك بالذات

ولانى مش عايزة اكون مكانك

كل اللى عيزاه انك يوم القيامة تشهدى لى انى حفظتك فى غيبتك

وانى ابقيتك على نفسى وانى احبك

حبيبتى

كل اللى طلباه منك

خلى بالك من جوزك ..وخليك محبة طول الوقت

وحاجة صغننة كمان

ادعيلى

الشهم ...

اه من هذا الشهم ..

.ازيك .

مش عجبنى قصة انى بقيت ناصحة ..ومتضايقة من احساس الشئون الاجتماعية ده

تعالى نعد كدا مع بعض ..وسيبك من انى بنصحك على اعتبار انى فلحوسة

يا ختى بلا خيبة والنبى ..دا انا اخيب الناس ..بس ربنا كان كريم معايا اوى وسترها معايا

الحمد لله ...عقبال ما يلطفها بك يارب

بصى بقى ..بصراحة كدا .. ان مش جدعة خالص ..وكتير بعك ومش خبيرة فى الناس

بس ...حاسة بيك

كنت بعد طلاقى وحيدة ..وحيدة اوى رغم ان ربنا رزقنى باحلى اهل واحلى صحبة

بس برضه وحيدة وبردانة ..كان صعبان على اوى اللى عمله فيا ..اوى اوى

يوم مارحت اخد القسيمة من المأذون الراجل اعد يقولى

( حرام عليكى ..والله دانا كان حاله يقطع القلب ..وهو متمسك بيكى

وانتى بصراحة كدا ماتزعليش منى جامدة اوى شكلك ماكنتيش بتحبيه )

رديت بنفس الوش التيفال ( ممكن القسيمة ؟)

خرجت من عنده ..ودموعى تأبى ان تسترنى ابت الا ان تفضحنى فتستوقفنى النساء المشفقات متسائلات

اى حب ده ؟؟؟؟؟؟

حبه هو الذى لم يتوقف لحظة عن ترديده قبل وبعد زواجى لكل مخلوق يراه؟؟؟؟؟

ام ذاك الحب الذى لم ار منه الا كل ماألمنى وحرمنى من كل ما احب فى حياتى ؟؟؟؟؟؟

اى حب ؟ الناس فاهمة الحب ازاى ؟

منى..........

فاكرينها ؟؟؟

لما شافته يوم ماجه تحت البيت يرجع بعض من حاجاتى

بعد مااشفى غليله بالانتقام والحرمان واعطائه ماتترفع عنه نفس الكريم

اتعرفين ماذا قالت ؟

يخرب بيتك حد يطلق من ده ؟ دا قمر ؟

وفعلا ساعتها تساءلت ليه اخترنى انا ؟لا انا جميلة ولا من نفس طبقته ولا حاجة خالص

بنت عادية ..يمكن فيها شوية تميز بس مش سبب

انه يحارب اهله واهلى وانا شخصيا لغاية ما يحصل على ؟؟

ساعتها سألت نفسى مش يمكن ماطلعتش الانسانة اللى كان فاكرها ليه لا؟؟؟

لكن ليه لاخر لحظة متمسك وفى نفس الوقت مابطلش تعذيب فى

ليه ؟ ..........اسئلة تخبط فى مخى ..تعصف بكل محاولاتى للاتزان والنسيان

ايامها والحمد لله عليها لان لولا هذه الايام ماكانت ايامى الان

ايامها ظهر ..الشهم النبيل .......مافهوش غلطة

من كام يوم تترمى فى الشارع الساعة 11 ادام الامن وبشعرك كمان

والنهاردة

واحد ملاك واقف دادابان على رهن اشارة منك ..
واحد بقى مش اى حد ..دا عارفك وعارف كل حاجة مش محتاجة تتذللى

عشان يحترم والدك لسنه ومكانته ونسبه الشريف حتى لو انتى جزمة ماتسواش ..

ولا محتاجة تقوليله اصلى والله انا ماكنت كدا ولا عملت حاجة غلط ...

ولا محتاجة تحكيله على عمايله فيك وتستعطفيه وتستجدى وده وجانبه وتاييده

لا ........دا جاهز

كلمنى ... من غير ماطلبه

- انتى كويسة ؟

- لا

- حتعملى ايه ؟

- ملخبطة ومش عارفة

-بتهرجى !!!!! انتى ؟؟؟ عايزة تفهمينى انك فعلا مش حتعرفى تتصرفى ؟

-...................... مين قالك ؟

- الحاج ........ خدى نفس كبير وقولى الله ....فاكرة مش ده كلامك ؟؟؟

-.....................

اعمل ايه ؟ مش شايفة كويس .......

- معلش طبيعى .... بس انتى مش اى حد وعشان كدا ابتلائك مش اى حاجة

فكرتى حتعيشى ازاى وحتعملى ايه ؟ ها اعدى فكرى وحتصلى بيك بكرة تقوليلى خططك وناقشها سوا

حتكونى بخير انا واثق ؟ مش انتى اللى تكسرى بسهولة كدا ولا بالف واحد زيه

- خير كله خير الحمد لله

- مش قلتلك ؟ انا كدا مطمن عليكى لبكرة

...................

سيدتى ايه رايك ؟ هذا هو وانا خارجة من واحد ليل نهار يهد فى كل ثقة لى

لدرجة انى وصلت لمرحلة لن اقولها علنا ..لكنها ترجع لمراحل الطفولة المبكرة

.........

ها تعملى ايه ؟؟؟؟؟؟؟

شخص حاطك فوق راسه مش دايس على رقبتك وكرامتك بالجزمة

..............

بس

فى حاجة غلط ..رادارى اشتغل ليه؟

بالظبط تلات مرات كلمنى رتبت افكارى معاه وانا اتصلت بيه تلات مرات

لا انكر انى كنت انانية وشبيه بمصاصة دماء احتاج لمساعدة ..

يا عالم حد بس يوقف دماغى ثوانى وانا حعيد ترتيبها تانى والله مش حمل عليكم انا ..

بس مش قادرة اقوم ..حد ياخد بايدى بس

مش عارفة الاقيها منين ولا منين حعمل ايه اروح بلدى ولا اعد ؟؟ حشتغل فين وايه ؟

حعيش فين ومنين ؟

مرعوبة ماشية بتلفت ورايا زى المجنونة مش عارفة حتجيلى الضربة منين

وهو

راسى كدا وهادى ويده مفتوحة لك ولكل ما يتعلق بك ولا حتى يمسك من بعيد

عنده استعداد يسمعك ولو يوم بليلتين ..

طويل وعريض يسد اى فتحة يجى منها اى مخاوف تهجم عليك

بسسسسسسسسسسسسسسسسسسسسسسسسس

ايييييييييييييييييييييييه

عيشة هى ؟ فى ايه ؟

نسيتى نفسك ؟ يا امى انتى مطلقة لسه حالا ضعيفة

مهترئة المشاعر والقلب والروح والكبد والطحال كمان

استنوا استنوا

اشمعنى مايجيش الا دلوقتى ..واشمعنى بكل تلك الهالة الخرافية حواليه ؟

دا ..دا حتى بيفكرنى بحد ؟!!!!!!!

مين ؟؟؟ مين ؟؟؟؟؟؟؟

اه زوجى العزيز ..مش برضه كان ملاك بجناحين فضى ولا وردى ولا كحلى

؟؟؟؟؟؟؟؟؟؟؟؟؟

ان ........ ان .... ااا

ايه بقى ؟؟؟؟؟

ايه ده ؟؟؟؟؟

...هو انا عايزة ايه بالظبط ؟؟؟؟

عايزة القط نفسى من اللى حصل لى ؟ ولا عايزة استعيد ذاتى اللى متفتتة مليون حتة

ولا عايزة اتجوز بعد العدة واجيبله حسرة فى قلبه يعيش بيها ملحوس فى الشوراع ؟؟

عايزة ايه يا لعل بالظبط ..

حنستعبط بقى ؟!!!!

وبعدين هو عايز ايه ؟ جى ليه دا كمان ؟

بصراحة انا اكتفيت من جمع المذكر الغير سالم ده

.........

بينى وبينك يا ستى ..انا كان وحشنى اوى اوى انى الاقينى انا تانى

كنت وحشانى واى ..نفسى اشوفنى تانى .. نفسى احس بالرضا تانى ..

نفسى اخد نفس طويييييييييييل واطلعه من غير مايتقطع ...

.................

انا مش محتاجة حب ولا رجل ..انا محتاجة ارتاااااااااااااح اولا

حعرفه ازاى وانا ماعرفش انا مين ؟

حختاره ازاى وانا مش عارفة اختار سكتى ..انا مين وعايزة ايه ؟

.........

ليلتها

فضلت افكر فيه زى اللى ماصدقت لقيت عريس .....

اهو ..اهو ..فى حد شايف انى مش زى ماقال التانى

اهو اهو انا كويسة ولسه انفع اهو

اهو يا كلاب واحد يتمنى ضفرى ( دا مقصوص يا دى الخيبة ماحدش يجيب سيرة بقى )

رغم انه ماتقدمش ..رغم انه ماقالش حاجة

لكن كنت كما قلتى انت قبلا

ابحث عن غطاء يسترنى ويستر قلبى ..ولم ابحث دا جه لوحده اهو

بسسسس ..يبقى ربنا بيطيب قلبى بقى خلاص

يبقى ايها القادم السعيد ابن المحظوظة هاك قلبى البكر ..وفؤادى الشغوف بلقياك

يا سلالالالالالالالالالام

.....

وقفت ..

لا

مش عشانه ولا عشان بيته واولاده وزوجته اللى مأمناه كما الغربال المعهود بالظبط

انا مالى انا ومال دا كله !!!!!!!!!

ولو ساعدنى النهاردة ؟ بكرة حعمل ايه ؟

هو ليه الطريق بقى سهل كدا ؟ امال انا تخيلت انه صعب ليه ؟

..............

لا يا سيدتى

لا

ان كان نصيبى فسيأتينى لامحالة ولو اجتمعت الارض وقصة زواجى تشهد بذلك

خلاص تعلمت الدرس ..لن اسعى لشىء لن اندم على اختيارى ولن اندب حظى .. سأهدأ قليلا

لن اصطدم بالمجتمع الان ..لست متأكدة من مشاعرى ..بل انى اعرف اين قلبى الان بعد ان فقد مكانه منذ قليل

ايها الملاك شكرا ....مرسى جدا ...حود علينا بعد شوية من فضلك

وكمان مانش مدوارة على قلبى هو الاخر

...

انا مش فاضية ...

عايزة ابص ادامى يا جماعة لحظة ..ليه بتشدونى بعيد ..مالى عايزنى يجى يمشى معايا

بتمزقونى ليه تانى ... بس هص

ولا كلمة ... حاخد نفسى واشوف خطوتى الجاية

وبعدين اشوف حكاية الملايكة اللى وقعت على راسى دى

والغريب بقى ان الملايكة زادت جدا وفجأة كدا الناس بقت حلوة وزوق ومؤدبين

ومجرد ماديهم الوش المحترم هوف ... لاشىء

بصراحة كنت بتضحك

اصلى ماكنتش فاضيلهم كنت مشغولة ..

مشغولة جدا

ببنى اول اسس فيا تانى ..بس الاعجب انى بكتمل بسرعة ..وبهدوء

ببص حواليا

الاقى بشر حقيقة بس بكلمة بتوجع احيانا من غير قصد او بقصد خير

لكنهم بيجتمعوا على حبى وخوفهم على

كل اللى على انى اطمنهم بس واهديهم وامنهم من ناحيتى وهم حيبقوا احسن من الملايكة

للحديث باقية

الشوكة

(واضح اننا بنجرى فى نفس الاتجاه دون ان تدرى احدنا عن الاخرى شىء

ولكن اعترف انه دخل فى قلبى شوكه لم تعرقلنى ولكن تؤلمنى لا بل تدمنى

اسال الله ان يسلمك منهافادعو لى بالشفاءاختك فى الله ثم الطلاق )

..................

سيدتى

نفس الشوكة اياها

بصى

ماحدش حيشدهالك ..اخلعيها حتنزف شوية وتوجعك

لكن وجع مرة واحدة ولا وجع كل لحظة

............

اوجعتنى كلماتك سيدتى

تلمست قلبى وانا أقرأها .لاتاكد انه سليم

....

سيدتى

لاادعو ابدا بالطلاق

الطلاق لم يكن لى امنية ابدا انما كان بتر لعضو طالما أذانى

بتر لجزء تخيلت لفترة طويلة انه جزء من قلبى

لكنه لم يكن ابدا كذلك

سلب منى اولى لحظاتى كأمرأة وتركنى كمن يلفظ لقمة لم يستسيغها

رغم انه لم يتوقف عن مضغها لحظة

..

هكذا كان ظنى

هكذا كنت ...اتجرع هذا الالم الذى يذيبك الان

لكن

توقفت ..

لا..كفاية

يكفى الم

....

لاتطلبى شيئا ..دعى الامر لله ..بطلاق او بغيره اريدك اقوى..

به... من غيره مش مهم

الاهم ..انتى

انتى وبس

.......

سيدتى

لاتبلعى الوجع ..خففى عن نفسك فيه لكن توجعى واطلقى أهاتك

تهز عروش العدالة ..

لا تبحثى عن ظالم ومظلوم

ابحثى عن اولى خطواتك ..عن كيفية مواجهة ماتمرين به الان

امسكى ورقة وقلم

واخرجى من نفسك ثم ادخلى ثانية

ادخلى امراة اقوى تبحث عن ما عليها الان عمله

لاتفكرى فى المك الان ..سيكون لديك الكثير من الوقت له

وسترفضيه ..

حددى ما يجب عليك فعله

اذا كان لك حق فاطلبيه او طالبى به وتمسكى به قدر استطاعتك

وان وجدت ان الامر سيفقدك احترامك وسيؤدى الى مهانة

فدعيه واتركيه ترفعا ترك المترفع عن طلب عظمة من كلب

.........

نعم

نحن نجرى فى نفس الاتجاه

لكن انفاسى الان اهدأ

فلتهدأ انفاسك اختى الحبيبة التى لم ولا اعرفها

ولكن جمعنا الم شوكة واحدة

.......

معك حبيبتى من لايضيع عنده حق

واه لو تعلمين ما ادخره للصابرين

اه لو تريننى الان

واه لو كنتى رأيتنى من سنوات خمس مضت

لعلمتى ان الله لايفعل الا الخير

والحكمة تظهر بميقات

.......

ابشرى بالخير

وليكن لطف الله بك دائما سيدتى

..............

عارفة ايه اكتر حاجة طيبت قلبى ؟؟؟؟؟؟

الصلاة على النبى صلى الله عليه وسلم

حتهدى قلبك وترفعك عن الضغينة عليه

واقولك كمان على سر

ادعيله

ادعى لزوجك او لطليقك بالخير وصلاح الحال

وانه ينور بصيرته ..سيبك من كل اللى بيحصل

وادعيله

ادعيله يعود على قلبك بالخير

ادعيله وانتى حاسة بكل الجرح والظلم منه

ادعيله لانه كان فى يوم حبيبك

كان فى يوم ..كل حاجة

ادعيله وانتى مشفقة عليه من ظلمه

...........

كلام غريب؟

لا بعدين حتعرفى اد ايه رجع دعائك لك

وان الدنيا مش غابة

وان الله موجود

وانه بيحب اهل الفضل

فكونى منهم

هى دى سر القوة

بالله بس

........

كونى نبيلة وخصم شريف ولا تطلبى نصرا

اطلبى الفرج فقط

وقبل كل ده وده

اطلبى الله

النهاردة المووووووووووووووولد

كل سنة وكل الامة اللى هى خير امة طيبة وفعلا خير امة

انا واحدة تعلن انها بتحب النبى وبتحب يوم مولده

وبتحتفل به

كل سنة وكلكم بخير وطائعين

دليل المطلقات 3

هذه الصورة اعجبتنى فى احدى المدونات ولا اذكر ايهم فهم كثر فعذرا لصاحبها فى

عدم استئذانه ولكنها انسب ماتعبر عما اريد قوله

سيدتى

الامر ابعد ما يكون عن القوة والفتونة ....

انما هو قمة الضعف والفقد ..الذى يثبت انتفاء حولك وقوتك ليثبت انه لاقوة ولا حول الا به سبحانه

.............

هو الطفو بعد العجز من المحاولات المستميتة للنجاة من خضم الامواج التى تعصف بيكى من كل اتجاه

وانتى بقارب صغير بلا مجاديف ولا محرك وكمان مخروم

هو النجاة رغم ذلك بالله فقط

................

هذه التى تتحدثين عن قوتها وشجاعتها لم تريها فى مثل ذلك الوقت من اربع سنوات

كانت تدخل المطبخ تحمل كيس الخضار لتعد الغذاء فى حوالى الساعة الثالثة ظهرا

فتجد نفسها فى الرابعه الا ربع ومازالت فى نفس وقفتها ..

فقط لانها تحاول ان تفصل مابين مااعتادت ان تطبخه له..

وما اعتادت طبخه وبطريقتها قبل زواجها !!!!!!!!

.....................

لا علاقة بالقوة فى الامر

انما هى الاعتراف بالبشرية العاجزة الموهومة بالقدرة على الفعل ..

الاعتراف التامة بالانوثة المكسورة فى صميم صميم كبريائها

بالاعتراف بالالم المتغلغل فى اعماق اعماق روحك ...

كل هذا دون ان تقهرك او تكسرك تلك الالام ..

ازاى ؟

بالرضا

نعم

الرضا فقط

ما الفاعل الا الله

ما انا فيه ماهو الا خبرة كما اتفقنا قبل ذلك

اذن هو الرضا والفرح كمان مع سبق الاصرار بهذا القدر

وبقضاء الله فىّ ..وفيما اراد لى

............

كثيرا ما كنت اتعجب من الاجانب من تقبلهم لمصائبهم بسلاسة مع وجود الالم

كنت اتهمهم باللامبالاة ..والبرود العاطفى وعدم احترام الحزن وقدسية المصائب

التى توارثناها وتوارثنا معها طقوس تنكد علينا وعلى اللى خلفوا خلفوا خلفونا

وتبقى يا عينى مولعة بنار الامر الداهم عليكى

ولازم ولابد تشيطى زيادة ادبا مع عرفنا السائد فى التعامل مع المصائب

ولا بأس من الكثير من الاغماءات والامراض النفسية والاتشاح بالسواد

واحراق كل الملابس الملونة على اعتبار ان لبسها عار عليكى فى ازمتك هذه

..

وزيادة وامعانا فى التفانى الرائع فى السخط وعدم الرضا والتزاما منا بالاحترام للمصائب

ان تغلقى كل منافذ الهواء ..ولا بأس بالخروج الى العمل لكن مع باقى الاتفاقية من دلدلة الراس

والمشى متنية الظهر محنية العود كبقسامطة فى شاى بلبن

................

ايه يا بنتى ده ..

فى ايه ؟

حنتوراث الهم ده ونورثه لغيرنا لامتى وليه ؟؟؟؟

.............بس استوب

من النهاردة خلاص

بطلى تستنى حد يجى يطيب جروحك ولا يرطب مشاعرك الجافة

بلا خيبة

...

.....

...........

...............

...........................

بذمتك يا شيخة اسألى كده اى واحدة مين برطبلك مشاعرك الجافة ؟؟؟؟؟؟

بس بشرط !!!!!

ماتزعليش منها لما تقولك

يا ختى اتنيلى

!!!!!!!!!!!!

..

عندنا ثقافة الانتظار غريبة جدا

خاصة فى الستات

من اول مانفتح عنينا من ولادتنا الى ان نموت

وثقافة الانتظار ..متواصلة ودائمة

من اول ماتستنى العدل لما يجى يعدلك ويخيب امالك كلها

ومرورا بانتظار الفرج بالخلفة وانتظار الزوج التانى ولا العاشر اللى حيعوضك

كل اللى فاتك من الصرم اللى ماعرفوش قيمتك

الى انتظار الموت كالافيال فى مقبرة الشلت والتتنيحة ادام التلفزيون

وعيادات الدكاترة واوزان الخراتيت كنتيجة حتمية للامراض النفسية والاكتئاب

( مع اعتذارى الكامل للسيدات البدينات بطبيعتهن وهن غير المعنيات بما اقول فيها )

............................

المهم

نفسى تبطلى انتظار

انا لااقصد ابدا ابدا تبطلى تحلمى او ترجو املا من الله عزوجل

لالا طبعا

مين فينا مابيتمناش رفيق يعينه على الحياة ويشتريله كيلو لحمة فرى من غير مايقوله هات 60 جنيه

ويسبيه يكلها لوحده

كلنا طبعا

مين فينا مانفسوش فى واحدة محترمة تريح باله وتهنيه وواحد (مش له ..لها ) طيب وابن حلال يريح بالها

ومايشمتش فيها الاعادى والاكادى وسكان الوادى

كلنا

مين فينا مانفسوش فى طفل يجى عيد الام وباباه بيذوقه

وهو جايب وردة عينه طلعة عليها وباباه بيغششه قل لماما كل سنة وانتى طيبة ..

لا ينطق الا بكلمة او اتنين وهو مش فاهم فى ايه

كلنا

لكن

الى ان يحدث ذلك

او ما يحدثش

او عنه ماحدث حتى

ها ؟؟؟؟

انتى فين ؟؟؟؟

منتظرة

برافو

هايلة

تحفة

اومى من وشى ..الا انا خلقى ضاق

.........

كنت فى انتظار فى عيادة وكعادتنا المحترمة جدا ميعادى اللى متحددلى فات

وانا مرزوعة اكتر من ساعة

ساعتها حسبتها زى ماقلتلك

وقررت كل مرة اعمل حاجة جديدة فى الفترة دى

تانى مرة

خدت معايا

ابر التريكو - كتاب غادة عبد العال - سبحتى

- دفاتر الشغل - يومياتى - المبايل(معايا طبعا على طول بس ا لنية فى الاستخدام مختلفه المرة دى )

وحاجات من دى كتير

وقررت انى اعمل لستة

things to do

اشياء يجب عملها

و يا ختى ماقولكيش كل الناس مبحلقة لى كدا كأنى بقشر كوسة

مع انهم هم بيعدوا بالساعات ساكتين ويبصوا لبعض وبس

بس انا اللى عجبة !!!!!!!!!

...............

قررت يكون للانتظار معنى ..بدلا من مجرد السكوت ...

او التذمر ولعن سلسفيل اجداد الدكتور ومواعيده

...........

اللى اقصده ...

الايجابية فى كل شىء .. الايضيع عمرك حسرة والم ونكد وغلب

ماكفاية يا بنتى .. انتى ناقصة

ماتخلى كل يوم انتى انسانة متجددة ..

مش لازم تكونى ممتازة وعارفة انتى عايزة ايه

لكن حاولى ........ مجرد محاولة

بس صادقة

وعشان تكونى انتى

لازم تحاولى تكونى اللى انتى عيزاه

ساعتها حتعرفى من فشلك ونجاحك انتى مين

وعايزه ايه

تعيشى عشان تتجوزى تانى وتكيدى امه ؟؟

ولا تعيشى وتبقى انسانة حقيقية ؟؟؟؟؟؟

جه رفيقك خير .........ماجاش لولولولولولىى

الف بركة

...............

عارفة ليه

لانك ماشية فى طريقك .. والرفقة معين ومساعد ..

مش هى اللى عايشة عشانها زى ماضحكوا عليك وانتى صغيرة وفهموكى كدا

عزيزتى

اتعلمى تبصى للنهاردة وبس لابكرة ولا امبارح

النهاردة ( اشياء يجب عملها واحب اعملها وعايزة اجربها وعمرى ماعملتها )وليه لا

مادامت لاحرام ولاعيب ولا كخ يا بنت

.........

خلى بالك من نفسك

وافتكرى

النهاردة

والنهاردة وبس